Lôch rlău 1 pơh rgum âk tơm ndơ kơl săm, rnoh ndrôk dak toh geh ji ndŭl djroh n’hanh khĭt ta n’gor Lâm Đồng hŏ geh nău mpơl rdêl bah. Yơn lah, ntul rlong mhe hôm ntoh rnôk geh ăp kon ndrôk dak toh geh ji, ntoh tay nău ji ơm. Ăp rnăk mât rong ndrôk dak toh ta Lâm Đồng dôl kâp nău n’glêh an bah Bộ Nông nghiệp n’hanh Phát triển nông thôn, mpeh nkô̆ ƀư jêng khuch n’hanh ndrel nău dơn kan trok tâm, gay kônh wa ơm rdâk tay nău kan mât rong. Mô dơn nê, ân geh nău uănh năl êng gay đăp mpăn geh nău dơi. Phóng viên Quang Sáng geh nău nchih nkoch.

  Lôch ăp nar nsrôih yur dak, dak si dak gle ăp tŏng tĭng nău ntĭm nti bah thú y, ndrôk dak toh bah rnăk wa Nguyễn Đình Sơn, ta thôn Bồng Lai, xã Hiệp Thạnh, nkuâl Đức Trọng hŏ mbrơi sĭt dăng tay. Rlău ma 2 mblâm geh ji jru hŏ khĭt, rlău jât mblâm ndrôk hôm ƀa ƀă hŏ klêp dơi pih. Yơn lah, nău  ma wa Nguyễn Đình Sơn dŭt rvê lah ndrôk geh ma nău plơ̆ ntưp tay.

“Chuh vaccine nar 25/7, tât nar 2/8 ri nău mpơl ât sa, tât nar 4/8 ri ntlơi sa lĕ ma  mpôl dĭl. Rnôk nuh srê ntoh luh dŭt hô, ji ndŭl djroh lah nar 7/8 ntoch jong tât nar 9/8 ri ndrôk geh khĭt 2 mblâm. Aƀaơ lơn âk ndrôk hŏ sa mbơm oi hôm, yơn geh du  mblâm plơ̆ ntưp ji tay tâl 2 tâm 3 nar aơ ât sa”.

Tâm ban kơt nê đŏng, rlău ma 4 mblâm hŏ khĭt, 22 mblâm ndrôk dak toh bah rnăk wa Lê Thị Ánh Hồng, thôn Bồng Lai, xã Hiệp Thạnh, nkuâl Đức Trọng (n’gor Lâm Đồng), hŏ rlău dơi ji jru đŏng. Du đêt ndrôk hŏ ntơm sa đê̆ đă. Tĭng wa Hồng, nkô̆ nău ta năp măt lah ân geh nău n’glêh an mpeh nău đă trok tâm, ntop kơl roh huach an nuĭh mât rong.

“Nuĭh I njêng dak si nê ân dơn nău trok tâm đah nuĭh ƀon lan, ân trok tâm ndrôk an nuĭh ƀon lan. Aƀaơ lah nuh srê yơn ma ntŭk geh nău ji? Ndrôk rnăk hên bah năp nê nơh hôm mô geh pih ma an păng sa đŏng, ma lôch nê ndrôk I geh chuh dak si ri jêng ji kop lĕ. Aƀaơ nha hôm 2-3 mblâm mô sa, ôi aơ nha hôm yur dak đŏng. Aƀaơ bar pe mblâm hŏ săm bah hôm ri âk mblâm plơ̆ ji tay, plơ̆ kop tay lah khĭt dĭl”.

  Kơp tât lĕ nar 12/8, n’gor Lâm Đồng năl geh 5.350 mblâm ndrôk dak toh geh ji ndŭl djroh n’hanh 237 mblâm geh khĭt, rgum lơn âk ta 2 nkuâl Đơn Dương n’hanh Đức Trọng. Aơ lah ăp  mblâm ndrôk dơi chuh vaccine NAVET-LPVAC njrăng n’gang môr rplay ntô ndrôk ntơm bah nar 22 tât 31/7/2024.

  Tĭng wa Hoàng Sỹ Bích, Giám đốc Sở Nông nghiệp n’hanh Phát triển nông thôn n’gor Lâm Đồng, vaccine NAVET-LPVAC njrăng n’gang môr rplay ntô ndrôk tă bah Công ty Cổ phần dak si thú y Trung ương (NAVETCO) pă an tăch. Rnôk tâm rlong ndranh n’hanh pă an tăch vaccine dja đăp mpăn ăp tŏng rêng da dê n’hanh tĭng jăp ăp quy định bah pháp luật. Wa Hoàng Sỹ Bích an gĭt, bol bôk năp năl dơi nău chuh vaccine geh khuch tât ndrôk ƀư jêng ji ndŭl djroh, yơn gĭt di lah nkô̆ tơm ƀư jêng tât nău ji n’hanh khĭt lah mô ri  ân kâp lôch jêh uănh năl bah nhih pah kan way kan.

“Lôch rnoh nchih rgum tĭng groi nđôi tât rnôk dja, lĕ rngôch rnoh ndrôk dak toh geh ji gŭ tâm rnoh hŏ chuh n’gang vaccine môr rplay ntô da dê, ăp ndrôk mô geh chuh ri mô geh nău ji. Yơn lah, he mô dơi ntôn nchroh ôh, ân geh lôch uănh năl n’hanh ân kâp nhih pah kan dơi kan geh nău dơn kan mbơh ma siƀŭt. Mpôl hên dăn  đă gay an geh nău tâm ban ri ân đă bu ndranh êng uănh năl. Nkhêp tă bah vaccine ri mpôl hên mbra đă doanh nghiệp lah ân trok tâm an kônh wa”.

Rlău ma 2 nkuâl Đơn Dương n’hanh Đức Trọng, nkuâl Lâm Hà n’hanh nkual ƀon têh Bảo Lộc bah n’gor Lâm Đồng ntơm năl geh ndrôk dak toh geh ntưp ji ndŭl djroh lôch chuh vaccine njrăng n’gang môr rplay ntô ndrôk đŏng. Tâm nê, ta nkuâl Lâm Hà hŏ geh 2 mblâm ndrôk dak toh geh khĭt. Aƀaơ pah kan njrăng n’gang ji  ndŭl djroh ta ndrôk dak toh mpôl bah n’gor Lâm Đồng dôl dơi ăp đơn vị thú y bah Trung ương n’hanh n’gor nsrôih an ƀư./.