Wa Y’Sanh Niê, rnoi Rđe, tâm ƀon Pan, xã Ea Yông, nkuăl Krông Păk, n’gor Dak Lak hŏ tăm cà phê, tiêu tă bah jŏ. Tơm tiêu vay geh bu tuh ƀư nau geh mô âk, rnoh geh rnôk mô lăng khlay, hôm cà phê hŏ ranh, tăm tay kŏ ân geh prăk âk mơ dơi ri ma lơn jêr. Năm 2011, wa Y’Sanh Niê ntơm tăm nsum ma sầu riêng tâm mir cà phê. Sầu riêng nơih tăm, yơn mô blau mât chăm ri ma khĭt bu tuh, mô lah mô geh âk play. Đah rnoh neh 1,7 ha, hŏ geh 1.400 tơm cà phê ndrel rlau 400 n’gâng tiêu, wa Y’Sanh Niê tăm ntop 130 tơm sầu riêng Dona. Rnôk sầu riêng têh njêng n’gĭng ba lơ, nkŭm n’hâm ân cà phê, âk năm ma aơ kŏ geh rlau 10 tấn sầu riêng, 2 tấn cà phê, 1,5 tấn tiêu. Wa Y’Sanh Niê mbơh, jêh rnôk nkŭp rnon phân poh, dak si mât tơm tăm, ăp năm geh bơi tât du rmen:

‘Gâp mô ntuh kơl ân ndal tăm sầu riêng êng ôh, ma tăm nsum dơm. Gâp mât nau kan âk ntil tơm tăm, mpa rong. Năm aơ geh nklăp 10 tấn sầu riêng, tĭng rnoh rnôk aơ geh 600-700 kreh prăk, cà phê geh 2 tấn ri mhe nơh tăch bơi tât 200 rkeh, tiêu ri ê tăch”.

Wa Y’Mi Êban tâm ƀon Ea Kmat, xã Hoà Đông, nkuăl Krông păk kŏ tăm tiêu nsum ma mir cà phê. Tâm rnôk nau tăm sầu riêng hun hao dăng, wa Y’Mi Êban hŏ rvăt 40 tơm sầu riêng ntil Dona, păng tăm nsum ma tiêu ndrel cà phê. Rnôk aơ hŏ geh dĭng lĕ 120 tơm sầu riêng, mât 900 tơm cà phê ndrel 200 n’gâng tiêu tâm mir hvi 1,4 ha. Wa Y’Mi Êban mbơh, mir tăm aơ ân rnoh geh bơi tât 1,5 rmen tâm ăp năm:

‘Đah nau dơi lah đảng viên nơm ân leo trong lor gay kônh wa bu kơt tĭng, mro snôih joi nau kơt tĭng nti hun hao văng sa rnăk vâl. Rnôk tăm sầu riêng, kŏ mô geh âk prăk ri ma hăn manh ngân hàng ndrel kơt tĭng ăp nau kan gay ma mât chăm, tăm. Năm aơ geh nklăp 15 tấn, đah rnoh rlau 80 rbăn/kg tâm mir, ri geh 1,2 rmen prăk, ê nkoch nau geh tă bah cà phê ndrel tiêu kŏ geh âk đŏng’.

Êp nau ƀư ndrŏng ân ăp rnăk, ăp wa Y’Sanh Niê ndrel Y’Mi Êban mro kơl an kônh wa mpeh nau tăm, mât chăm tơm tăm, tơm prăk, kon ntil tăm mpa rong đŏng gay hun hao văng sa, jut n’huch ach o. Wa Y’Niêm Niê-Kruanh jrâu kan tuch tăm ndrel hun hao ƀon lan nkuăl Krông Păk kơp dơn, wa Y Sanh Niê ndrel Y Mi Êban kŏ lah ăp đảng viên hăn lor tâm nau hun hao văng sa jut n’huch ach o:

‘Tâm nkuăl Krông păk geh âk ngăn đảng viên ƀư pah kan jan sa blau, tâm nê geh Y Sanh tâm xã Ea Yông ndrel Y’ Mi tâm xã Hoà Đông. Tâm ăp nar tâm nchră nau kan tuch ân kônh wa nkuăl rnoi mpôl đê̆, hên kŏ mbơh nau kan aơ bah ăp đồng chí nê gay ma kônh wa ƀư kơt tĭng, ndrel hun hao văng sa jut n’huch ach o”.

Nau kan janh tăm nsum sầu riêng tâm mir cà phê, tiêu kơt ăp rnăk wa Y’Sanh niê ndrel Y’Mi Êban tâm nkuăl Krông păk hŏ n’hao nau săk tam văng sa, leo nsĭt nau săk geh văng sa âk ân rnăk vâl. Khân păng mô knŭng rklaih ach o nâp nâl ma hôm jêng nau kan ngăn, tâm dăch gay kônh wa ƀon lan kơt tĭng nti./.