VOV4.M’nông – Nar 19/12, ta nkual ƀon têh Pleiku, n’gor Gia Lai, N’gâng kan Tuch tăm mât rong n’hanh hun hao ƀon lan ndrel ăp n’gor Tây Nguyên ƀư “Rgum nchră ntrŭt rmôt nkra njêng nkual tăm gay n’hao n’hanh hun hao nâp nâl nău kan ndơ cà phê Tây Nguyên”. Dak he aƀaơ geh bơi 700.000 ha cà phê, rnoh ndơ geh rlău 1,76 rkeh tấn/năm, lah dak tăch n’gluh cà phê tal 2 lam ntŭr neh. Tâm nĕ, 92% rnoh neh n’hanh 95% rnoh ndơ dơi nkra njêng ta ăp n’gor Tây Nguyên. Ta rgum nchră, ăp nuĭh ntoh măt đă ngih dak n’hanh n’gâng kan nău kan an ƀư trong ntop kơl doanh nghiệp ndâk njêng moh ndơ n’hanh kơp dơn uĕh kah cà phê lam ntŭr neh, lơn lah ta ăp ntŭk tăch jêr jŏt kơt EU, Mỹ, Nhật Bản.

Kruanh n’gâng kan Lê Minh Hoan ntoh ngơi ta rgum nchră.

Kruanh n’gâng kan tuch tăm mât rong n’hanh hun hao ƀon lan Lê Minh Hoan an gĭt, êp tât, N’gâng kan mbra ndâk njêng du đêt nău rgop tâm nchră êng mpeh tăch n’gluh ndơ lŏ mir ta ntŭk tăch Châu Âu, gay mĭn trong kan ndơ̆ cà phê n’hanh ăp ndơ lŏ mir Việt Nam tâm ăp trong tâm pă têh. Ăp doanh nghiệp an ndâk njêng tâm rgop ăp nuĭh tăch n’gluh cà phê gay gĭt nău ŭch, djăt nău rgop n’hanh nău ntrŭnh pháp lý, mpêr n’gar kỹ thuật bah ăp ntŭk tăch.

Nuĭh rblang: Y Sưng Phê Ja