Lênhx Hôiv viên nôngx mênhx txơưx uô kinh têr

Tsôngv pox nhuôs sơưr đơưk hmor yuô! Hâur phongz yaox hluôk nênhs huôv tsar uô nox, nôngx mênhx txơưx uô nox hênhr, tưz muôx ntâu lênhx hluôk nênhs jêx jok sir jos khưr uô nox ciês sâuv zuk thax tsav qơư nhoz. Tix lâus Đào Duy Thắng, mênhx cxưx Hmôngz, Hôiv viên Hội Nôngx mênhx jok Thành Công, xar Mã Ba, huyện Hà Quảng, tỉnh Cao Bằng zos iz hâur chor chuôz zis uô tâu li hêik co. Chiê pâuz tsênhz đuô, zâuv sơưr đơưk đros mnôngs jax sâu đrav kaz.

Xênhz zus hâur iz chuôz zis uô kôngz nuv nhoz thax tsav tox siêz poz jêz, ar uô nox muôx tsơưs, ho muôx tsik txâuk đêx viv li Mã Ba zos xar txov nhêv tiv zix, ho tâu xênhz zus hâur chuôz zis muôx chôngz lênhx mê nhuôv, muôx txos 7 lênhx cưr tix nuk muôs, viv li ar uô nox hax zav muôx tsik txâuk đuô. Zos tuk nhuôv nzơưs hâur chuôz zis, Thắng tsik so xar, nriêr tsưr ziv chiê uô kinh têr, pov tu zus huv đros, shông 2020 tix lâus Thắng tưz yưv pênhr uô tsêr guôx chiê tu zus nhux tưv sha mê nhuôv. Hâur ntu tu zus, tix lâus tsik so cơưv shâuv chênhz zênhv, thôngx cxix sir zôngv khoa học kỹ thuật, têx tsưr ziv phax  tar caz moz lok trâu tu zus viv li chuôz zis tsưr ziv tu zus tưv sha mê nhuôv huôv tsar jông. Nhiv no, tix lâus muôx 16 tuk tưv sha mê nhuôv, iz jiês tix lâus muôx muôx 20 tuk tưv. Tix lâus Thắng Xênhv Thox puz pâuz: “Đhâu thâuv cơưv tiêr lớp 12 ntơưv tsêr cơưv cxênhx pêz Nà Giàng, cur tror lok ntơưv qơư nhoz chiê huôv tsar kinh têr taz sik njiz ntâu kror phiv liv lok pênhr nhiêx, zuz nôngz, đêx xênhz huôx… cur sir jos cơưv shâuv txix têx cưr tix, nênhx tsa, niêv txir chiê yưv pênhr tu zus nhưx tưv cov tros. Cur oz niêv txir puôr lênhx nhoz hâur Đảng, uô jông lơưr Đảng, têz qơưk têx cêr chêi, tsik so hêik pox nhuôs muôz têx zuz nông yiêz jông lok tsêz chos, tu zus cov paz muôx  tâu kinh têr siêz, tsik mnôngs trơưk chor nênhs fêv têx luk nziêk đas thiêz tsik uô zuôv cêr chêi têz qơưk”.

Đrâuv tu zus nhux tưv sha mê nhuôv, tix lâus chuôz zis tu zus nzir buô xar muôx 20 tuk thiêz tu zus kêiz ol chiê muôx nzir phênhv sâu. Xav luz đraz iz shông yưx tas cxuô zav hâur tu zus, chuôz zis sâu tâu xar muôx 300 triệu đêiv. Tưz tsik zos uô kinh têr trâu chuôz zis xưz mak tix lâus Thắng tsênhv paz trâu chor chuôz zis muôx luz nênhx txov nhêv hâur jêx jok lok chênhz zênhv tu zus chiê huôv tsar kinh têr, gra siêz luz nênhx, yênhx shông tix lâus chuôz zis puôr lênhx tax tâu zos chuôz zis vênhx huôv. Pos Bế Thị Thơm, Phưv Chủ tịch Ủy ban xar Mã Ba puz pâuz: “Xar Mã Ba zos xar tox siêz, 100% chor chuôz zis tưz muôz chor tsiêx cxu yêv muk cơư đêz tsêr nhoz, zos xar muôx chax chês tu zus nhux tưv cov tros thiêz sha mê nhuôv; sâuv thax tsav muôx ntâu chuôz zis tu zus muôx tâu phênhv sâu siêz xưk li zơưv Thắng Xênhv Thox chuôz zis zos iz lênhx nênhs sir jos hâur hlôngr yiêz tsưr ziv uô nox thiêz tưz uô tâu yênhx côngz txix tsưr ziv tu zus nhux tưv cov tros thiêz sha mê nhuôv, xar sêiz no zos iz kror tsưr ziv tsuv tâu kriz uô đêz đar sâuv thax tsav”.

Đros sir jos, ntâu shông sik lơưr liês tix lâus Đào Duy Thắng tâu Hôiv Nôngx mênhx xar Mã Ba jênhv zos nôngx mênhx txơưx uô nox kinh doanh hênhr. Shông 2021 tix lâus tâu Hôiv nôngx mênhx huyện Hà Quảng côngz jênhv zos Chuôz zis txơưx uô nox kinh doanh hênhr. Tix lâus chênhr zos chor nênhs uô ntêx hlo hâur sir jos huôv tsar chiê uô bluô nux thiêz zos lênhx nênhs trâu sơưr đơưk hâur xar cơưv thiêz uô trơưk.

Phênhv “Nôngx mênhx zuôr tsuv pâuz” ciêz no tsuôk xâuk li no xưz. Phênhv no zos Đaix nta suôz Việt Nam nhoz thax tsav Tây Bắc sik côngv đros Tsênhv qơư cxơưz cxiz uô kông Têz qơư uô./.

(Lik Thox cxêik nhênhv)