VOV4.M’nông: Rƀŭn nchră Văn hóa lam dak mbơh ƀư Nghị quyết Đại hội Đảng lam dak rơh tal 13 bah Bộ Chính trị, Ban Bí thư ƀư dơi ŭch kơt du “rƀŭn nchră Diên Hồng mpeh văn hóa bah Đảng” nkre dơi ƀư ta Hà Nội. Ta rƀŭn nchră, ăp đại biểu lĕ rgum tâm nchră mpeh nău ƀư, mbơh ƀư tĭng Trong kan văn hóa tât năm 2030, nkre ƀư kloh ăp nău mpeh lý luận n’hanh thực tiễn bah văn hóa hun hao ngăch, nâp nâl neh dak; joi trong mkra na nê̆, tâm di gay rgâl uĕh tâm hun hao văn hóa, kon nuĭh Việt Nam.

Nău mbơh ta rƀŭn nkoch kloh: Văn hoá Việt Nam lah nău geh rbăn năm pah kan, mĭn ƀư mhe, dun n’gang dŭt n’hâm ndâk njêng neh dak n’hanh mât neh dak, lah săk rnglăy tâm nđŭr n’hanh rgum djôt nău uĕh bah âk nău uĕh blău lam ntŭr neh gay mô rlu lôch uĕh an nơm. Jêh 35 năm rgâl mhe neh dak, ăp rơh kơn kon nuĭh uănh tât ntĭm nti kon nuĭh lĕ rngôch bah hôm e jêt, ta gưl nti; tâm rgop ntĭm rplay sam ƀŭt, ntĭm kon nuĭh, ntĭm nău blău. Ntoh ngơi ta rƀŭn nchră, Kruanh N’gâng kan Văn hoá Thể thao n’hanh Pâl nđaih Nguuyễn Văn Hùng mĭn lah: Ăp nău khlay nău rêh way ơm dơi mât, ƀư uĕh lơn, rgâl mhe tĭng trong tâm di đah jâng wăng sa ntŭk tăch rgâl, rgum lăp lam ntŭr neh. Âk drăp ndơ uĕh dơi rnê rhơn. Drăp ndơ uĕh blău rnoi mpôl đêt dơi uănh tât, mât ndrăy n’hanh mât uĕh, ngăn lah nău kan mât ndrăy nău uĕh blău ăp rnoi mpôl đêt.

          “Tâm trong luh bah văn hóa Việt Nam bah kơi 35 năm rgâl mhe an saơ, nău wât đah văn hóa, rêh jêng, kon nuĭh nar lơ lam hvi, jru lơn. Nău mĭn n’hanh nău rêh-nău khlay bah văn hóa lĕ geh âk nău rgâl uĕh; trong nău kơl pháp luật mpeh văn hóa dơi jêh, nta an nuĭh ƀon lan râng dŭt n’hâm tâm nău ƀư mĭn ƀư mhe n’hanh dŏng văn hóa... Nău ngăn lĕ saơ, ăp rnôk neh dak jêr jŏt ri ăp nău khlay văn hóa uĕh lăng bah rnoi mpôl dơi rdâk hao n’hanh mât uĕh; nuih n’hâm rŏng dak, nuih n’hâm tâm yô̆, tâm kơl, rêh geh nkô̆, geh nău rŏng, nsĭt uĕh tay văn hóa Việt Nam lơ ma ntơr ang”.

Lam ntŭk rƀŭn nchră.

          Ta rƀŭn nchră, ntoh măt kruanh Nkual ƀon têh Hà Nội; n’gor Thừa Thiên Huế n’hanh n’gor An Giang lĕ nkoch ăp nău săk rnglăy dơi geh n’hanh nău rhoăt blău mât uĕh nău khlay văn hóa, tâm ndâk njêng n’hanh hun hao wăng sa-rêh jêng. Ntoh măt ăp nuĭh gĭt blău, khoa học n’hanh văn nghệ sỹ lĕ lah rjăp văn hóa-kon nuĭh nkô̆ nău tŏng ăp hun hao nâp nâl bah Việt Nam. Giáo sư, Tiến sỹ Khao học Vũ Minh Giang, Kruanh Hội đồng Khoa học n’hanh Đạo tạo, Đại học Quốc gia Hà Nội lah rjăp nău ntrŭnh lôch uĕh tâm nău kan hun hao neh dak tât uĕh lăng lah rdâk hao nău ŭch rnoi mpôl. Nău ŭch mbra jêng tât nsing nơm n’hanh dơi rgâl âk nău dơi, soan dăng:

