VOV4.M'nông: Đah rlău 80.000 ha bum blang, an rnoh âk geh rlău 1,6 rkeh tấn ăp năm, aƀaơ Gia Lai lah n'gor tăm bum blang dŭt âk lam dak. Yơn lah, nsĭt geh bah nuĭh ƀon lan tăm bum blang hôm đêt, ân geh ăp nău rgâl bah nău kan mât chăm n'hanh nkret njêng bum blang gay mât uĕh nău săk geh bum n'hanh n'hao rnoh geh wăng sa an nuĭh ƀon lan.

Rnăk yuh Rơ Com H’ Duyệt ta xã Chư Ngọc, nkuâl Krông Pa, n'gor Gia Lai geh 1 ha bum blang. Năm e nơh, nơm geh jŭr geh bum, rnoh khlay đăp mpăn, jêng yuh hôm nsĭt geh sa 30 rkeh prăk. Năm aơ, bu tuh kruănh lha bum blang ƀư mir tơm hŭch săk geh, yuh hôm geh dah n'gul năm bah năp nơh dơm.

        “Năm e nơh săk bum jŭr geh, rnoh khlay hao. Năm aơ, bum mô săk geh, ntop đah mô lăng jêng ơm. Ŭch ngih dak ân ndơ̆ ntil tơm bum blang mhe, săk geh âk bum lơn".

        Aƀaơ, ta n'gor Gia Lai geh rlău 80.000 ha bum blang, dơi tăm lơn âk ta ăp nkuâl mpeh bah dâng kơt Krông Pa, Ayun Pa n'hanh nkuâl Ia Pa. Yơn lah, đah rĭng geh aƀaơ nklăp 20 tấn/ha, lôch n'hâp lĕ prăk dŏng kan, ăp ha bum blang an nsĭt geh ăp năm ntơm bah 20 tât 30 rkeh prăk dơm. Wa Nguyễn Như Cường- Cục trưởng Cục Tuch tăm, Bộ Nông nghiệp n'hanh Phát triển Nông thôn ntrŭt nsôr ƀon lan ân tăm ntil bum blang dăng chŏl đah bu tuh, nsĭt geh bum âk:

      “He ân ndơ̆ ntil bum uĕh jêng, dŏng rêng mât chăm ăp tŏng, ntuh kơl phân poh, dak tŏ, mhâm ƀư gay n'hao săk geh, rnoh khlay, rnoh âk bum blang. Hôm du ntil đŏng lah nhih máy nkret njêng ân nkre đah nău dơn kan tâm hun hao nkual tuch tăm, ntop kơl nuĭh ƀon lan rdâk njêng tay ăp hợp tác xã khuyến nông, ndơ̆ rgâl kỹ thuật mât chăm mhe".

Wa Lưu Trung Nghĩa- Giám đốc Sở Nông nghiệp n'hanh Phát triển Nông thôn n'gor Gia Lai an lah, ân tăm rơ̆ jêng ntil tơm dja tĭng trong rƀŏng jŏ jong nsing kalơ tâm rgop tuch tăm n'hanh nkret njêng jru. Lam n'gor geh 5 nhih máy nkret njêng rnih bum blang, yơn mô hŏ geh du ntŭk nkret njêng i ton rvăt đah nuĭh ƀon lan. Nău dja ƀư nuĭh tăm bum blang geh ndrât ndal tâm nău kan tuch tăm. Bah meng nê, công nghệ nkret njêng bah ăp nhih máy aƀaơ ta rnoh dăng dah găp dơm, ndơ tăch n'gluh mô hŏ geh âk ntil, suan tâm rlong mô hŏ dăng âk. Let năp tay n'gâng kan tuch tăm n'gor Gia Lai mbra kan nsum đah Hiệp hội bum blang Việt Nam gay nkra ăp nkô̆ nău dja:

“Mhe aơ, rnôk nuĭh ƀon lan tăm geh âk bum blang kơt nê̆, yơn doanh nghiệp dơn rvăt dơm, mô hŏ geh nău tâm ton bah bôk khay tăm. Jêng ŭch rŏng lah mbra geh ăp nhih máy nkret njêng geh bôk tâm ton dja. mpôl hên mbra nsrôih pah kan đah Hiệp hội bum blang Việt Nam gay nsrôih kuăl jă, wăch rgum ntuh kơl tâm nău kan dja. Đah nkual neh tăm hvi 80.000 ha dja, lah he ƀư uĕh nău kan dja ri mbra kuăl jă 3 tât 4 nhih máy geh công nghệ uĕh, prăk kaih uĕh ri njêng luh nkual tăm hun hao jŏ jong".

         Nơm dơi geh nkret njêng tăch n'gluh, aƀaơ bum blang n'hanh ăp ntil ndơ geh ƀư jêng bah bum blang hŏ săk geh gay n'hao rnoh khlay. Yor kơt nê̆, gay rgop n'hao nău geh wăng sa an nuĭh ƀon lan kan lŏ mir, nkre mât uănh săk geh âk bah nkual tăm bum blang dŭt têh hvi lam dak. Gia Lai ân geh ăp nău rgâl, tăm rơ̆ jêng âk tơm bum blang tĭng trong rƀŏng jŏ jong, nsĭt nău dơi geh âk lơn./.

Nuĭh rblang: Điểu Thân