Nar nđaơ, N’gâng kan Tuch tăm mât rong n’hanh hun hao ƀon lan n’gor Dak Lak ƀư rƀŭn nchră “N’glôch jêh uănh lah Nghị quyết 24/2017 bah HĐND n’gor mpeh hun hao cà phê nâp nâl tât năm 2020, rƀŏng tât năm 2030”; N’glôch jêh yan cà phê năm 2023-2024. Tĭng N’gâng kan tuch tăm mât rong n’hanh hun hao ƀon lan n’gor Dak Lak, năm cà phê 2023-2024, dĭng lĕ geh cà phê bah Dak Lak geh rlău 535.000 tấn, hŭch 23.000 tấn nkôp đah năm bah năp.

Yơn knŭng rnoh tăch n’gluh hao, geh prăk tăch n’gluh cà phê bah n’gor geh 915 rkeh đôlar, hao 168 rkeh đôlar nkôp đah năm bah năp. Tĭng wa Nguyễn Hoài Dương, Giám đốc N’gâng kan tuch tăm mât rong n’hanh hun hao ƀon lan n’gor Dak Lak, tơm cà phê lah tơm tăm khlay, rgop khlay an hun hao wăng sa-rêh jêng bah n’gor. Lơn lah, tâm năm 2023-2024, Dak Lak lĕ pơk hvi, hun hao ndơ cà phê kah, aơ lah trong hun hao mhe, tâm di đah nău ŭch dŏng ta lam ntŭr neh. Tâm năm tât, ăp ntŭk uănh khlay n’hao săk geh, uĕh kah cà phê, hun hao âk lơn tay ăp nkual tăm cà phê kah; ntrôl dăng mât uănh cà phê geh trong ntĭm ntŭk Buôn Ma Thuột ta ăp ntŭk tăch dak bah dih, tĭng nkra njêng cà phê njrăng n’gang phah bri bah liên minh châu Âu.