VOV4.M'nông: Đah nău mĭn ân mât ndray n'hanh trêng nti tay nău kan cheh tanh an rơh kơn mom ndăm bah kơi, wa H’Blong Knul, ta xã Ea Trul, nkuâl Krông Bông, n'gor Dak Lak hŏ nsrôih râng ăp jrô trêng nti nău kan an druh ndăm dơi ƀư ta ntŭk. Wa H'Blong cheh tanh êng ăp blah bok ao dŏng tâm rnăk wâl he n'hanh ƀư tĭng nău bu ntĭnh đă ƀư lor gay tiăr nti hăr ti kan n'hanh kơi ntop geh wăng sa.

  Ăp nar an gŭ srang ngai êng lam rêh jêng kon nuĭh gay njrăng n'gang nuh srê Covid-19, nău rsong hăn n'hanh luh mir jan ba bah rnăk geh tât khuch kêng yuh H Giang Knul ta buôn Ja, xã Ea Trul, nkuâl Krông Bông, n'gor Dak Lak ntêm an âk mông nar gay cheh tanh lôch du blah bok ao. Yuh H Giang an gĭt, cheh tanh lah du nău kan ndăn ƀư rnôk dơh ru kơl ntop geh tay wăng sa. Âk năm aơ, ăp ndơ geh ƀư cheh tanh tâm rnăk dơi âk nuĭh gĭt tât n'hanh ntĭnh đă ƀư. Yor kơt nê̆, lĕ 3 oh yuh gĭt cheh tanh da dê n'hanh cheh tanh jêng âk ntil bok ao ndơ nsoh nuĭh Rđe.

Geh mê̆ gĭt cheh tanh jêng ntĭm an gâp kơt nti. Lor bôk năp nti jêr đŏng, yơn mbrơi mbrơi hăr blău, kơt gĭt drăng rse brai, gĭt cheh tanh, gĭt tanh rup ndrang tĭng nău way bah nuĭh Rđe.

Yuh H Giang lah kon bu ur tâl 3 bah wa H’Blong Knul (way kuăl lah aduôn Jim). Ta buôn Ja tâm ban kơt ta nkuâl Krông Bông, wa H’Blong dơi gĭt tât lah nuĭh bu ranh gĭt blău cheh tanh, ƀư jêng luh âk blah bok ao uĕh. Ndrel đah ăp bok nah, bok bă, mbân ao, troi, wa H’Blong hôm dơi đă ƀư bok lăk nsưng mpan, bok yông nkrơ̆ an ăp ntŭk tăch ndơ, khách sạn tâm n'hanh bah dih n'gor đŏng. Wa H’Blong nkoch, ăp năm bah năp nơh, păng geh âk nuĭh ntĭnh đă ƀư jêng ân đă oh kon hăn kơl cheh tanh mơ năn gay jao an năch, năm aơ tă bah nô nău nuh srê rnoh âk nuĭh ntĭnh đă lor hŭch đêt. Bol ma kơt nê̆, ăp nar rlău aơ, păng hôm ntêm an âk mông nar gŭ cheh tanh ăp mbân ao ntêm an lor đŏng. Nê kơt lah nău way bên, lah trong ƀư gay hăr nti kan n'hanh măt uĕh sŏng di lơn.

Gâp gĭt cheh tanh bah 15 năm deh, an tât aƀaơ rnôk hŏ geh kon său ri hŏ dŭt ngăch hăr blău ngăn hôm n'hanh ŭch rŏng trêng nti tay gay mât ndray tay ăp nău uĕh blău văn hóa bah u che an tay bah kơi, lơn lah nău kan cheh tanh bok brai dja.

 Tĭng wa Châu Phan, Groi kruanh jrô kan Văn hóa Thông tin nkuâl Krông Bông, n'gor Dak Lak, ta xã Ea Trul n'hanh ăp xã kiău ma bah nkuâl Krông Bông, ăp năm dăch aơ nar lơn ma âk oh yuh gĭt cheh tanh. Geh dơi nău dja lah nơm geh nău rgop bah ăp nuĭh bu ranh gĭt blău kơt wa H’Blong Knul, hŏ dơi trêng nti na nê̆ an rơh mom ndăm.

Tâm bah ri aơ nơh, wa H’Blong hŏ mô sŭch lach ntĭm nti tay an rlău 100 bu ur ta ăp xã gĭt cheh tanh hăr blău.

Wa H’Blong Knul nkre râng nău kan văn hoá way ơm, pơk ăp jrô njroh mprơ, tâm pât ay – ray. Rlău ma nê ri păng râng âk jrô nti cheh tanh tă bah ntŭk rgum ntĭm nti nău kan an druh ndăm n'gor Dak Lak ƀư ta xã Ea Trul đŏng kơt buôn Cư Mil, buôn Ja, buôn Plum, buôn Băng Cung n'hanh buôn Mnang Dơng ta xã Yang Mao gay trêng nti tay nău kan cheh tanh.

Wa H’Blong nkoch, nău kan way ơm ri ân mât ndray n'hanh trêng nti tay an rơh mom ndăm bah kơi, gay jêh aơ tay, rnoi nuĭh Rđe he mô roh săk tơm văn hoá. Yor kơt nê̆, tâm bah ri aơ nơh, mô dơn trêng nti tay an ăp kônh wa ma hôm nsrôih trêng nti tay an âk nuĭh ŭch rŏng n'hanh kơt nti cheh tanh đŏng.

Đah nău nsrôih, mô sŭch lach tâm nău trêng nti, wa H’Blong hŏ dơn geh âk ndơ nkhôm rnê bah ăp gưl, tâm ban kơt âk ndơ nkhôm tâm ăp rơh tâm rlong têh, jê̆ ta n'gor. Păng hôm rhơn n'hao êng săk dơi Kruanh dak ntăm an săk ntơ “Nghệ nhân Ưu tú” năm 2019 yor hŏ geh n'hâm suan rong an ngăch prăl tâm nău mât ndray n'hanh mpư n'hao uĕh ăp drăp ndơ ơm yău ntlơi an tay văn hoá mô mpơl săk bah rnoi nuĭh he nơm.

Nuĭh rblang: Điểu Thân