VOV4. M’nông: Bol mhe dơi an ƀư, ndrĭ yơn trong leo ƀư mât jĭl bêk rvoanh sŏk nke lô n'hanh deh kon ta nkuâl Mang Yang, n'gor Gia Lai hŏ nsĭt tay ăp nău dơi bôk năp dŭt uĕh. Trong leo ƀư dja hôm kơl nuĭh ƀon lan, lơn lah ăp rnăk ƀon lan rnoi mpôl đê̆ rgâl trong kan tuch tăm mât rong hun hao wăng sa, rgâl geh nău rêh n'hanh n'hao săk geh nău rêh.

Wa Vũ Văn Dân, tổ dân phố 4, thị trấn Kon Dỡng lah ngoăy tâm ăp rnăk tâm săk dơi nkuâl Mang Yang, n'gor Gia Lai ntop kơl mât jĭl bêk rvoanh. Wa Dân an gĭt, păng dơi pă an 2 mblâm jĭl bêk rvoanh dăm n'hanh 1 mblâm jĭl bêk rvoanh me ntơm bah khay 6 năm e nơh gay mât rong. Dơi geh nău ntop kơl bah cán bộ chuyên môn ndrel đah nău tă ơm gĭt kơt nti tâm rnôk mât chăm, tât aƀaơ jĭl mât hao rơ̆ jêng uĕh, jĭl ntơm deh kon n'hanh an geh nke lô tăch bôk năp:

“Mât chăm jĭl dja dơh đŏng, păng sa pih ja, lha play đŭr, lha sŭng jĭl sa da dê đŏng. Ăp ôi ri he ân roh nklăp n'gul mông mât chăm dơm. Hôm tâm khay mih pih ja hao jêng uĕh ri roh nklăp 10 mnĭt koh pih nklăch tâm ndrung lah păng gŭ sa du nar măng dơm. Hôm rnôk luh nke lô ri he an sa tay prit, mbo, bum blang jêng nke lô hao jong lơn. Gâp ŭch rŏng pơk hvi tay gay ƀư wăng sa an đăp mpăn đŏng”

Bol mhe an mât, yơn ăp rnăk hŏ geh nke lô jĭl koh tăch n'hanh hŏ geh jĭl deh kon. Rnăk nô Nông Văn Đạo, gŭ ta ƀon Đê Bơ Tưk, xã Đăk Jơ Ta, nkuâl Mang Yang lah du nău ntĭt. Tĭng nô Đạo, ntơm nơh rnăk păng tă mât be, ndrôk ndrĭ yơn ndơ mât way geh kop ji, rnoh khlay rgoh n'gơ. Nô Đạo năl lah mât jĭl bêk rvoanh bôk năp nsĭt geh wăng sa âk, tâm di đah nău dơi mât rong bah nuĭh ƀon lan, lơn lah tâm nkual rnoi mpôl đê̆ n'hanh mbra jêng ntŭk nde joi sa jŏ jong an kônh wa gay đăp mpăn nău rêh.

        “Rnăk lah uĕh Ngih dak hŏ uănh khlay nsĭt trong leo mât jĭl bêk rvoanh dja jŭr an kônh wa. Bôk năp mpôl hên saơ dŭt geh nău tam, kơt rnăk gâp aơ mât mô hŏ tât du năm hŏ tăch geh 2 tơ̆ nke lô n'hanh deh tay hôm du mblâm jĭl kon đŏng. Ta năp măt gâp saơ trong leo ƀư dja ngăn ngăn n'hanh gâp dôl ŭch jêh aơ tay pơk hvi tay, mât rơ̆ tay gay ntĭt leo an lĕ rngôch kônh wa ta aơ kơt nti, ƀư tĭng.

Wa Trần Nam Danh, Kruanh jrô kan wăng sa- ndơ dŏng ntung trong nkuâl Mang Yang, n'gor Gia Lai an gĭt, trong leo ƀư mât jĭl bêk rvoanh dơi ƀư bah tơm prăk n'gâng kan khoa học công nghệ bah nkuâl n'hanh du gâl tơm prăk bah nuĭh ƀon lan. Đah 5 rnăk geh nău rêh jêr jŏt dơi ntop kơl, trong leo ƀư bôk năp hŏ nsĭt geh nău dơi, kơl ƀon lan njêng luh tơm joi geh nău rêh n'hanh geh nău rêh mbơm oi bah nău mât jĭl bêk rvoanh.

“Rnôk tĭng ƀư trong nchrăp kan dja ri mpôl hên hŏ tâm rgop đah ăp hợp tác xã gay tât rnôk geh nke lô ri rvăt an nuĭh ƀon lan đăp mpăn mât rong. N'hanh tâm bah ri aơ nơh ri nuĭh ƀon lan hŏ tĭng ƀư trong leo mât nsĭt geh ntil jêng kônh wa dŭt rhơn nđơr n'hanh đă pơk hvi trong leo ƀư dja nar lơn ma rơ̆ jêng âk ta nkuâl".

Đah ăp nău nsĭt geh bôk năp ma trong leo ƀư mât jĭl bêk rvoanh sŏk nke lô n'hanh deh kon nsĭt tay hŏ kơl an nuĭh ƀon lan ta nkuâl Mang Yang rgâl trong kan tuch tăm mât rong; lơn lah tâm nkual ƀon lan rnoi mpôl đê̆. Lôch nê, rgop ntrôl ngăch tâm rnôk jut jăng ji ngot n'hŭch ach o ta du nkuâl ma nău rêh bah kônh wa hôm âk jêr jŏt kơt Mang Yang, n'gor Gia Lai.

Nuĭh rblang: Điểu Thân