Tix lâus Lò Văn Quốc hla đhâu cêr pluôs khov hlôngr yiêz tsưr ziv huôv tsar uô nox

Shông 2014, tix lâus Lò Văn Quốc zos lênhx xuz thơưx hâur jok Mấc Líu zuôr 30 tsoz zuz ntông txir khơưz nyar lok zos txir khơưz đuz lok chos pêv têx liêx têz nxaz. Txix pâuz tâu tsưr ziv đhâu ntâu shông chos thiêz tu, nhiv no tix lâus tưz chiv chir krưr chês, chos tâu 500 tsoz txir khơưz; 200 tsoz txir lưv tsiz sôngz txi txir tâu sâu đê. Chiê muôx nzôngr nzông, têx ar nông, tix lâus Quốc tror chos txir lưk pax trâu 5 cxênhz xưv phaz têx xuz ntông txir khơưz, txir lưv tsiz sôngz. Iz chas ntơư, tsênhv chos shơư txir thênhx caz, txir quýt, mo môngk uz no đros thiêz 2,5 ha, 2 ha ntâu txir juôx nhiv kruôr chos, iz ha txir suôz câur. Tix lâus Quốc heik: “Cur cơưv ntơưr lớp 2 xưz, viv li tsi pâuz ntơưr, taz sik hur tiz si têx nuv li: Tu zus tsiêx cxu, uô kôngz, chos ntông nox txir puôr lênhx zos zuk cơưv zuk thiêz uô trơưk luôs lưv tus txơưx huôv tsar uô nox nhoz ntâu thax tsav qơư txơưr đuô li tsưr ziv, jux juk uô tâu trơưk têk. Muôx têx heik, cur zos lênhx uô ntêx nyuôs muôz têx zuz nôngz yiêz lok tsêz chos ntơưv jok no. Chiê têx tsoz chos tsi trâul caz hmoz tho nox uô ruôr hiêv, sâu tâu nju, cur thâuv tưs tưz sir jos tu, qênhz shuôs tsi so, tsuôs yuôx tuô lov caz hmoz trơưk tsưr ziv kriê. Niêx shông, pov chuôz zis muôx phênhv sâu tâu txix chos têx tsoz chos nox txir, viv li tsôngv cưr tix nênhx tsa sơưr đơưk hâur jok, nhoz jê iz ndis thax tsav puôr lênhx tuôx cơưv shâuv, uô trơưk”.

Thâuv ntêx, tix lâus chuôz zis thiêz tsôngv cưr tix nênhx tsa hâur jok têx tsiêx cxu puôr lênhx zos tso lak yar pêv têx har jâuz. Tix lâus Quốc seiz pov, tu zus li no cê pôngz côngk đas jos muk zus tsiêx, cê tsi muôx six hơưv, hnuz nhôngs tu têx tsoz chos txi txir, iz chas co chor nhux tưv cux trâul zôngr, caz uz no grê, tov… Txix têx li co, tix lâus tưz quyết tinhv chaz lơưr chor tsiêx lok uô qơư cơư, hlêis jâuz puz chiê zôngx ziv tu zus, tix lâus chuôz zis cux chos 5 cxênhz xưv phaz tâux, chos tsơưz, bax tsês têx kuôr blêx trâu nhux tưv tâu nox. Uô jông trơưk tsưr ziv kriê lok sâuv tu zus tsiêx cxu, hâur tix lâus chuôz zis qơư cơư tsiêx thâuv tưs tưz muôx txos 10 tơưv tus hênhr nhux, iz shông muôz têx nhux lox muôs grêix, ho tror zuôr chor nhux mê lok zus. Hok têx qir tsiêx cxu mak chuôz zis zôngv fmông trâu tsoz chos, paz txo grêk tsơưs nhiêx txiêx zuôr qir zuôv, tsoz chos hloz lox jông, txi txir ndư, taz por truôx tuk vêv xênhz zav nox, muôx phênhv sâu tâu: “Cheix ntux sor, chuôz zis qêz suô têx qir tsiêx cxu hur si, iz hnuz 2 jiês thâuv tas cik sơưr nzor thiêz zar zuôr tsâuk ntux, tsi chiê têx qir kiêk nênhs njuôr hâur qơư cơư tsiêx li tsi yuô muôx zôngr, tsi muôx moz huôv xênhz. Cheix ntux no mak muôz ntâuz tax lok xor thêir iz ndis, muôz kuôr blêx, xuô blêx puô hâur kaz chiê nhux tưv pư cov sor. Iz chas co cux cxax yuôx phax phôngz moz ơưk lơưr canr bôv kho moz tsiêx cxu kriê….”.

