Ơm mbơh ƀư ndâk nkra 2 dak tâm pă dak ta dak me Ba, lvang nkual têh An Khê, n’gor Gia Lai mbra kơl mkra nău n’hôl ƀô, ƀư jêng ntŭk ntô uĕh, ntrôl hun hao wăng sa rêh jêng ta ntŭk. Aơ lah mĭn lah n’hanh dăn đă bah UBND n’gor Gia Lai tâm rơh pah kan đah N’gâng kan tuch tăm mât rong n’hanh hun hao ƀon lan khay 8/2024 mhe rlău.

UBND n’gor Gia Lai năl lah, nău ntuh kơl ndâk ƀư dak bât hao lah khlay, yor bah năm 2012 rnôk Thủy điện An Khê Kang Nák an dŏng, dak me Ba lĕ rgâl sĭt mpeh dak me Kôn hoch hăn Bình Định, ƀư rnoh neh têh neh lŏ mir ta An Khê geh mô tŏng dak. Rnoh dak rlău nkual têh An Khê mô hŏ tât 4m3/s, tâm yan wai ri kroh, du đêt lvang dak nkân geh n’hôl ƀô. Wa Đặng Quốc Hoài Huy-Groi Kruanh UBND nkual têh An Khê mĭn lah, nău mô tŏng dak, n’hôl ƀô ntŭk ntô gŭ âm mbra dơi dôh rklaih lah geh dak bât hao ta dak me Ba ơm dơi ndâk ƀư.