Bu ranh ƀon K’Brệp, rnoi K’Ho ta thôn Kala Kròt, xã Bảo Thuận, n’gor Lâm Đồng mô dơn hăn lor bôk năp tâm nău kan mir ba, păng hôm lah nuĭh gĭt blău, trêng nti tay nău kan tanh sah khăt khiău bah nuĭh K’Ho. Nkre, păng nsrôih rgop khlay tâm rnôk rdâk njêng ƀon lan mhe ta ntŭk đŏng.  

Deh luh n’hanh têh jêng bah meng dak me Dà Rơyồng rngân uĕh bah jâng yôk Brah Yàng têh hvi, wa K’Brệp (75 năm deh) dơi nuĭh ƀon lan Kala Kròt dêh rŏng ƀư bu ranh ƀon. Păng hôm lah nuĭh hăr blău ti tanh sah khăt khiău ntoh lư bah nuĭh K’ho.

Ăp dông sah, nĭr rang, bah mpang ti hăr blău bah păng tanh hŏ mpơl n’grêh rêh, nâp n’hanh uĕh reh. Mô dơn tanh dŏng an tâm rnăk wâl, ăp ndơ geh ƀư dơi kônh wa ŭch kơnh. Năm e nơh, n’gâng kan ta ntŭk pơk jrô trêng nti tanh tôk an nuĭh K’Ho, wa K’Brệp ntĭm nti na nê̆ an bơi 100 nuĭh. Păng an gĭt:

“Săk gâp nơm tanh ăp ntil ndơ bah dông, sah, khiău, nĭr rang…,Rnôk geh nuĭh ŭch joi rvăt ri he tăch  tĭng nău ŭch bah  khân păng gay ntop geh tay wăng sa, rgâl geh nău rêh. Gay mât ndray nău kan tanh tôk, aƀaơ, n’gâng kan ta ntŭk hŏ ntoh măt mpôl tanh tôk gay hun hao lam ăp ntil ndơ, kơt nti nsum đah ăp nău gĭt blău gay tanh jêng ăp ndơ uĕh di đah nău ŭch geh bah nuĭh dŏng, joi trong luh an ndơ geh ƀư đah ăp rnoh khlay tâm di”.

Mô dơn lah nuĭh hăr blău tanh tôk, wa K’ Brệp hôm lah nuĭh ntĭt leo lor hun hao wăng  sa đŏng. Lah nuĭh lor bôk năp tâm thôn nănh rgâl nău mĭn tuch tăm, păng ntuh kơl mât chăm 5 ha cà phê ntil mhe. Aƀaơ, ăp năm, rnăk păng klêh geh 12 tấn cà phê rnglay. Rlău ma nê hôm nsĭt geh bah play sầu riêng n’hanh bơ tăm rlŭ tâm mir cà phê đŏng. 2 ha ba lŏ an rek geh rlău 8 tấn ba. Saơ geh nău dơi, âk rnăk tâm thôn kơt tĭng ƀư mbrơi. Wa K’Brao, ta thôn Kala Kròt an gĭt đŏng:

“Bu ranh ƀon K’Brệp lah nuĭh dâk hăn leo lor bôk năp tâm pah kan jan sa. Tâm nău tăm n’hanh mât chăm cà phê, păng lah nuĭh dŏng khoa học kỹ thuật tâm nău kan tuch tăm lor bôk năp kơt phân poh, puh dak si ndrŭng, tŏ dak…Nơm geh kơt nê̆, mir cà phê rnăk păng săk geh âk. Tâm nău tăm ba lŏ tâm ban kơt nê đŏng, păng lah nuĭh ƀư mir ba jăp blău jêng rnoh âk geh ba âk ta thôn Kala Kròt. Bu ranh ƀon lah du hê nuĭh kônh wa tâm ƀon lan dŭt dêh rŏng ntơm  bah nău rêh, mbơh ngơi tât wăng sa”.

Tĭng ƀư bôk nău kan rdâk njêng ƀon lan mhe, che K’ Brệp lah nuĭh lor bôk năp ŭch rong êng neh ƀư trong. Rnăk păng hŏ rong an rlău 300 mét vuông neh, rơih mpêr, sreh tơm cà phê gay pơk hvi trong lăp tâm thôn. Păng rong an rlău 1000 mét vuông neh mir gay pơk hvi trong lăp tâm mir đŏng. Kơt tĭng che, lĕ ma thôn ndrel nsum suan du nuih n’hâm ƀư đŏng kơt: nuĭh rong neh, nuĭh rgop nar luh kan, nuĭh kơl lŭ choih rdâk njêng ntŭk tâm thôn ƀon. Lĕ ma thôn hŏ rgop rlău 600 rkeh prăk gay ƀư trong bê tông, ƀư trong dak kloh uĕh.

Wa K’Brẻo ta thôn Kala Kròt an gĭt: bah nău nsing nơm bah bu ranh ƀon ma tât aƀaơ lam trong ƀon tâm thôn srăch uĕh da dê:  

“Ntơm nơh, gung trong rsong hăn ta thôn bŏk mbĭr, khay wai n’huk ngo, rsong hăn jêr jŏt, lơn  lah nchuăn rdeng ndơ tuch tăm bah mir sĭt tât jay. Aƀaơ, rnôk geh trong bê tông kloh uĕh nău rdeng cà phê, bơ, sầu riêng dŭt dơh ngăch, ndơ tuch tăm bah mir ba dơi rdeng n’hanh tăch ngăch lơn”.

Rlău ma rgŏ jă rdâk njêng ƀon lan mhe, che K’ Brệp hôm nsrôih nkoch trêng trong nchrăp, trong kơl bah Ngih dak; râng nkra nău tâm rkeh tâm ƀon lan. Wa K’Hữu cán bộ xã Bảo Thuận, n’gor Lâm Đồng an gĭt, bu ranh ƀon hŏ rgop khlay kơl n’gâng kan ta ntŭk mât nâp rnă njrăng, rdâk njêng nău rêh văn hóa:

“Bu ranh ƀon K’Brệp lah nuĭh dŭt geh nău nsing nơm n’hanh geh dŭt âk nău ring tam tâm ƀon lan. Mpeh nkô̆  nău rgŏ jă kônh wa tĭng ƀư trong nchrăp rdâk njêng ƀon  lan mhe, păng geh nău tam ngơi, hăn dâk leo lor ƀư trong, rdâk njêng trong dak kloh uĕh, nơm geh kơt nê muh măt thôn ƀon nar lơn ma srăch uĕh, n’glah gung meng trong ƀon mprĭp uĕh. Păng hôm râng tâm Hội đồng giáo xứ Kala đah nău ƀư lah kruanh Hội đồng, nău tam ngơi bah păng ta nhih brah dơh trêng nti tât kônh wa kon chroh jêng trong nchrăp rdâk njêng ƀon lan mhe, rdâk njêng nău rêh ta thôn dơi ƀư uĕh n’hanh hŏ geh nău dơi ngăn”.

Ma nău nsing nơm, hăr blău n’hanh lĕ nuih n’hâm bah he, che K’ Brệp dôl mât ndray n’hanh ntik n’hao nău kan way ơm bah rnoi K’Ho, n’hanh rgop ƀư rgâl muh măt ƀon lan Kala Kròt. Păng di lah ntŭk nsing nuih n’hâm, lah nuĭh ntĭt leo lor chrat ang gay kon său kơt tĭng jêng njăr trong rdâk njêng ƀon tơm nar lơn ma hơm răm, uĕh mƀak.