“Ơi brah yang, jêh lôch du năm jâk rgănh đah nau kan mir, nar aơ ba hŏ bêng ndrŏng, ndrănh tâm yăng tât nar chŭt tong. He ndrel tâm tâm mâp ta aơ gay ma lah ueh ma brah yang ân ƀon lan nơm du năm mih lăng, piăng ueh, ân mir săk play lay mbôn, ân sur bên ndrung, rpu bêng n’gar. Jă brah yang sĭt ta aơ gay ngêt sa nsum”.

  Tât mông, bu ranh K’Thế tâm ƀon Srê Nhắc, nkuăl têh Đinh Văn, Nkuăl Đinh Văn, nkuăl Lâm Hà, n’gor Lâm Đồng uh nkre gay kuăl jă ăp nŭih tât râng. Ơh nau kuăl jă, nŭih ƀon lan ndrel rgum êp n’gâng njuh tâm ntŭk ƀư ôp brah. Rnôk ăp nŭih tât ăp, bu ranh K’Thế răch:

‘Ơi brah chĭng gong dôl gŭ nde tâm ăp gong me, gong jê̆, gong têh. Ƀon lan hên geh ndơ sa ndơ têm, blau djăt, blau kơt tĭng nau tâm di. Dăn lah ueh brah yang ndrel dăn jă brah yang sĭt ngêt sa nsum ma ƀon lan. Nar aơ ƀon hên leo ndơ ôp brah, geh djăr geh ndrănh. Dăn brah yang ân hên njur chĭng, tur ân nteh tât lam yôk, lam ƀon, ân nuih n’hâm ƀon lan ueh m’ak, ân ngêt sa ueh”.

 Lôch nau răch, bu ranh lăch djăr nkuăng, ndrel nchrăp đŏng tâm nê lah ka kro, boh, phe, piăng m’êt, play. Nau ôp brah gay njur chĭng gay ma dŏng ndrel răch dăn ân ăp nŭih tâm nar nê geh ueh lăng, săk dăng lăng ngăch, lap. Jêh nê lah njur chĭng ndrel ndŏ ân 6 bu ndăm gay ma tur nau chĭng “Gung me gung ma”, gay ma rhơn vơt năch. Lôch ƀư ôp brah njur chĭng, rnôk nê bu ur chĭng ntơm ƀư ngêt sa. Bu ranh K’Thế mbơh:

 ‘Ntă dê rnoi ma bu ranh ƀon mô lah tâm ƀon nê geh chĭng ri huêng bah brah chĭng păng gŭ tâm nê. Nau ƀư ôp brah njur chĭng lah gay ma dăn ngăn ma brah yang, jă brah yang ndrel hăn rânh ndrel ngêt sa nsum ma ƀon lan, geh ƀư tâm ăp rnôk tuch ba mô lah ndâk ngih, gŭ ur sŏk sai oh kon...Ăp nau chĭng kŏ dăn ma brah yang jêh ri ma hên janh tur chĭng”.

 Ngoai tâm ăp nau ueh ngăn tâm rnôk ƀư brah ôp chĭng lah rlong tur chĭng. Tâm rnôk dôl ma ngêt ndrănh yăng, ăp bu ndăm rlong tur chĭng, tă dê nŭih geh nau blau tur chĭng ngăn, jă bu êng tâm rlong, ntă dê nŭih mô blau ri đah nê mô geh nau dơi. Rnôk nê bu rlong jŏ ngăn, bu ngêt ndrănh yăng, tur chĭng jŏ đŏng. Nô Kra Jan K’Rông, tâm ƀon Bồ Liêng, nkuăl têh Đinh Văn, nkuăl Lâm Hà nkoch, chĭng gong ndrel nau ƀư ngêt sa lah ăp nau mô dơi mô geh tâm nau rêh rnoi K’ho:

‘Nau kơl an bah Đảng ndrel Ngih dak hŏ ntrŭt đă kônh wa nơm nar lơn ma mât ân ueh nau vay ơm bah nơm tă bah kăl e. Nê lah ăp nau khlay, ndơ mô dơi mô geh tâm nuih n’hâm bah ƀon lan hên”.

Tâm chĭng gong geh huêng, rnoi K’ho mât, mô dơi dŏng lă lêng. Wa K’El, tâm Tổ dân phố Ryông srê, nkuăl têh Đinh Văn, nkuăl Lâm Hà, n’gor Lâm Đồng nkoch: Chĭng gong geh đah ăp nau ơm geh tât nau rêh ndrel ăp nau khlay bah ƀon lan:

 ‘Chĭng bah rnoi K’ho ri geh 6 mlâm, geh bor ri 8 mlâm đŏng. Tâm bor nê ri dơi tur âk nau ngăn, dŏng tâm ăp nar rƀŭn rgum, ngêt sa têh, kơt ah Nsĭt rhe, njŭn sông ndrel ăp nau vay êng êng khlay kŏ dŏng chĭng đŏng. Chĭng lah du ntil ndơ khlay ngăn bah rnoi K’ho”.

Tâm ăp nau vay bah rnoi K’ho, nau ôp brah chĭng lah nau pơk bôk ân ăp nau dăn brah yang ân njur chĭng gay dŏng. Nê kŏ lah nau vay gay ma pơk trong ân ăp nau ueh ăp nau nteh ndrel ăp ntil jêh nê. Nau rêh nar lơn hun hao, kônh wa uănh khlay nau vay ndrel mât nau ơm, nau ueh bah nơm. Tâm nê, nau ôp brah chĭng lah du nau ueh, geh rnoi K’ho mât bah tâm âk vay rnôk aơ./.