VOV4.M’nông - Trău buh ntô prit gâm đah play lhŭng n’hanh ƀăng srat lah ngoăy tâm ăp ndơ sa săk kah mha êng bah nuĭh Bu Nong. Gâm nsum đah ăp ntil ndơ ntôn lah tâm rdil yơn nuĭh Bu Nong hôm gâm jêng du ntil trău ƀô kah mhe êng n’hanh sĭt dăng an n’hâm suan.

Buh prit lah ngoay tâm âk ndơ chĕ tâm nău gâm sa kah bah nuĭh Bunong

Aƀaơ, tâm nău rêh bah nuĭh Bunong hôm e bên, ŭch gâm trău đah dak buh. Lơn lah buh su bah ăp ntil ntô prit dŭm ih kro. Rlău ma ntô prit, ndơ sa mô dơi mô geh 2 ntil ndơ geh play mbŭng n’hanh ƀăng srat dơi gâm đah nting sŭr. Play mbŭng an săch ăp play lĭt mô lah dŭm ing. Play mbŭng dơi sĭl ntô, prăch n’hơ di sa, rao an kloh rtăk. Ƀăng srah bah nuĭh Bunong way dơi trăm dŭt jŏ, srat hô. Yor nê, rnôk gâm trău aơ, ƀăng srat an dơi păt dak gay bah oi srat. Nuĭh Bunong sŏk dak buh, jêh nĕ jăng buh mô lah ăp ndơ trih đah bŭnh gay jăng lơi nja buh. Dak buh jêh trih way dak êr mô lah guh tĭng rnoh buh trăm tâm dak bôk năp.

Nuĭh Bunong an lah, dak buh ntô prit hôm kơl ăp ndơ êng tâm ndơ sa ngăch sĭn bak, lêk ngăch n’hanh n’glĕ dŭt lah uănh kah bôh ƀot ngŏt. Bah năp đaơ, nuĭh Bunong way dŏng buh gay trih dak tăng bôh gay gâm ndơn bôh. Nar aơ, nuĭh Bnong rlău ma dŏng buh ƀư tăng lơn lah an ndơ sa ri hôm ntop tay du đêt ntil ndơ chĕ êng kơt bôh, ƀŏt ngŏt, hạt nêm. Đah ndơ trău buh ntô prit gâm đah play mbŭng n’hanh ƀăng srat, nuĭh Bunong hôm juh bôh mrăch gay ntop kah tay. Du đêt bôh, ƀŏt ngŏt n’hanh mrăch jrai juh hăch jêh nĕ chĕ tâm trău. Wa ri nuĭh Bunong mbra dŏng âk mrăch tâm ndơ sa aơ.

Trău buh ntô prit đah play mbŭng n’hanh ƀăng srat bah nuĭh Bunong

Đah nuĭh Bunong, ndơ sa aơ an geh ƀô kah nhuyên r’ên, ƀlĭt mư kah. Nting dơi nkret bak jêng njŭng n’hanh hăng hăng, srat srat n’hanh tăng tăng yơn mô hô. Ndơ sa dơi gâm bah buh ntô prit kro lah ndơ sa kah, uĕh an săk soan way ơm bah nuĭh Bunong ta n’gor Dak Nông.

Nuĭh  rblang: Y Sưng Phê Ja