VOV4.Mnông- Mhe aơ, đah ăp njuat hăn têh tâm trong kan công nghệ thông tin, keh mbrô gay mât ndray drăp ndơ văn hoá lah trong ƀư dơi lĕ ma ăp nhih pah kan ngih dak n'hanh mpôl kan êng bah dih ngih dak gân djăng đah ăp rnoh khlay way ơm dŏng. Rdâk njêng ntŭk mât prăp nău lư nsum tâm trong kan văn hoá lah ngoăy tâm ăp rnoh tât dơi rƀŏng tât rnôk an ƀư trong nchrăp kan mbrô 6 "Mât ndray, mpư n'hao uĕh rnoh khlay văn hoá way ơm uĕh lăng bah ăp rnoi mpôl đê̆ nkre đah hun hao pâl nđaih, mpeh bôk nău kan rnoh ŭch tât kan gưl neh dak hun hao wăng sa rêh jêng kon nuĭh nkual rnoi mpôl đê̆.

N'gor Thái Nguyên dơi gĭt tât lah mpông rlong tâm rsong tăch rgâl wăng sa rêh jêng kon nuĭh đah nkual mpeh yôk yang n'hanh nkual bri dâng Bắc Bộ, n'hanh geh tât 46 rnoi nuĭh oh nô ndrel gŭ rêh. Tâm ban đah nău, Thái Nguyên geh rnoh drăp ndơ ơm yău văn hoá way ơm ntlơi an tay dŭt têh n'hanh dŭt âk ntil đŏng.

Ta Bảo tàng n'gor Thái Nguyên, rnôk dja, ăp trong ƀư ma công nghệ êng êng kơt đồ họa 3D, ƀư ma keh brô rgum prăp nău lư ndơ dôl mât ndray dôl tĭng kơn rgâl trong mât uănh way ơm, đah rlău 32.000 ndơ dôl mât ndray ta aơ. Wa Lương Thị Duyên, Groi Giám đốc Bảo tàng an gĭt:

Mpôl hên gĭt dơi aơ lah nău kan dŭt khlay, păng kơl an bảo tàng geh rnôk nkoch n'hơ tât năch hăn uănh pâl ăp ndơ rgum joi geh ma aƀaơ bảo tàng dôl mât ndray. N'hanh kơl dơh tâm nău mât dŏng, pơk joi nău lư, nkoch n'hơ tât âk mpưm nuĭh đŏng.

 Tĭng ăp nuĭh way kan, nău dŏng công nghệ mhe dŭt tâm di đah pah kan mât ndray, mpư n'hao rnoh khlay drăp ndơ ơm yău ntlơi an tay đŏng. Rnôk ƀư dŏng âk ma keh mbrô, công nghệ an rgum rhôp nău nteh rup gui, lơn lah nău nteh ntoh bah lơ n'hanh rup gui pe mpeh dŭt uĕh, rgum âk nuĭh ŭch uănh. Ntop tâm nê ăp drăp ndơ ơm yău ntlơi an tay lĕ ma ndơ mpơl săk n'hanh mô mpơl săk ta ntil keh mbrô mbra dơi nkoch n'hơ dŭt ngăch ma trong mạng internet, mô geh mpêt đê̆ mpeh mông nar, ntŭk pơk ƀư nău ngơi. Đah Thái Nguyên, dŏng keh mbrô drăp ndơ ơm yău ntlơi an tay mhe ntrôl dăng tâm mhe aơ đŏng. Lơn lah ntơm bah lôch rnôk Ban Chấp hành Đảng bộ n'gor an dŏng Nghị quyết mbrô 01 mpeh rgâl mbrô. Tĭng yuh Nguyễn Thị Trang, Kruanh jrô kan Văn hóa – Thông tin nkuâl Phú Bình, n'gor Thái Nguyên, đah du rêng geh âk mpưm ăp drăp ndơ ơm yău ntlơi an tay dôl geh, ntrôl dŏng âk công nghệ mbrô dôl geh ăp n'gâng kan, ăp ntŭk, nsrôih wơt dơn n'hanh tĭng ƀư.

Tâm njăr trong rgâl mbrô geh tât trong kan văn hoá, ri Ủy ban nkuâl ntrŏng lah rgum rgâl mbrô trong kan drăp ndơ têl ơm yău n'hanh mbra an lor rgâl mbrô an ntŭk têl ơm yău gưl neh dak gay ƀon lan ta ntŭk n'hanh năch drôn ndrel băl mpôl tâm dak, dak bah dih gĭt tât đŏng.