          “Trong mkra khlay bôk năp lah rgâl mhe nău wât du trong uĕh. Lor lah gĭt jru nău mĭn êng văn hóa mô di lah du nău ƀư he an wât văn hóa n’gâng tơm nuih n’hâm bah kon nuĭh lah n’gâng tơm bah rnoi mpôl. Tâm rơh aƀaơ hin văn hóa mô knŭng lah drăp ndơ gay he mât prăp gay he uănh ryơk gay he ntô̆ n’hao ma an dơi uănh soan dăng bah neh dak gay dơi pơk hvi kan ndrel n’hanh tâm rlong sŏng dăng ta lam ntŭr neh”.

          Ntoh ngơi ta Rƀŭn nchră Groi Thủ tướng Vũ Đức Đam lah rjăp, nău mbơh ƀư trong kan văn hóa tât năm 2030 an rdâk hao nău ŭch lam ƀon lan, nta an gay mât uĕh mĭn ƀư mhe, soan dăng lam ƀon lan gay hun hao ngăch n’hanh nâp nâl. Ŭch dơi ƀư nău aơ, ăp nuĭh ƀư văn hóa an ntoh lư ngăn đah văn hóa nău mĭn n’hanh nău rêh:

          “Ăp nuĭh dơi rnê uĕh, ndrŏng, nti âk mô dơi saơ ntrŭt nsôr đah geh văn hóa. Gâp dŭt ŭch ăp gưl ăp nău kan, uănh khlay tât văn hóa. An văn hóa âk mông nar, âk nuĭh lơn. Gay n’hao nău khlay rnoi mpôl Việt Nam. He mpôn, yơn ntop tay ntô̆ n’hao, ryơk rnoi mpôl. He mbra dơi ndâk njêng, hun hao neh dak hun hao sâm ndrŏng n’hanh văn hiến Việt Nam ntơr ang, nglăp tĭng tâm nău uĕh blău kon nuĭh”.

Kruanh Ban Tuyên giáo Trung ương Nguyễn Trọng Nghĩa ntoh ngơi.

          Bah 6 nău nchih blău ơm dơi rhoăt luh, Rƀŭn nchră văn hóa lam dak tâm ban ŭch nău rƀŏng, trong nchrŏng n’hanh trong mkra khlay gay ndâk njêng n’hanh mât uĕh nău khlay văn hóa n’hanh kon nuĭh Việt Nam hun hao lĕ rngôch, rƀŏng tât ngăn ngên-rmêh rmên-uĕh, gĭt lăp nuih n’hâm rnoi mpôl, ƀon lan ƀư tơm, khoa học n’hanh kon nuĭh gĭt blău. Bí thư trung ương Đảng, Kruanh Ban Tuyên giáo Trung ương Nguyễn Trọng Nghĩa nkoch kloh:

          “Rgum gŭ mĭn njêng, uănh tay n’hanh mbơh ƀư ndâk njêng nău khlay ngih dak, trong khlay văn hóa, trong khlay kon nuĭh Việt Nam hăn ndrel đah mât ndrăy, mât uĕh nău khlay rnăk wâl Việt nam tâm rơh mhe. Mât uănh ndâk njêng kon nuĭh Việt Nam hun hao lĕ rngôch, uănh khlay ntĭm nti nuih n’hâm rŏng dak, nuih n’hâm ntô̆ n’hao rnoi mpôl, nău mĭn, nău rêh, trong ƀư, nuih n’hâm. Hăn ndrel ndâk njêng, tiăr nti nău rêh đah ƀư tĭng nău dơi kon nuĭh, nău dơi n’hanh nău kan uĕh bah nuĭh ƀon lan./.

          Nuĭh rblang: Y Sưng Phê Ja