VOV4.M’nông-N’gor Ủy Dak Lak mhe tâm rgop đah Học viện Chính trị ngih dak Hồ Chí Minh ƀư rơh tâm nchră khoa học đah bôk nău “N’gor Dak Lak rgum hun hao tuch tăm tĭng trong ueh mhe, nâp nâl”.

Ta rơh tâm nchră, ăp nuĭh kan khoa học, nuĭh kan mât uănh mbơh tơih mpeh nău tâm nchră đah âk nkô̆ nău kơt: Nău mĭn bâh Đảng, nău kơl, pháp luật bâh ngih dak mpeh hun hao tuch tăm tĭng trong ueh mhe, nâp nâl; nău ntrŭnh, nău kơl bâh n’gor Dak Lăk mpeh hun hao tuch tăm tĭng trong ueh mhe; dŏng công nghệ sinh học tâm nău hun hao pah kan tuch tăm ta n’gor Dak Lak; rơh nkhêp n’hanh nău ntul rlong tâm nău hun hao tuch tăm n’gor Dak Lak tĭng trong ueh mhe, nâp nâl, du đê̆ nău n’hanh trong kan kĩ thuật hun hao tuch tăm nâp nâl tĭng trong geh gĭt nău kan an du đê̆ tơm tăm tơm khlăy ta Dak Lak; nău ngăn n’hanh trong kan hun hao công nghiệp nkret njêng si n’gor Dak Lak.

Tĭng nău mbơh bâh tiến sĩ Võ Văn Lợi, kruanh khoa kinh tế, Học viện chính trị nkual 3, Dak Lak đah nău geh rlău 650 rbăn ha neh tuch tăm, tâm nĕ geh rlău 300 rbăn ha neh bazan dŭt jêng, ndrel đah trôk nar dơh nơih, Dak Lak dŭt dơh hun hao ăp ntil tơm tăm tĭng trong tâm rgop pah kan jan sa ndrel đah tăch ndơ geh ƀư, rgum neh ntu gay ma njêng nău kan an hun hao wăng sa tuch tăm.

        “ Mpôl he an geh rdâk njêng ăp nău khlăy bâh ăp trong kan tâm rgop gay ma he geh dŏng lĕ rngôch ăp nău dơi, nău geh nĕ lah ăp rnoh pah kan lor. Bâh ăp nău tâm rgop, bâh ăp nău kan khlăy gay ma he bah ir geh nău tât, mât đăp mpăn nău geh ueh. Kanŭng geh nău der ăp nău mbra mô dơi geh ntul rlong rĭ he an geh tâm rgop kan”.

Rơh tâm nchră 

 Tĭng nău mbơh n’gor Ủy Dak Lak, hun hao tuch tăm tĭng trong ueh mhe, nâp nâl lah ngoăy tâm 6 nău kan tơm khlăy gay ma hun hao wăng sa bâh n’gor, geh mbơh ta Nghị quyết Đại hội Đảng bộ n’gor tal 17, năm kan 2020-2025. Yơn lah, nău mô geh tâm ban tâm rnoh pah kan, ê hŏ geh âk nuĭh ntuh kơl ta trong kan tuch tăm công nghệ mhe..dôl lah ăp nău jêr ƀư an n’gâng kan tuch tăm ê hŏ hun hao di trong tĭng nău nơm ŭch.

Bâh nău ngăn ta ntŭk, wa Nguyễn Quang Hà, kruanh UBND nkuăl Ea Hleo an lah, nău kŏ khan tâm tuch tăm ta Dak Lak aƀaơ, ntoh luh bâh ăp nău bâh pah kan nchrăp kan. Yor nĕ, an geh mât uănh âk tay lơn tât nău nchrăp kan tuch tăm ê lor geh nchră tât trong kan êng.

        “Bâh ntơm nơh nău nkoch geh âk yơn tăch mô khlăy n’hanh nuĭh ƀon lan ncoăt tĭng nău ŭch bâh ntŭk tăch rgâl lah saơ mơh ndơ tăm geh rnoh khlăy lah tăm ntil nĕ. Nău nkoch nĕ geh yor he mô geh ƀư ueh nău nchrăp. Ntrong kan gâp lah ngluh mbơh he an geh ƀư ueh nău nchrăp kan, rgâl mhe nău nchrăp kan an ăp nkual, an tâm di na nê̆ đah ăp ntil tơm tăm gay ma nsĭt tay săk rnglăy rlău 1 rnoh neh tăm”.

        Ta rơh tâm nchră, ta meng ăp nău tâm rgop mpŏng tât du n’gâng kan tuch tăm nâp nâl, ăp đại biểu lĕ dăn đă ăp trong kan hun hao tuch tăm công nghệ mhe kơt lah dŏng nău mhe mpeh khoa học kĩ thuật, nău geh ntuh kơl, dŏng ăp nău dơi mhe bâh rơh rgâl mhe công nghiệp 4.0 ta trong kan tuch tăm. Bâh nĕ njêng nău tâm ban, nău dơi ueh an Dak Lak gay ma hun hao tuch tăm ueh mhe, nâp nâl, ƀư tĭng nkô̆ ŭch hun hao “tuch tăm kloh, nkual ƀon lan gŭ ueh mhe, ƀon lan kan lŏ mir gĭt blău”.

Wa Phạm Minh Tấn, groi Bí thư rnâng kan n’gor ủy Dak Lak an gĭt: Nghị quyết Đại hội Đảng bộ tal 17, năm kan 2020-2025 uănh năl nău hun hao tuch tăm tĭng trong ueh mhe, nâp nâl. Aơ lah ngoăy tâm 6 nău kan tơm khlăy gay ma hun hao wăng sa bâh Dak Lak. Bâh nĕ, nău wăng sa rgâl mhe tĭng trong ueh mhe, hun hao râng geh bâh ăp năm geh 8,5%. Nău pah kan tuch tăm dôl rgum hun hao tĭng trong n’hao nău geh, nău ueh ndrel đah nău ŭch dŏng bâh ntŭk tăch rgâl, bôk năp lĕ n’hao nău dơi nău geh bâh n’gor. Gay ma rdâk njêng n’gâng kan tuch tăm tĭng trong ueh mhe, nâp nâl, ta ntŭk an geh rgum ntrôl dăng nău ntuh kơl n’hanh an geh âk nău ntuh kơl ta trong kan aơ.

Nuĭh rblang: Thị Đoắt