Aƀaơ ta n'gor Thái Nguyên geh rlău 800 ntŭk têl ơm yău, bri dak uĕh măt uănh rlău 500 drăp ndơ ơm yău ntlơi an tay mô mpơl săk, tâm nê geh 17 drăp ndơ ơm yău ntlơi an tay bah nuĭh rnoi mpôl đê̆ dơi rhơn n'hao êng săk kơp dơn lah drăp ndơ ơm yău ntlơi an tay văn hoá mô mpơl săk gưl neh dak, ndrel hang rbăn ndơ hôm geh saơ dôl dơi mât ndray ta Bảo tàng n'gor. Gay n'hao nău dơi săk blău pah kan mât uănh n'hanh nkoch n'hơ n'gâng kan văn hóa, thể thao n'hanh pâl nđaih ndơ̆ luh trong hăn gĭt na nê̆ gay ơm ƀư lôch jêh trong dŏng công nghệ mbrô, rgop mât ndray, mpư n'hao rnoh khlay drăp ndơ ơm yău ntlơi an tay văn hoá ta n'gor.

Aƀaơ, 53 rnoi mpôl đê̆ dôl geh rlău 14 rkeh ƀon lan, gŭ rêh nchah nchrai rlău 52 n'gor nkual ƀon têh, rgum ta ăp nkual jêr jŏt, nkual mpêr n'har bah neh dak. I ngăn an saơ, mât prăp nău lư ma keh mbrô văn hóa rnoi mpôl đê̆ mô dơn kơl n'hao rnoh săk blău pah kan mât uănh drăp ndơ ơm yău ntlơi an tay văn hóa, ma hôm lah ndơ dŏng gay rêng lam rnoh khlay way ơm tâm rơh ntoh âk công nghệ.

Wa Hà Việt Quân, Chánh văn phòng Tâm pă bôk nău kan Rnoh ŭch tât kan gưl neh dak hun hao wăng sa rêh jêng kon nuĭh nkual rnoi mpôl đê̆ n'hanh mpeh yôk yang an gĭt, Trong nchrăp mbrô 6 geh 19 nkô̆ đah lĕ rngôch rnoh prăk dŏng ƀư nklăp 5900 rmen prăk. He mbra dơi lah, aơ lah lor bôk năp geh trong nchrăp kan têh kơt nê an êng ma trong kan văn hoá rnoi mpôl đê̆. Ăp nău kan na nê̆ rƀŏng tât nău geh dŏng mpeh nău rêh nuih n'hâm, mât ndray mpư n'hao ăp săk tơm ntơr uĕh, kơt rdâk njêng mhe trong way kan, trêng nti tay tâm nhih nti, leo ƀư ăp lễ hội, n'hanh lơn lah dŏng âk keh mbrô drăp ndơ ơm yău ntlơi an tay.

Nău nkoch mpeh keh mbrô ăp drăp ndơ ơm yău ntlơi an tay văn hoá ri Bộ trưởng bah mpôl hên hŏ geh rđău đă mpeh nău gŭ mĭn mpeh rgâl mbrô n'hanh dŏng âk keh mbrô an tĭng ƀư rnoh tât bôk nău kan  gưl neh dak. Bah meng nê, Bộ trưởng hŏ geh nău rđău đă ân gŭ mĭn, kan nsum đah Bộ Văn hoá, ăp Bộ, n'gâng kan geh tât n'hanh lơn lah ăp n'gor, ƀon lan ăp rnoi mpôl đê̆ rdâk njêng dơi du trong ƀư bảo tàng mbrô, gay mât uĕh tâm ban kơt nkoch n'hơ ăp rnoh khlay văn hoá way ơm rnoi mpôl đê̆. N'hanh geh bảo tàng ntŭk mât prăp nău lư lah nsum mpeh văn hoá wăng sa rêh jêng kon nuĭh, rhŏ dŏng an nău kan hun hao ăp rnoh khlay mpeh nuih n'hâm tâm ban kơt rhŏ dŏng an nău tât hun hao wăng sa rêh jêng kon nuĭh ma ăp nău kan pâl nđaih./.

Nuĭh rblang: Điểu Thân