Du pơh aơ, ur sai wa Võ Văn Cao, ta tổ 10, thôn Bồng Lai, xã Hiệp Thạnh, nkuăl Đức Trọng, n’gor Lâm Đồng mô kah bĭch mô lăp sa, nchoăt dâng nchoăt lơ ăp ntŭk gay ma joi trong mât săm ndrôk. Rlău ma 4 mblâm ndrôk sŏk dak toh dôl geh bŭn hôm nha ngăch dăng, lĕ rngôch 96 mblâm ndrôk sŏk dak toh hôm e bâh rnăk vâl lĕ geh nău ji, ji ndul djroh luh mham, tâm nĕ 2 mblâm lĕ khĭt. Wa Võ Văn Cao an gĭt, rnoh ndrôk geh nău ji mhe geh chuh vacine njrăng nău ji môr pŭn ntô săk ta năp nĕ.

 “Gâp chuh vacine lĕ 96 mblâm, kanŭng hôm 4 mblâm ndrôk bơi deh kon jêng lah mô geh chuh. Aƀaơ ta 10 mblâm rĭ geh ntơm ji ndul djroh, 2 mblâm lĕ khĭt hôm. Du đê̆ rĭ mô kah sa, du đê̆ lĕ rgănh săk...gâp dŭt rvê ngăn kơt lah gŭ ta ŭnh rnga. Aƀaơ ăp nar gâp lĕ geh ndơ̆ dak si an ndrôk, têh jê̆ gâp an păng sa dak si da dê. Dak si gâp hăn rvăt êng bah dih, hôm dak si pă rĭ mhe geh bâh nar naơ tât aƀaơ dơm, yơn kanŭng lah ndơ̆ ntil C-gluco dơm”.

Rnăk vâl wa Huỳnh Thị Kim Phượng, ta thôn Lạc Nghiệp, xã Tu Tra, nkuăl Đơn Dương lĕ geh 76 mblâm ndrôk sŏk dak toh geh nău ji, 2 mblâm lĕ khĭt. Nău aơ geh ta rnôk lôch 2 pe nar rnôk ndrôk geh chuh vacine njrăng nău ji môr pŭn ntô săk. Lôch geh saơ nău tât ndal ta ndrôk, rnăk vâl wa lĕ kuăl đă nai dak si tât uănh săm ji, jur dak, dak si săm yơn mô hŏ bah đŏng.

 “Rnôk chuh vačine rĭ ndrôk mô ŭch sa, lĕ rngôch du mpôl geh duh săk da dê. geh ndrôk ji ndul djroh luh mham, geh ndrôk ji ndul jroh dak krăk kơt bŏk, 2 mblâm lĕ khĭt hôm. Thôn gâp geh bar pe jât rnăk geh kơt nĕ da dê, yơn geh 8 rnăk geh ndrôk mô geh chuh vacine. 8 rnăk aơ ndrôk mô geh ndơ lơh, hôm ăp rnăk geh ndrôk chuh vacine rĭ geh nău ji kơt nĕ da dê”.

Vaccine njrăng nău ji môr pŭn ntô săk geh chuh ta ndrôk sŏk dak toh ta 2 nkuăl Đơn Dương n’hanh Đức Trọng yor Công ty Cổ phần dak si Trung ương NAVETCO (gŭ kan ta n’gor Bình Dương) geh săch kan n’hanh pă dak si. Nău chuh dak si njrăng n’gang nău ji geh ƀư bâh lơ 22 tât 31/7/2024, đah lĕ rnoh rlău 10 rbăn dĭng. Lôch geh saơ ndrôk sŏk dak toh geh ăp nău ji n’hanh khĭt, n’gor Lâm Đồng lĕ rlu nău chuh vacine.

Tĭng nău mbơh bâh wa Nguyễn Văn Long, kruanh Cục thú ý, dơn geh nău mbơh ndrôk sŏk dak toh ta Lâm Đồng geh nău ji n’hanh khĭt, kêng măng lơ 7/8, nuĭh leo kan n’gâng kan tuch tăm mât rong n’hanh hun hao ƀon lan lĕ ntĭm đă ntŭk kan njêng mpôl kan tât uănh năl, mbơh tơih ăp trong kan njrăng, rdâng nuh srê.

 “Mpôl hên lĕ rgum ăp ntŭk kan thí nghiệm ueh ngăn bâh n’gâng kan thú y Việt Nam, ăp nuĭh kan dŭt blău ƀư sŏk ntil gay ma uănh năl an na nê̆, uănh ntŭk lah nkô̆ nău jêng tât ndrôk geh nău ji, geh khĭt ta Lâm Đồng, n’gâng kan lĕ geh nău ntĭm đă na nê̆ ăp trong kan leo kan njrăng rdâng nuh srê, trong kan mât uănh gay ma bah ir geh nău ndrôk ntưp ji, bah ir ndrôk khĭt”

Ndrel đah nău kơl an bâh n’gâng kan tuch tăm mât rong n’hanh hun hao ƀon lan, n’gor Lâm Đồng lĕ rgum lĕ mpôl kan gay ma mât săm ndrôk geh nău ji gay ma kơl an ƀon lan bah ir geh nău khuch khat. Yơn lah rnôk ndrôk geh nău ji n’hanh khĭt hôm nha âk. Tât lĕ nar 10/8, n’gor Lâm Đồng kơp dơn geh 4.495 mblâm ndrôk sŏk dak toh geh nău ji n’hanh 193 mblâm lĕ khĭt, hao bơi tât 600 mblâm ndrôk geh nău ji n’hanh 21 mblâm ndrôk khĭt đah du nar ba năp. Nkre lah đah nău kan njrăng rdâng nuh srê, ăp ntŭk kan têh dôl geh uănh năl tay nkô̆ nău ƀư jêng geh nău ji ta ndrôk sŏk dak toh ta Lâm Đồng.