Tĭng N’gâng kan Thông tin n’hanh Truyền thông n’gor Kon Tum, tât aƀaơ lĕ geh rlău 58% rnăk tâm n’gor dŏng cáp quang internet, mạng di động 4G lăp tât thôn uĕh nâp rhŏ an tĭng tâm di lam dak... Đah ntŭk ntô công nghệ mrô nar lơ uĕh, nuĭh ƀon lan Kon Tum dôl geh ăp nău rgâl mhe tâm pah kan nkra njêng. Nô Lương Văn Thắng, nuĭh kan lŏ mir blău ta thôn 2, xă Ia Dom, nkuăl n’har bri Ia H’Drai, an gĭt, nău dŏng điện thoại thông minh lĕ ntop kơl nô dŭt âk tâm hun hao nkra njêng, mât rong:

Gâp ƀa ƀơ uănh nu nău mhe kơt ta mạng xã hội gay dơi gĭt nu nău mhe, ntop mĭn joi ăp nău gay dơh tâm nău kan bah gâp. Gâp ƀa ƀơ lăp mạng xã hội uănh, joi ăp ntrong ƀư, ntĭt nsa kơt mât sŭk, mât mpĭk, mât mblôh, mât mpa. Gâp mĭn joi dŭt âk tă bah nău mhe bah mạng xã hội.

Jêh rlău 2 năm mbơh ƀư Nău ntrŭnh 749 bah Thủ tướng Chính phủ, tât aƀaơ n’gor Kon Tum lĕ geh rlău 16.800 ha tơm tăm, 142 ntŭk mât rong dơi kơt dŏng ăp khoa học mhe n’hanh công nghệ; rlău 116.600 rnăk tuch tăm lŏ mir lăp ăp ntŭk tăch điện tử; 1 ntrong ƀư thôn 3, xă Tân Lập, nkuăl Kon Rẫy tŏng ăp ndơ mhe... Rgâl mrô dôl geh âk nău rgâl uĕh tâm tuch tăm lŏ mir, tâm nĕ nuĭh ƀon lan nkre lah nuĭh tơm ƀư, nkre lah ntŭk tât an ăp nău rgâl bah công nghệ mrô. Nô A Tạo, nuĭh Xơ Đăng, nuĭh kan Hợp tác xã Thảo dược Tu Mơ Rông, an gĭt:

Hợp tác xã nuĭh kan du hê du ntŭk. Du pơh du tơ̆ lĕ rngôch nuĭh kan hợp tác xã rƀŭn online. Rƀŭn online dơh lơn, ngăch lơn. Kruanh rmôt mbơh ƀư nău kan pơh aơ he ƀư nău nĕ. Rƀŭn online mât nău tâm rgop bah nuĭh kan tâm rmôt gay tâm rgop nău kan ndrel.

Đah 68% rnoh nuĭh ƀon lan bah n’gor gŭ rêh ta ntŭk thôn ƀon n’hanh 73% pah kan tâm nău kan lŏ mir, n’gor Kon Tum mĭn rgâl mrô lah trong mkra khlay gay hun hao lŏ mir, thôn ƀon tĭng trong mhe kơl nuĭh ƀon lan nkra njêng đah prăk đêt ngăn yơn nău geh âk. Yơn lah, tĭng wa Đặng Trần Huân, Groi Giám đốc N’gâng kan tuch tăm mât rong n’hanh Hun hao ƀon lan n’gor Kon Tum, n’gor dôl rdâng âk ntŭl rlong rnôk ƀư tĭng rgâl mrô tâm ndâk njêng thôn ƀon mhe:

Nău wât mpeh rgâl mrô tâm ndâk njêng thôn ƀon mhe lah mô rĭng. Nău blău n’hanh nău wât bah công chức ƀư tĭng nău kan rgâl mrô hôm e đêt. Ngih wâl ndoh ndơ n’hanh ntung trong công nghệ mhe ta du đêt xă mô hŏ tâm di đah nău ŭch n’hanh nău kan rgâl mrô.

Tĭng wa Đặng Thanh Long, Kruanh Liên hiệp ăp Hội khoa học n’hanh Kỹ thuật n’gor Kon Tum, yor prăk kaih-nău rêh jêng hôm e jêr jŏt, nău rgâl mrô ta lŏ mir n’hanh nkual ƀon lan bah n’gor lor lah an rlet rlău ăp mpêr n’gar, nĕ lah rnoh rgâl măy mok hôm e đêt, đêt công nghệ, ăp nău ƀư tuch tăm, nkra njêng hôm e dơi ƀư tĭng knơm nău blău ơm bah nuĭh ƀon lan... Nkoch trong mkra ntrôl rgâl mrô tâm lŏ mir rƀŏng tât hun hao thôn ƀon gĭt blău mhe, wa Đặng Thanh Long, an gĭt:

Lor nĕ lah mpeh trong kan mbơh nkoch trêng nău mhe gay saơ kloh ntŭk gŭ, nău tơm, nău khlay n’hanh jêr jŏt bah rgâl mrô tâm hun hao wăng sa lŏ mir aơ lah du trong hăn khlay. N’hao uĕh nâp nuĭh kan n’ăp nuĭh tơm nkra njêng, geh ăp rnăk ƀon lan, rmôt kan ndrel, hợp tác xã, doanh nghiệp n’hanh săk nơm rmôt cán bộ ăp nuĭh râng tâm rnôk ƀư tĭng rgâl mrô tâm lŏ mir. Ndâk njêng ntŭk ntô, n’gâng tơm nău rêh jêng mrô n’hanh sam ƀŭt mrô. Nău hăn ndrel n’hanh lăp bah lĕ trong chính trị, bah ăp gưl ủy Đảng, n’gâng kan ƀon lan, bah ăp doanh nghiệp lăp nkra njêng.

Tât aƀaơ n’gor Kon Tum lĕ geh 48/68 xă dơi kơp dơn geh tâm di thôn ƀon mhe, tâm nĕ geh 7 xă thôn ƀon mhe n’hao prêh n’hanh 2 xă thôn ƀon mhe leo lor. Ndrel đah nĕ n’gor lĕ geh 21 thôn geh tâm di nkual ƀon lan mhe leo lor, 65/498 thôn, ƀon rnoi mpôl đêt geh tâm di thôn ƀon mhe. Aơ lah ngoăy tâm ăp nău khlay gay n’gor Kon Tum ƀư tĭng ăp trong mkra mhe, mĭn ƀư mhe n’hanh tâm di gay ntrôl rgâl mrô an hun hao wăng sa lŏ mir n’hanh ndâk njêng thôn ƀon mhe.