Lênhx hluôk Hmôngz sir jos hla đhâu yeiz pluôs

Sir jos hla cov đhâu yeiz pluôs, tsi xar njiz trâul txox cêr txov, tix lâus Chảo Xênhv Zax, nhoz xã ntus đriv Dào San, huyện Phong Thổ, tỉnh Lai Châu tưz huôv tsar tsưr ziv chos têx txir dâu tây. Lênhx hluôk tuz nênhs Hmôngz tsưr ziv uô bluô nux ntơư zos iz kro jông trâu tsôngv px nhoz ntus đriv sir jos hla đhâu yeiz pluôs.

Vax dâu tây

Xênhz thiêz hloz lox nhoz jok Lèng Chư xã Dào San, lênhx hluôk tuz Chảo Xênhv Zax (xênhz zus shông 1991) thâuv tưs tưz xar njôngr lok cêr huôv tsar uô bluô nux sâuv chênhr zuk thax tsav qơư nhoz. Shông 2014, txơưv tiêk cơưv tas ntơưr cao đẳng lok sâuv kho têx tênhv tênhz, kho meir uz no......ntơưv Phú Thọ, taz sik Chảo Xênhv Zax cux tror lok zuk qơư nhoz chiê huôv tsar chos têx txir dâu tây.

Chox pêz muk seiz shuôs Chảo Xênhv Zax vax txir dâu tây, Trung úy Hoàng Văn Lịch, nhoz đội heik thiêz kriê px huôv tsar uô nox, Zênhx pênhz phax Dào San, Bôv đôiv pênhz phax tỉnh Lai Châu heik: “Đros thiêz tsôngv px nhoz thax tsav ntus đriv, lar heik zos ntơưv xã Dào San mak luôs hâux lưv chos poz cưk, uô blêx lok sik cxuô zav tsoz chos ntông nox txir mak zos têx hâux lưv uô niêx hnuz hâur cxiê shông, hok Chảo Xênhv Zax tsưr ziv chos tsoz chos txir dâu tây zos iz tsưr ziv huôv tsar uô nox yiêz nhoz thax tsav no”.

Nhoz tok muk seiz shuôs tsưr ziv huôv tsar uô nox ntơư, zos lênhx hluôk Chảo Xênhv Zax, tus nênhs mê tsơưr, tsi yuô lox, taz sik muôx txux chi jông. Tis seiz njiê đêz trâu iz thax tsav qơư ntơư, pêz zôngx ziv pov Chảo Xênhv Zax vax txir dâu tây jông njuôz xiêz, txi txir liêz pok vos chuôs tsi iz ntar trôngz. Chảo Xênhv Zax shir phaz heik: “ Ciês thâuv tsênhv muk cơưv ntơưv tsêr cơưv Cao đẳng nhoz Phú Thọ, tâu iz lênhx fôngx zưs sưv jông thav kriê lok tsưr ziv uô nox heik sâuv, cur tưz xar tiêk, cơưv tas ntơưr, cur zuôr lok huôv tsar uô nox lơưr faz tsưr ziv co nhoz zuk thax tsav qơư. Đhâu nriêr pâuz, cur seiz pov nhoz suôv qơư no lok six jông chos thiêz huôv tsar zav tsoz chos nor. Chênhr li ntơư, đhâu hlo cơưv tas ntơưr, cur tưz tror lok chiê sir jos huôv tsar chos zav tsoz chos txir dâu tây hâur zuk chuôz zis têx liêx têz”.

Đhâu sik thav đros Chảo Xênhv Zax, pêz tâu pâuz, nưk qir têk chos zav tsoz chos co txix shông 2015. Hâur zuôr xar 2 shông đhâu, tiv tsi yuô tâu muôx tsưr ziv chos thiêz tu, viv li tsi so trâul têx caz hmoz tho nox uô ruôr hiêv thiêz tsi yuô muôx txâuk đêx zưs. Ntâu jiês, Chảo Xênhv Zax tưz xar muôz tso tsês tsi uô, chiê zok nriêr uô lưv zav hâux lưv txơưr đuô, viv tsi muôx tsưr ziv, tsi muôx nhiêx txiêx thiêz ho zos iz lênhx lox tôngv chênhr hâur chuôz zis muôx 5 lênhx nênhs nhoz uô cê, niêv thiêz txir pov, xuz thơưx têx tsoz chos co uô tsi trơưl têk, lơưr chor lâuk cux heik tsi xar khênhr uô thiêz xar cov mul zok nriêr uô lưv zav hâux lưv txơưr đuô. Ntâu jiês xar, Chảo Xênhv Zax tưz iz siêz muk chuôs njiz canr bôv kôngz nuv hâur huyện chiê tâu heik kriê tsưr ziv huôv tsar chos zav tsoz chos dâu tây, viv li Chảo ziv muôx nzir cêr chiê siêz sir jos uô trơưk faz tsưr ziv no.

Chox pêz muk ndis seiz vax txir dâu tây, Chảo Xênhv Zax heik pâuz nzir, dâu tây no đar zuôr xar 5 cxênhz xưv phaz. Têx nôngz zuz zav tsoz chos co, phênhv ntâu Chảo gra txix Sơn La lok, muôx iz cxiê zav zuz mak gra ntơưv Đà Lạt lok chos. Iz tsoz zuz thiêz côngk đas jos tu, Chảo tas nhos 20 cxênhz txos 30 cxênhz đeiv. Iz chiv, têx txir txi tâu muôx 3 luz hlik txơưv jông sâu đê muôs. Xav kror đruôz đraz đhâu yưx tas têx nhiêx txiêx ntiêr nênhs uô thiêz tsoz phưz....., iz chiv Chảo Xênhv Zax sâu tâu 70-80 tsov đeiv.

Tsôngv box....! Phênhv “nôngx mênhx zuôr tsuv pâuz” hnuz no tsuôk xâuk li no xưz. Phênhv no zos Cơ quan Đeix TNVN nhoz faz Tây Bắc sik côngv đros Tsênhv qơư cxiz kôngz têz qơưk uô./.

(Tsu Vưx cxiv sâu-Riê Lâux cxeik-Txâur Vax nhênhv)