Tĭng nău geh mbơh tơih aƀaơ nău bri ta năm 2023 bâh ăp n’gor Tây Nguyên, lĕ rnoh geh bri ta Tây Nguyên lah rlău 2,5 rkeh ha, tâm nĕ, bri ơm bâh ntơm geh 2,1 rkeh ha, geh tât 81%, bri n’ho tăm bơu tât 500 rbăn ha, geh tât 19%. Nkual neh Tây Nguyên geh bơi tât 13 rbăn nuĭh tơm mât bri lah ăp rnăk vâl, nuĭh kan êng, ntŭk rêh jêng ƀon lan, mât uănh geh rlău 127 rbăn ha bri. Leo rơh rƀŭn nchră, Kruanh n’gâng kan mât uănh bri Bùi Chính Nghĩa an gĭt, nău mât uănh bri lah nău gay ma ƀư tĭng uănh rnoh bri n’hanh neh bri ăp năm n’hanh nău njêng nchrăp ƀư kan, nău nchrăp mât uănh, hun hao bri bâh trung ương tât ta ntŭk kan ba dâng. Nkre lah mbơh tơih kơl an nău pah kan mât bri ndrel đah pă neh, pă bri n’hanh ƀư nău mbơh knơm ƀư tĭng nău kơl kan nkhôm an ntŭk kan nuĭh kan mât bri. Nău uănh kơp rnoh bri lĕ geh Chính phủ ntĭm đă an geh ƀư lôch tâm năm 2025, yor nĕ ăp ntŭk mbra mô hôm geh tâm nchră tay n’hanh an geh n’hao tay lơn tâm nău ntĭm đă, mbơh tơih nău kan uănh kơp bri.