Ôi (22/2) ta Hà Nội, Bộ Nông nghiệp n'hanh Phát triển nông thôn ƀư tâm nchră pơk sŏng dăng an ƀư "Trong hun hao khoa học công nghệ n'hanh rgâl mhe n'gâng kan tuch tăm n'hanh hun hao ƀon lan tât năm 2030, uănh ngai tât năm 2050". Ta tâm nchră, ăp nuĭh mĭn lah, hun hao khoa học công nghệ n'hanh rgâl mhe n'gâng kan tuch tăm ân rgâl mhe bah ăp nău kan jê̆. N'hao âk nău rgop bah khoa học, công nghệ n'hanh rgâl mhe tâm nău hun hao wăng sa tuch tăm ma ăp nău kan gŭ mĭn, ndơ̆ rgâl n'hanh dŏng ngăn.

Bộ n'gluh tât năm 2030, nău rgop bah săk geh tâm nău hun hao bah n'gâng kan tuch tăm mât rong ta rnoh rlău 50%. Tĭng Thứ trưởng Bộ Nông nghiệp n'hanh Phát triển nông thôn Phùng Đức Tiến, Khoa học công nghệ geh nău dŭt khlay n'hanh n'glêh an tât hun hao bah n'gâng kan tuch tăm n'hanh nsĭt geh tăch n'gluh ndơ tuch tăm si gle tui ka tâm bah ri aơ. Ƀư jêng ngăn ngăn trong hăn têh jong, ăp đơn vị mpeh n'gâng kan kơt ăp Viện, nhih nti ân gĭt kloh n'hanh ƀư jêng ngăn ngăn tâm trong kan bah he mât bôk.