Lôch âk năm mbro tơm điều ta n’gor Gia Lai mô jŭr geh rnoh khlay hŭch thuk, tơm tăm dja dôl geh ƀon lan tâm n’gor sreh jăng lĕ.

        Wa Hà Văn Mừng (thôn Lũng Vân, xã Ia Lâu, nkuâl Chư Prông) mhe sreh lĕ du n’gul mir điều 3ha. Âk năm krêp dêh đah tơm  tăm ât dơi đah neh kro ntang  sât blak dja, wa Mừng mô nănh sreh, yơn 3 năm aơ, rnoh khlay điều hŭch  bơi  du n’gul, săk geh hôm 30% jêng rnăk mô dơi ât. Ta năp măt păng nchrăp tăm ba ta neh mir điều mhe geh sreh gay đăp mpăn nău rêh rnăk wâl:

        “Bar pe năm bah năp nơh, 3ha lah nsĭt geh 200 rkeh prăk. Yơn ntơm bah rnôk mô  jŭr geh play 3 năm aơ, rnoh khlay jŭr thuk ri he sreh mbrơi. Dak bât Plei Pai geh dak n’hoch sĭt dŏng tŏ an 500 ha ri he nhuĭh lâng, ƀư geh 8 tấn ba rêh / 1 ha”.

        Nău sreh jăng tơm điều dôl geh lam ăp xã n’har bri Ia Lâu, Ia Ga, Ia Piơr, nkuâl Chư Prông, n’gor Gia Lai. Êng ta xã Ia Piơr, bah kêng dŭt 2022 tât aƀaơ, hŏ geh 300ha sreh jăng hŏ rgâl jêng tơm tăm glêh nar, lơn lah ba, bum blang, mbo…wa Bùi Văn Tiến- Kruanh UBND xã Ia Piơr an gĭt, aƀaơ, n’gor mô hŏ geh trong rƀŏng na nê̆ n’hanh ntop kơl geh nău tam an nuĭh ƀon lan tâm trong rgâl si tăm. Nău tăm tơm glêh nar ta neh tăm điều ơm lah trong nkra ta năp măt dơm:

“Nău mĭn bah xã lah rgŏ jă, nkoch trêng nuĭh ƀon lan, neh mir I hôm săk geh ri mât chăm tay gay tơm mô geh sreh jăng. Ăp neh mir lâng dêh, cày dơi ri tăm tơm bum blang, kơh, ….jêng lah tăm tơm glêh nar. Hôm neh mir đăp mpăn tŏng geh dak ri tăm tơm sa play”.

         Nău sreh tăm- tăm- sreh rnôk mâp rgoh n’gơ mpeh rnoh khlay ndơ tuch tăm hŏ tă geh âk đah ndơ  tuch tăm tơm ta Gia Lai kơt cao su, tiêu, cà phê,… aƀaơ hôm plơ̆ geh tay đah tơm điều đŏng. Nău dja du tơ̆ tay đŏng n’gâng kan tuch tăm ân mpơl nău khlay kan rƀŏng trong rgâl dăp rgum tay si tăm n’hanh rdâk njêng rêng rnoh khlay ndơ tuch tăm jŏ jong ta n’gor./.