VOV4.M’nông – Srê ji ndŭl sŭr châu Phi ntoh tay jŏ jong ta n’gor Dak Lak, đah bơi 60 ntŭk srê dơi saơ bah bôk năm tât aƀaơ. 2 ntŭk srê mhe ta Dak Lak bah rnăk mât rong, ta xă Ea Tul n’hanh Cư M’gar, nkuăl Cư M’gar, n’gor Dak Lak đah rlău 10 mlâm sŭr geh ntưp srê. Rnoh sŭr srê lĕ dơi rmôt thú y tâm rgop đah nuĭh ƀon lan tâp bôr. Kơp bah bôk năm tât aƀaơ, lam n’gor Dak Lak kơp dơn 59 ntŭk srê ta 52 thôn, ƀon, bah 8 nkuăl. Dĭng lĕ rnoh sŭr ntưp srê bơi 400 mlâm đah rnoh âk bơi 24 tấn.

Nuĭh mât sŭr Dak Lak puh rao ndrung wang geh ntưp nuh srê.

Tâm nĕ, Cư M’gar lah ngoăy tâm âk nkuăl geh srê sŭr ji ndŭl hô ngăn đah 158 mlâm an tâp bôr, dĭng lĕ bơi 11 tấn. Wa Nguyễn Quang Đức, Kruanh ntŭk kan mât rong n’hanh Thú y nkuăl Cư M’gar, an gĭt: Aƀaơ nău kan thú y tâm rgop n’gâng kan ta ntŭk groi nđôi ntŭk srê n’hanh đă nuĭh mât rong ton mô tăch ndal sŭr srê gay dêr ƀư ntưp nuh srê.

Nuĭh rblang: Y Sưng Phê Ja