Ăp nar Tết bôk năm mhe lah rnôk yuh Rơ Mah H’Tuyết (tổ 10, nkuăl têh Phú Thiện, nkuăl Phú Thiện, n’gor Gia Lai) geh rlu. Gŭ ngêt dak trà, yuh mô chuêl ơm nau kan bah ăp mông ôi. Nê lah nklih rup nah ao tanh mhe tă quay, gay ma tăch tâm ăp nar bôk năm mhe. Âk năm bah năp nơh, nkuăl Phú Thiện, ăp ntil ndơ tanh njuh bah Jrai hŏ roh hêng, mô dơi tăch, ăp ntil ndơ dŏng tanh prăp lơi mâng njuh yor mô dơi geh tăch ndơ. Yuh H’Tuyết mĭn tât nau kan, rvăt nah tanh, jêh ri kchoh jêng ăp nah ao mhe. Năm 2013, yuh H’Tuyết ndơn ndơ bu rvăt bôk năp lah 50 blah kho ao ân kon se ngih săm ƀŭt THCS Dân tộc nội trú nkuăl Phú Thiện. Jêh nê lah ăp nai tâm ngih săm ƀŭt đă kchoh jêng ao jong. Jŏ ma nê, kônh wa tâm nkuăl têh Phú Thiện kŏ kchoh nah bŭt, ao gay ma nsoh tâm nar njŭn sông, ngêt sa...Yuh Siu H’July vay rvăt ndơ yuh H’Tuyết nkoch:

            ‘Lah rnoi Jrai, ăp nŭih kŏ ŭch nsoh nah ao ơm bah rnoi nơm tâm ăp rnôk geh nau rƀŭn rgum têh khlay. Bah năp nơh, gâp ndrel ma kônh wa vay hăn rvăt tâm ngih chợ mô lah ntŭk bu kchoh ơm gay ma nsoh. Ntơm rnôk geh ntŭk kchoh bok ao bah yuh H’Tuyết, gâp ndrel kônh wa ta aơ dơi geh rvăt ăp blah nah ao geh kchoh ơm ueh tĭng săk nơm. Ntơm bah nê, hên kŏ mât dơi nau ueh bah nah ao bah rnoi Jrai nơm”.

            Ntơm bah nau kan nklih rup gay ma n’hơ ăp nah eo ueh ân năch, rnôk aơ, Facebook hŏ jêng ntŭk tăch ndơ bah yuh H’Tuyết. Ta aơ, ăp năch mra dơi ôp, mbơh gay ma ôp rnoh tăch, nau ŭch mpeh nah ao. Kŏ bah ntŭk aơ, yuh H’Tuyết hŏ ndơn saơ âk nau ŭch bah ăp năch. Yuh sŏk ntoh mhô: bu ur vay nsoh nah ao tĭng nau ueh mhe rnôk aơ kơt lah ao jong, nah lir ma ao...Âk nŭih lŏ ŭch nah bŭt mbăn kơt nau ơm jêh ri geh rse tâm êp đah pŭng. Bu klô ri nơih lơn knŭng geh troi, ao gleh ti mô lah ao jong ty.

            Gay ma ueh lơn, yuh manh nŭih nsoh ăp ntil nah ao bah rnoi Jrai gay ma nsoh nah ao păng kchoh, manh nŭih nklih rup, nkra ân ueh lor ma n’hơ. Rnơm kơt nê, trang Facebook bah yuh H’Tuyết mô knŭng êng ueh ma hôm geh nau rnơm ŭch đah nŭih rvăt. Rnôk aơ, yuh geh ntơm 70 tât 100 nŭih bu ŭch rvăt. Nau rhơn ngăn lah ăp ntŭk bu ŭch rvăt tă bah ngai kơt lah Nkuăl ƀon têh Hồ Chí Minh, Hà Nội, Phú Yên...Yuh H’Tuyết mbơh:

            ‘Rnôk dŏng Facebook gay ma mbơh ndơ nơm ŭch tăch, gâp saơ âk nŭih bah âk n’gor, nkuăl ƀon têh gĭt tât nah ao bah nơm geh tanh cheh kơt rnoi Jrai ơm. Bu ŭch ngăn yor păng ueh măt uănh ndrel mhe. Gay ma n’hao nau bu ŭch, gâp geh âk ntrong ƀư, ngăn lah nklih rup ân ueh, yơn lah ân geh nau bu rnơm jŏ jong đŏng”.

            Đah rnoh tăch ntơm 400 rbăn tât rlau du rkeh prăk du blah, ăp năm, nau kan tăch ndơ nsoh bah rnoi Jrau, yuh H’Tuyết geh prăk ma rhiăng rkeh, pă kan pah ân 4 nŭih kchoh kho ao. Nau ƀư yuh rhơn ngăn nê lah, nau ŭch tanh bok ntơm bah ntŭk kchoh jê̆ bah yuh kŏ kơl an âk nŭih tanh njuh tâm ăp xã êp nê kơt lah Ia Sol, Chư A Thai mât nau tanh njuh bah nroi nơm tâm rnôk ru. Khay 11/2022, nkuăl Phú Thiện hŏ săch tanh njuh bah yuh H’Tuyết mpla tâm Bôk nau kan du xã du ntil ndơ OCOP geh ƀư ta Hà Nội. Wa Đinh Văn Chinh-Kruanh UBND nkuăl têh Phú Thiện mbơh tay:

            ‘Rơh rlau aơ ri ntŭk tăch ndơ tanh bah yuh H’Tuyết ta Tổ dân phố 10 phung hên hŏ hun hao ndrel pah kan săk tam ngăn, hŏ rgop nau nsum n’hâm ndrel ma nkuăl phung hên mbơh ăp ntil ndơ ơm bah nŭih tâm ntŭk. Gâp rnơm lah, đah ntil ndơ tăch bah yuh Rmah H’Tuyết mra geh mpla n’hơ ta Hà Nội ri mra pơk nau rnơm mpeh ndơ ơm ueh bah rnoi Tây Nguyên phung hên tât đah băl lam dak geh gĭt tât ndrel uănh aơ kơt lah du ntil ndơ ma phung hên mra pă kan pah gay ma hun hao văng sa, pơk nau nsôih ân ƀon lan hun hao nau tanh njuh ơm bah kônh wa rnoi mpô đê̆ ta aơ”.

            Đah nau kơt dŏng mạng xã hội, mro rgâl mhe tâm rnok mbơh, nkoch, Yuh Rơ Mah H’Tuyết tâm nkuăl têh Phú Thiện, nkuăl Phú Thiện, n’gor Gia Lai hŏ ntoh nau ŭch bah nơm đah nah ao tanh bah rnoi Jrai du trong ueh, mhe, tâm di đah nau ŭch rnôk aơ bah năch nsoh. Ntơm bah nê, yuh hŏ rgop nau đê̆ bah nơm gay ma mât, mbơh nkoch ndrel leo nau ơm ueh bah rnoi nơm hăn ngai lơn tay tâm nau rêh mhe rnôk aơ./.