Txix chos têx tsoz chos nox txir đros trâu tu zus tsiêx cxu li heik sâuv thiêz krêz qơư muôs hax huv, iz shông tix lâus Quốc chuôz zis muôx phênhv sâu tâu 200 tsov đeiv. Tix lâus cxiv uô tâu vax tsêr jông, zuôr tâu cxix cxuô têx chuôz zênhx phưx vưv luz nênhx xênhz huôx. Tsi tiêk uô bluô nux trâu zuk, tix lâus Quốc thâuv tưs tưz jông siêz, shir phaz lus kriê tsưr ziv, paz têx lênhx nênhs muôx luz nênhx txov nhêv hâur jok huôv tsar uô nox uô hnar. Đros trâu tix lâus Quốc têx cêr paz, pêx xênhv sir jos khưr, hur si jok Mấc Líu muôx 125 chuôz zis, nhiv no tsuôk yuôr 10 chuôz zis pluôs thiêz 10 chuôz zis zuôr xar pluôs xưz. Zơưv Quàng Văn Thương, Bí thư Chi bộ jok Mấc Líu, xã Mường Giôn, huyện Quỳnh Nhai, tỉnh Sơn La heik pâuz: “Tix lâus Quốc chuôz zis zos chuôz zis xuz thơưx hâur jok car xar, car uô hâur hlôngr yiêz zuz nôngz tsoz chos, tsiêx tu zus. Lar heik zos muôz têx txir khơưz, txir mo môngk uz no….lok chos, tu zus tsiêx cxu. Txix tix lâus Quốc chuôz zis tsưr ziv huôv tsar uô nox co, ntâu chuôz zis hâur xã, hâur jok tưz tuôx cơưv shâuv thiêz uô trơưk. Txos nhiv no, phênhv ntâu chuôz zis tưs cux chos têx tsoz chos nox txir thiêz 10 ntâu ziv tưz huôv tsar tu zus nhux iz zav li tix lâus yênhx côngz. Jok tsưr ziv hâur ntu zuôr txos zos, tror vênhv tôngv pêx xênhv huôv tsar chos têx tsoz chos nox txir sâuv ar têz nxaz, zus nhux tưv, krêz đar liêx têz chos tâux uz no….”.

Lơưr zơưv Hoàng Văn Học, Chủ tịch Ủy ban xã Mường Giôn: Xã tưz thiêz tsênhv tror nthuôr đar têx tsưr ziv uô nox li heik sâuv cov hu zâuv tâu ntâu tus chôngz lênhx cơưv shâuv, uô trơưk, huv đros thax tsav qơư, hâur co muôx tix lâus Lò Văn Quốc chuôz zis, paz tsôngv box huôv tsar uô nox uô hnar, muôx luz nênhx tsâu sor: “Trơưk li ntâuk grê, muôx nhos 50% chuôz zis hâur tas nro xã Mường Giôn muôx luz nênhx vav mênhx. Co zos têx tsov iêr chi cax chiê luôs lưv tus cơưv, uô trơưk, hâur ntơư ntơưv Mấc Líu muôx tix lâus Lò Văn Quốc chuôz zis. Nhiv no tix lâus Quốc chuôz zis tâu seiz zos chuôz zis muôx kinh tế truôx tuk đuô hur si hâur jok thiêz tâu sơưr đơưk cơưv shâuv, uô trơưk”.

Đros trâu têx côngz đas jos paz tsôngv niêv txir cưr tix nênhx tsa huôv tsar uô nox, tix lâus Lò Văn Quốc tưz tâu Chủ tịch Ủy ban tỉnh Sơn La muôz ntơưr kruôs, viv paz ntâu trâu xã uô tiêr luôs hâux lưv cxiv tsa jêx jok yiêz./.

Đức Anh-Riê Lâux cxeik, nhênhv