VOV4.M'nông: Gŭ tâm ăp bôk nău kan rƀŏng sĭt mpeh nar nkah ndray nar drô phan Hùng Vương (10/3 âm lịch), Bảo tàng Lịch sử Quốc gia hŏ ƀư bôk nău kan tour “Plơ̆ rơh Hồng Bàng” lĕ ma ăp nău kan joi gĭt rơh rdâk njêng neh dak bah ăp vua Hùng ndrel joi gĭt mpeh ăp nău way tâm  lễ hội bah nuĭh Việt yău. Tâm nar bôk năp ntoh măt, tour “Plơ̆ rơh Hồng Bàng” hŏ ngăch wăch rgum nău mât uănh khlay bah âk nuĭh ƀon lan.  

 Lor bôk năp râng tour “Plơ̆ rơh Hồng Bàng”, nô Phạm Văn Tuấn, nuĭh nti nhih nti Sỹ quan Lục quân 1, Bộ Quốc phòng ndrel ăp băl nti geh rnôk joi gĭt na nê̆ mpeh lịch sử rdâk njêng neh dak n'hanh mât njrăng neh dak bah ăp Vua Hùng tâm ban kơt uănh saơ drăp ndơ khlay neh dak Trống đồng Ngọc Lũ, Mộ thuyền Việt Khê ma nău kan hăn uănh ndơ pla n'hơ:

          “Ma bôk nău kan kơl mpôl hên gĭt jru lơn mpeh lịch sử bah rnoi nuĭh, lah uĕh ăp rơh yău ye hŏ an âk năm khay bun dăp. Bôk nău kan nar lơn ma geh nkô̆ khlay lơn rnôk ƀư di rnôk tâm lam rnoi nuĭh dôl rƀŏng tât nar nkah ndru yău lam dak 10 khay 3."

          Lôch hăn uănh pâl, ăp nuĭh nti nhih nti Sỹ quan Lục quân 1 dơi ntĭm nti, râng joi gĭt nău way ơm gŭ rêh bah nuĭh Việt ơm yău kơt "Peh phe rnăy nkôp bar” (tâm rlong peh phe, gŭm, rseng), nhŭp ka ndŭng tâm yăng rbâng, tŏ ndrang măt gâr kông Ngọc Lũ, ƀư bôk rsău sĭm nkrơ̆ tâm rnôk lễ hội. Ndrel kan nsum râng ăp nău kan rlong joi gĭt đah ăp nuĭh nti nhih nti Sỹ quan lục quân 1, Bộ Quốc phòng, oh Minh, sinh viên năm n'glĕ dŭt nhih nti Đại học Văn Hoá Hà Nội nkoch:

          "Gâp saơ tour dja dŭt uĕh blău, an ăp nuĭh joi gĭt tay mpeh lịch sử, lơn lah tâm ăp nar lễ kơt aơ, njêng luh ndơ pâl rlưn way ơm nkre gay nkah gay ăp băl kơt gâp rlong joi gĭt saơ ăp nău kan kơt peh phe mô lah nhŭp ka ndŭng tâm yăng rbâng gay nkah mpeh tu tơm n'hanh rlău ma nê hôm gĭt tay mpeh ăp ndơ yơm yău hôm geh tâm ndray saơ ta bảo tàng, lơn lah ăp drăp ndơ ơm yău mpêt khlay gưl neh dak kơt gâr kông ngọc lũ"  

          Tĭng wa Nguyễn Thị Định, Groi kruanh jrô kan ntĭm nti nsum mpôl, Bảo tàng lịch sử quốc gia, nău nkre nkoch n'hơ ăp ndơ ơm yău hôm geh kăl e đah ăp nău kan rlong joi gĭt âk mpưm tĭng way bôk nkô̆ lah trong kan uĕh di kơl năch hăn uănh pâl gĭt wât tay n'hanh ŭch rŏng lịch sử bah rnoi nuĭh:

          “Tâm bôk khay 3 âm lịch ri lăp nsum khuh n'gôr đah lam dak rƀŏng sĭt mpeh nar nkah ndray drô phan hùng Vương, Bảo tàng lịch sử quốc gia ƀư ăp tour geh bôk moh "Plơ̆ sĭt rơh Hồng Bàng n'hanh ŭch rŏng bah mpôl hên rnôk ƀư tour dja lah ăp băl nkre râng joi gĭt mpeh bôk nkô̆, nkre rlong joi gĭt ăp nău kan geh tât nkô̆ dja, ŭch rŏng mbra nkah an ăp băl mpeh n'hâm suan bah ăp vua hùng, ăp nuĭh geh n'hâm suan rdâk njêng neh dak n'hanh ntĭm nti nău way ơm "ngêt dak kah gĭt tu tơm", "sa play nkah nuĭh tăm tơm".

          Bah meng ăp nău kan tơm, nuĭh ƀon lan hôm dơi râng ăp nău pâl rlưn way ơm đŏng kơt nsăt rse, têk rse, nsăt ƀao ƀô, pâl chuyền, ô ăn quan; mon uk ma nsưng rvah, rmăn rup Đông hồ, rup yău...ƀư ndơ nkah ndray. Năl ăp nău ring tam uĕh ma tour hăn uănh pâl “Plơ̆ sĭt rơh Hồng Bàng” nsĭt tay, Thượng tá Nguyễn Bá Quốc, Bí thư Đảng uỷ, Chính trị viên tiểu đoàn 1, Nhih nti Sĩ quan Lục quân 1 an gĭt:

“Lah dơn nkoch nti dơm ma si ƀŭt mô lah ma ăp rup gui ri mbra dơi gŭ ta jay, pơk uănh ăp nău lư ma ndơ nkoch trêng mô lah ma si ƀŭt báo ri mpôl hên hôm dơi joi gĭt đŏng yơn ta aơ nkre dơi djăt nkoch mbơh ma ăp rup gui ma ndơ hôm mât ndray nkre dơi rlong joi gĭt ngăn lĕ rngôch ăp nău kan ri nkô̆ khlay lơn ma têh âk lơn n'hanh nklăp mbra an tay ăp nău nkah dŭt n'hâm jru hvi tâm nuih n'hâm cán bộ, tahen bah đơn vị nhih nti.”

          Nkah nar drô phan Hùng Vương lah nar lễ têh bah rnoi nuĭh, lah rnôk gay ntĭm nti nău way ơm “Ngêt dak nkah gĭt tu tơm”, mpơl nuih n'hâm nkah gĭt jru tât ăp Vua Hùng hŏ geh n'hâm suan rdâk njêng neh dak n'hanh ăp nuĭh dâk bôk năp rdâng lơh tay phŭng rlăng lăp pit in neh dak. Lôch nê ăp nuĭh mô rlu kơt nti, tiăr nti nău gĭt blău nuih n'hâm uĕh lŏng gay rhŏ dŏng an rơh rdâk njêng neh dak, di đah n'hâm suan bah ăp rơh kơn nuĭh dăng janh rnoi nuĭh, đah yău ye he bah năp nơh. Bôk nău kan tour “Plơ̆ sĭt tay rơh Hồng Bàng” mbra dơi ƀư tât lĕ nar 11/4 ta Bảo tàng lịch sử Quốc gia./.

Nuĭh rblang: Điểu Thân