Kônh wa ndrel băl mpôl he mhe tă djăt đơn brô̆ yor wa Y’Dŭ Êban tâm ƀon Sŭt Mđưng, xã Cư Suê, nkuăl Cư Suê, n’gor Dak Lak kreh.

            Đah nau tăng nteh ueh tăng, mô ir sĭk, mô ir mbrơi, ăp bu ndăm rnoi Rđe vay kreh đơn gay nkoch nau mĭn bah nơm, nau ma nơm ŭch đah bu ur. Ntil đơn aơ geh dŏng gay nkre nsum ma rnôk mprơ Kưt đah nau nkoch jong, ngai...Bu ranh Y’Dŭ Êban nkoch, knŭng bu ndăm mơ dơi kreh đơn Brô̆; ndrel đơn aơ dơi kreh tâmn ăp ntŭk lah geh nau ueh, m’ak tâm ƀon lan. Đơn Brô̆ kŏ geh ân lah “ntil ndơ gay ma nthoi nau bên” ân ăp bu ur druh bu klô ndăm.

            ‘Kăl e nơh, brô̆ geh dŏng tâm rnôk hao ngih mhe. Geh nŭih bu mprơ Kưt nsum. Tal bar đŏng, mô knŭng ntuh nau rhơn tâm nar hao ngih mhe, brô̆ geh kreh tâm bah năp ngih tâm rnôk kêng măng mô lah măng ang khay, sial khôm lêt hêt. Rnôk saơ tâm săk geh nau m’ak ndrel geh ăp nau ma nơm ŭch nkoch ri rnơm tâm đơn nê dơm”.

            Rnôk kreh đơn brô̆, bu ndăm mô njroh ao, ty dah chiau kuăn đơn, nglau ty nklĕ kreh đơn, nkre pơk, nkŭp play nông kro gay ma ân păng nteh êng êng. Lah ăp ntil ndơ kreh êng, nông kro geh tăng bah dih, ƀư tăng nteh ngai lơn, ri rlŏ ma nê, play nông kro geh dŏng tâm đơn brô̆ ri păng nkŭp ngăn tâm ndul nŭih kreh đơn. Wa Y’Dŭ Êban nkoch, rnoi Rđe nkra đơn aơ ma ty, jêh ri bu dŏng sriap sŭt gay ma nthoi ăp ntŭk bah đơn ân tâm krêp.

            ‘Brô̆ geh ƀư đah dĭng tơm gleh jong, mpeh dŭt bah dĭng ri bu lir ma du mlâm kđar jê̆ geh trôm gay ma m’ăk rse đơn. Đơn geh kât jăp đah n’gul play nông kro, lơn kro lơn nteh ngai. Đơn geh 5 ntŭk mpet nkra ma rsap sŭt. Bu nkre đơn, blau djăt nteh ueh ri mra dơi nkra ngăch ngăn. Ƀư mông ôi tât kêng măng lah geh du mlâm đơn brô̆”.

            Nteh bah đơn Brô̆ tĭng nau dơi tăng ueh ngăn lah tĭng nau ŭch bah nŭih dôl nkreh, ndrel kơt du nau nkoch bah du nau mprơ rnoi Rđe. Êng nau ŭch nkoh nau mĭn, nau ŭch tâm săk nơm mpeh nau tâm rŏng, đơn brô̆ hôm geh dŏng tâm rnôk bu luh bah mir, kreh gay bah oi nau lêt rgănh. Nteh đơn tăng m’ak, geh âk bu djăt kŏ kơt lah nkreh đơn aơ rnôk n’hir kon se ri kon, sau bĭch ueh đŏng. Wa Y’Dŭ Êban nkoch tay:

            ‘Tâm ăp nkuăl ri geh nau nkreh đơn nteh êng êng.  Nsing tâm nau blau bah nŭih nkreh. Ndrel du nau nkreh yơh lah lah nŭih nkreh blau lơn ri tăng ueh, ngăch lơn, ndrel ngăn lah lah nŭih geh nau blau ngăn ngên ri ăp nau rngot geh nkoch rnôk nkre brô̆ tăng kŏ gĭt đŏng, ƀư er păng geh êng êng”.

            Rnoi rđe ŭch ngăn ma đơn brô̆, mô knŭng bah nau nkoch ma hôm bah nau mât, nau dŏng, tâm dăch ma đơn tă bah nau blau nkreh. Rnôk nkreh đơn, tăng nteh, nuih n’hâm nŭih djăt kŏ tăng n’ơn, m’ak, bah nau rngot, nau rvê, nau mĭn tâm nau rêh. Kăl e nơh, ăp rnăk rnoi Rđe kŏ geh đơn brô̆, ndrel ăp ƀon geh âk nŭih blau nkeh păng đŏng. Yơn tĭng nau hun hao bah nau rêh mhe, âk nŭih hŏ chuêl nau nkra, nau nkreh. Nê lah nau rvê bah ăp bu ranh tâm ƀon lan rnoi rđe. Wa Y’Dŭ Êban nkoch: “Jêh aơ mô gĭt geh đŏng lah mô nŭih blau nkre đơn brô̆? Nteh đơn brô̆ geh hôm tăng nteh tâm ƀon lan đŏng lah mô?”.

            ‘Ntă nŭih ŭch nti nkre đơn ri gâp mra ntĭm nti tay. Yơn lah, âk ngăn bu mom rnôk aơ bu hăn nti ndrel hăn pah kan joi prăk gay mĭn nau rêh, Mô tŏng prăk gay ma ntuh kơl, bonh đă ăp kon se kơt tĭng nti ôh. Rnôk aơ, đê̆ ngăn nŭih blau nkra đơn brô̆, geh ƀon ri hôm bar pe nŭih, geh ƀon ri mô hôm geh nŭih blau nkra ndrel blau nkreh ôh. Aơ kŏ lah nau rngot ngăn ndrel ŭch tâm ƀon lan nơm mra geh nŭih ŭch lơn ma păng. Lah mô geh nkoch mbơh ndrel mât ri ngăn lah mra roh ngăn ăp nau ueh bah u che kăl e lơi an”.

            Tăng nteh m’ak ntôr bah đơn brô̆ mô knŭng ân nơm tăng nteh m’ak tâm nau rêh, du nau mô dơi mô geh tâm nau rêh bah rnoi Rđe, ntop tay nau nthoi ân ăp nar geh nau m'ak ma hôm lah nau ueh êng bah ndơ goh, nkreh, nteh bah rnoi Rđe./.