VOV4.M’nông:   Ta nkual yôk prêh, yơn bu klô ndăm Phạm Thế Hùng 25 năm deh, ta xă Cư Né, nkuăl Krông Buk (Dak Lak) lĕ lôch uĕh đah ntrong kan mât ka Koi Nhật Bản. Aƀaơ nô geh 3 ntŭk mât rong ka Koi têh rbăn m2, nsĭt geh 1 rmen prăk du năm.

Nkoch mpeh nău ndâk njêng nău kan, Phạm Thế Hùng, ta xă Cư Né, nkuăl Krông Búk, nkoch, jêh rnôk tôts nghiệp THPT tâm năm 2015, ndơn yorr hăn nti đại học, oh săch nău kan nkra ndeh măy jêh nĕ sĭt pơk nkra ndeh ta jay. Geh nău ŭch êng đah ka Koi Nhật Bản, ăp rnôk ru, oh way lăp mạng internet mĭn joi đah nău mât ka, jêh nĕ janh tăch ndeh măy nơm gay rwăt ka ntiol sĭt mât. Yor mô geh nău blău, 2 rơh ka bôk năp khĭt lĕ.

Mô blău, Hùng lĕ tât ăp ntŭk mât ka ta nkual ƀon têh HCM, Đồng Nai... gay nti nău blău ơm na nê̆. Geh nău gĭt ơm, nô rlu nkre nkra ndeh, dăn me bơ̆ manh ngân hàng 120 rkeh prăk ntuh kơl ƀư bể mât ka Koi. Rơh aơ, yang kơl nuĭh, rnoh ka rơ̆ uĕh n’hanh deh rĭng.

Nô Phạm Thế Hùng an gĭt, gay mât ka Koi uĕh jêng, nău khlay ta ntŭk ntô dak an kloh uĕh, ntŭk an bể prêh n’hanh geh trong sial lăp; lơn lah an njrăng n’gang sêt krêp ta lŭ ka. Jêh âk năm rdâk njêng, aƀaơ nô geh 3 ntŭk mât ka hvi 12.000m2 ta ăp n’gor Dak Lak, Kon Tum n’hanh Lâm Đồng.

          “Aƀaơ oh tăch rĭng du khay bah 5 tạ tât 1 tấn ka, nkŭp ăp prăk ntuh kơl ri hôm e geh nklăp 50-100 rkeh/khay. Nchrăp năm tât, oh mbra ƀư tay n’gar jay, bể ka Koi đah ntu lŭ, ƀư quán cà phê ka Koi gay wơt năch khân pơng tât uănh, n’hanh lah geh nuĭh nchăm ri ƀư dâl gay n’hao nău geh. Ƀư ăp ndơ ƀư n’hlău ka, n’gar jay”.

Aƀaơ du khay bu klô ndăm Phạm Thế Hùng dơi geh bah 50-100 rkeh prăk bah Ka Koi

Vah lôch uĕh bah nơm, aƀaơ Phạm Thế Hùng mô knŭng nta nău kan an ăp druh ndăm, ta ntŭk, ma nchrăp ntĭm, kơl an ăp druh ndăm mom ŭch ƀư tĭng nơm. Nguyễn An Khánh, ta thôn Katy 5, xă Cư Né, nkuăl Krông Búk, nkoch.

“Ƀư đah nô Hùng ri nô trok prăk khay 4-5 rkeh prăk du khay. Oh dôl ntuh kơl ƀư bể, chỏ jay n’hanh trok hoch dak..., dŭt khay 4/2022 aơ mbra sa nkra ntŭk ka Koi bah oh., Dĭng lĕ prăk ntuh ƀư nklăp 100 rkeh prăk, n’hanh oh geh manh bah me bơ̆ nklăp 70 rkeh prăk, rnoh prăk ƀa ƀă nô Hùng an manh mô sŏk prăk kon. Lah mô tŏng tay nô an tăch manh ka ntil n’hanh lŭk an ka sa, dơi trok mbrơi mbrơi dơi đŏng”.

 Tĭng nô Võ Minh Cường-Groi kruanh Hội Liên hiệp druh ndăm Việt Nam nkuăl Krông Búk, mât ka Koi lah du trong hăn mhe ta nkual yôk prêh yơn lĕ geh âk lôch uĕh ngăn. Nău aơ rgop nta an nuih n’hâm rdâk njêng nău kan mhe bah âk druh ndăm ta ntŭk.

Ntrong kan rdâk ndâk nău kan mât ka Koi lôch jêng bah Phạm Thế Hùng lĕ n’hanh dôl nău trêng an druh ndăm ta ntŭk nsrôih rdâk njêng nău kan.

 “Câu lạc bộ druh ndăm rdâk njêng nău kan nkuăl Krông Búk dôl ndâk njêng âk ntrong kan uĕh ăp ntŭk mât ka Koi Dak Lak yor Phạm Thế Hùng ntop kơl. Bah nĕ, rgop ntĭm nău kan an dơm n’hanh mbơh ntĭm ndâk njêng trong kan an ăp nuĭh êng. Bah nĕ, mpôl hên dơi ndâk njêng ăp CLB mô lah têh lơh lah jêng HTX đah nău kan mhe, nta nău kan an druh ndăm ta ntŭk kơt nău geh gay ntop kơl rnăk wâl ăp băl mom”.

                    Nuĭh rblang: Y Sưng Phê Ja