VOV4.M’nông:   Tât đah nkual ƀon têh Pleiku tâm rơh rlu lễ Quốc khánh 2/9, năch pâl nđaih mô dơi ntlơi ntŭk uĕh Biển Hồ, dơi ntĭt lah “Đôi mắt Pleiku”. Ndrel đah ăp nău uĕh ơm, uănh nsong ăp ƀon nău kan way ơm kơt cheh tanh, năch pâl nđaih hôm dơi sông sa ăp ndơ sa kah bah nuĭh Jarai n’hanh djăt chĭng gông mboăt n’hôm way ơm.

          Tă bah Biển Hồ nklăp 1km, Ntŭk djăr gŭch Plit ta ƀon Têng 1, xă Tân Sơn, nkual ƀon têh Pleiku, n’gor Gia Lai yor du rnăk nŭh Jarai ƀư tă aơ rlău 10 năm. Gay rhŏ an năch tâm rơh Lễ 2/9, Yă H’Nach ndrel ăp nuĭh kan răk rao kloh uĕh, n’hanh nchrăp ăp ndơ sa kah bah nuĭh Jarai.

“Tâm ăp nar lễ têh tâm dak, n’hanh khlay lah Tết đăp mpăn 2/9, kônh wa tâm ƀon way nchrăp dŭt âk ndơ sa kah. Mpôl hên nchrăp poăch djărr, poăch sŭr n’hanh du đêt ndơ sa way ơm bah nuĭh Jarai kơt trău pai n’hanh du đêt ndơ sa bah ăp ntil biăp joi tâm mir, tâm bri. Ntĭt nsa kơt trău n’ha bum, piăng dĭng, n’hanh ăp ndơ sa bah ƀăng dơi kônh wa joi tâm  bri. Êng đah ndơ sa bah ƀăng, rnôk wơt năch ri mpôl hên dơi gâm tĭng âk ntil êng êng, dơi wâr đah poăch mô lah gâm trău pai dơi đŏng”.

Ama Kiệt nkoch mpeh ntŭk ntô uĕh Jarai.

Ntŭk sa sa djăr gŭch Plit ta ƀon Têng 1, xă Tân Sơn, bah dih Pleiku, dơi ndâk ƀư nkual neh hvi nklăp 4000m2. Nkual neh dơi ndâk ƀư kơt du jâng gung jêt, đah ăp jay nhih uĕh êng. Du mlâm jay nhih hvi 20-30 m2 tŏng an ăp mpôl năch tât rgum gay ngêt sa ndơ bah yôk bri. Amâ Kiet nkoch:

“Mpôl hên ƀư jay ngêt sa tĭng nău uĕh ndơ sông sa bah nuĭh Jarai. Ta aơ rhŏ an năch ăp ndơ sông sa bah nuĭh Jarai, nĕ lah trău n’ha bum. Way lah n’ha bum mpôl hên wâr đah klŭng djăr, prên tăng n’hanh nkao play m’hung. Tal 2 lah biăp tâm bri gâm nsum đah rêng. Đah piăng dĭng ri sŏk phe m’êt tuch tâm mir. Mpôl hên rwăt phe bah kônh wa, way săch ăp phe kah ngăn. Phe lor rnôk prung mpôl hên trăn tâm dak đêt mông, jêh nĕ hăn tâm bri sreh nkar sĭt trăm phe, ri geh poăch djăr. Djărr dơi rwăt bah kônh wa ta ăp ƀon. Bah ôi ơm, kônh wa djôt, way bah 10-20 mlâm. Aơ lah djăr bah kônh wa mât ta ăp ƀon tâm xă H’bâo, xă Chư Dang Ya. Bôh mrăch lĭt ăp poăch gŭch ri mpôl hên sŏk klô̆ih ta mir, ntop n’ha gir juh nsum đah mrăch, lĭt đah poăch djăr, poăch gŭch”.

Ta jâng gung lah pih. Ta nklang jâng gung geh tơm njuh prêh, lah ntŭk an ƀư nkoch ăp lễ hội way ơm bah nuĭh Jarai, đah ăp nău ƀư kơt tŭr chĭng, njroh xoang ta ŭnh pôi, n’hanh tŭr chĭng uh mboăt n’hôm way ơm.

“Rnôk wơt năch mpôl hên mbra nchrăp bah năp bôk nău kan njroh mprơ, răm rlưn n’hanh năch yơn hôm e đă năch nchăm lor, nĕ lah nău rhŏ an tŭr chĭng, đơn t’rưng, đơn ting ning, njroh xoang wăr ŭnh. Tĭng nău đă bah năch, geh rnôk khân pơng đă mpôl hên mprơ ăp nău mprơ răm mpeh Tây Nguyên gay năch dơi lăp nsum njroh xoang ndrel đah ca sỹ”.

Yă H’Nach nchrăp ăp ndơ sa bah ƀăng bri.

Bah meng nău nkoch nău uĕh ơm bah nuĭh Jarai, rnăk wâl wa Ama Kiệt ta ƀong Têng 1, xă Tân Sơn, bah dih nkual ƀon têh Pleiku lah ntŭk nta an nău kan an âk oh kon ta ntŭk. Nkre, aơ lah ntŭk tăch ăp ndơ yor kônh wa nuĭh Jarai ƀư bah mât rong, tuch tăm mô lah joi tâm mir.

“Jêh rơh srê Covid-19, geh dŭt âk druh ndăm mô geh nău kan. Âk mon jêh nti ma mô dơi joi nău kan, hăn kan ngai ri âk jêr jŏt, mô lah mô hŏ dơi joi nău kan tâm di. Yor rĭ, gâp nta kơl nău kan ăp mon tât ta aơ pah kan gay geh prăk n’hanh geh prăk gay năp tâm nău rêh ăp nar. Du nău tay lah gâp way rwăt djăr an kônh wa, rnôk kônh wa ŭch prăk, ŭch tăch gâp nchrăp rwăt nôk nĕ”.

Bôl knŭng du ntŭk jêt bah rnăk wâl nuĭh Jarai, yơn ăp nău kan ta aơ dôl rgop hun hao nău kan pâl nđaih bah nkual ƀon têh Pleiku n’gor Gia Lai. Tă bah nĕ, rgop an nău kan an nuĭh ƀon lan ta ntŭk, nkre mât ndrăy n’hanh mât nău uĕh bah nuĭh Jarai.

 Nuĭh rlang: Y Sưng Phê Ja