Uô bluô nux txix tu zus tưv txix 75 triệu đêiv

Iz hâur chor nênhs sir jos khưr uô nox chiê hla đhâu cêr pluôs thiêz jux juk uô bluô nux sâuv thax tsav qơư nhoz zos tix lâus Mir Nar Xênhv Vax, mênhx cxưx Hmôngz nhoz jok Bản Tòng, xar Niêm Sơn, huyện Mèo Vạc, tỉnh Hà Giang ziv chuôz zis.

Thâuv ntêx, tix lâus Nar chuôz zis zos chuôz zis pluôs hâur xar, chuôz zis tsik so trâus yêiz plaz thâuv chêix kôngz lôngk tsik tâu siêr. Tsik chưx yêiz pluôs li co, đhâu ntâu shông xar, tix lâus Nar tưz nriêr tâu tsưr ziv trâu zuk uô nox zos sir jos tu zus huôv tsar chor tưv lơưr saz hax huv. Chiê huôv tsar tu zus tưv mak tsuv muôx nhiêx pênhr chiê zuôr nôngz thiêz uô tsêr guôx, tix lâus Nar chuôz zis tưz khov trâu Hôiv Nôngx mênhx xar sơưr bê chiê txêik nhiêx hâur zênhx hangx Tsênhv chêi xar hôiv huyện Mèo Vạc 75 triệu đêiv. Txix chor nhiêx no, tix lâus Nar tưz muôz zuôr 4 tuk tưv nôngz tas 60 triệu đêiv, chor nhiêx tsênhv yuôr tix lâus zôngv chiê uô tsêr guôx thiêz chos xar muôx 0,8 héc ta tâu nxưx. Thâuv chos tâux, tix lâus Nar chuôz zis tsênhv tâu huyện paz zuz nôngz thiêz canr bôv cxơưz cxiz uô kôngz paz lok kỹ thuật.

Cê huôv tsar tu zus, tix lâus Nar cê nriêr pâuz, cơưv shâuv kỹ thuật đhâu têx ntâuz ntơưr cux xưk li đhâu Trạm cxơưz cxiz uô kôngz thiêz Trạm Thú y huyện li chor jiês kruôz kriê lok kỹ thuật tu zus thiêz phax tar caz moz trâu chor tsiêx cxu. Iz chas co, tix lâus tsênhv muk ndis shuôk, nriêr pâuz thiêz cơưv shâuv chênhz zênhv txix chor chuôz zis uô tâu nox sâu thax tsav.

Khov gruôs sir jos cơưv shâuv, tix lâus Nar chor tưv hloz lox huôv tsar sêi. Đhâu iz shông ntâu tuz zus, txos hli 5/2018, tix lâus Nar tưz muôs pêz tuk fơư tưv tâu xar muôx 110 triệu đêiv, iz tuk mâuv tưv tâu tix lâus tu zus chiê sha mê nhuôv. Pov tu zus tưv sâu tâu liv ntâu, txix chor nhiêx muôs tưv, tix lâus Nar tror yưv pênhr uô đar têx tsêr guôx, zuôr nzir tưv nôngz thiêz chor tưv zuôs lok zus cov tros. Txos kaz shông 2019, tix lâus Nar tưz muôs 5 tuk tưv tâu xar muôx 200 triệu đêiv. Txix chor nhiêx muôs tưv, tix lâus Nar tưz thêv tas chor nhiêx kir txêik hâur zênhx hangx thiêz hâur guôx cux tsênhv yuôr 5 tuk tưv nôngz.

Tâu pâuz, iz chas huôv tsar tu zus tưv, txix shông 2018, tix lâus Nar tưz muôz iz phênhv nhiêx muôs tưv chiê yưv pênhr chos xar muôx 1,2 héc ta poz cưk, chos xar muôx 1 héc ta blêx liêx iz chiv chiê muôx nzir zav nox trâu chuôz zis thiêz zav nox trâu chor tưv. Lơưr tix lâus Nar, thâuv huôv tsar tu zus đros chos kôngz lôngk zuôr paz muôx tâu ntâu kror liv lok kinh têr. Chor qir tsiêx cxu zuôr paz trâu tsoz chos hloz lox jông đuô thiêz tsik tas ntâu nhiêx txiêx chiê zuôr têx qir zuôv trâu tsoz chos. Iz chas co, cxuô zav txix têx kôngz lôngk li nhaz lêx, xuô blêx, kuôr poz cưk cux zos têx zav nox paz trâu chor tưv. Tix lâus Nar puz pâuz: Txix shông 2020 txos nhiv no, iz shông tix lâus chuôz zis tsik so muôz chor tưv phêiz uô ntâu fâuv chiê muôs, xav mak iz jiês txix 5-7 tuk tưv, đhâu co ho zuôr nzir têx tưv nôngz thiêz chor tưv zuôs lok zus cov tros. Chor nhiêx sâu tâu txix tu zus tưv hâur iz shông xar muôx 260-280 triệu đêiv. Đhâu thâuv xav tas cxuô kror mak sâu tâu liv muôx nhos 200 triệu đêiv.

Chor ciêz muôs tưv ntơưv thax tsav tox siêz tsik so muôx chôngz nênhs zuôr muôs, tix lâus Nar hêik pâuz: xar huôv tsar cov tu zus tâu tưv mak xêir nôngz tưv zos kror zov chênhr. Iz chas co cux tsuv bax cov txâuk zav nox trâu chor tưv, tiv zix zos hâur chêix ntux no. Tsêr guôx tsuv tâu uô hur jông thiêz lax nziês, tsik yâu chuô thâuv txos chêix ntux no. Thâuv jêx tưv grêk kik, chuôz zis tsuv bax tơưl trâur uô cov sor trâu chor tưv. Đuô li, tsuv cxax iz cxiê zav yuôx phax moz trâu chor tưv cov tsik trâus muôx moz. Uô ntêx thâuv zuôr muôs txix 2-3 hli, chuôz zis tsik so muôz trâu chor tưv nox nzir têx xuô blêx thiêz krâur cov chor tưv tros sêi thiêz muôs tâu gri siêz. Tâu pâuz, đrâuv tu zus tưv lơưr saz hax huv, tix lâus Nar chuôz zis tsênhv tu zus chor buô ntơưv thax tsav qơư thiêz kêiz tso vax chiê muôx nzir phênhv sâu thiêz phưx vưv trâu luz nênhx.

Tix lâus Hà Văn Thành, Chủ tịch Ủy ban xar Niêm Sơn puz pâuz: tix lâus Mir Nar Xênhv Vax zos chuôz zis tsôngv box Hmôngz uô ntêx hlo hâur xar sir jos huôv tsar uô nox chiê hla đhâu cêr pluôs, sir jos uô bluô nux txix tu zus tưv đros trâu chos blêx thiêz poz cưk.

(Hlôngr suôz): Phênhv “Nôngx mênhx zuôr tsuv pâuz” hnuz no tsuôk xâuk li no xưz. Phênhv no zos Đaix nta suôz Việt Nam nhoz thax tsav faz Bắc uô đros muôx Tsênhv qơư cxơưz cxiz uô kông Têz qơưk đros paz uô./.

(Vàng Lan-Lik Thox cxêik nhênhv)