Nênhs Cho Yên Bái li Txir puôx zêv hâu

          Puôx zêv zos iz zav nox reik đros đreiv hâur tsôngv box mênhx cxưx Cho Yên Bái luz nênhx. Đros pox nhuôs, tsoz puôx zêv tsi taz chiê their nzôngr nzông, uô trur tsêr, mak txir puôx zêv chox lol hâu siêr nox cux lok six kaz thiêz yênhxx nênhs Cho nhoz no li iz zav nox muôx cxôngx nzor lol.    Tsoz puôx zêv khênhr nhoz sâuv tox siêz, ar nxaz. Puôx zêv txi txir thâuv hli 2, hli 3 zênhz lix, sâu đê txir cxôngx hli hli 11, hli 12. Txir puôx zêv thâuv siêr mak tơưr khênhr đuz, iz tsoz muôx 4-6 tơưr txir. Puôx zêv txi ntâu txir, taz sik tsi zos tsoz tưs txi txir cux nox kaz iz zav. Niêv lâuk Lý Thị Phin nhoz jos 3, xã Phúc Lợi, huyện Lục Yên, tỉnh Yên Bái pheiz kênh:          “Tsoz puôx zêv txir kaz tsuv zos tsoz puôx zêv ntêr shông thiêz tiv zix zos tsi cxoz txiêr blôngx mak greix txir puôx zêv thix tuôz, nox tsi pluôk. Txir puôx zêv đê lol zôngv triês nqeik tơưr pov plơưr greix tuôz, liêz mak zos puôx zêv kaz”.

          Lơưr nênhs Cho Yên Bái li chênhz zênhv, chiê xeir tâu puôx zêv kaz mak tsuv phênhz tâu puôx zêv blâuv thiêz puôx zêv txuô. Puôx zêv blâuv muôx plơưr tuôz đuô puôx zêv txuô. Puôx zêv blâuv thâuv siêz mak tơưs plêz nox kaz đuô, muôk đuô, thâuv hâu siêr muôx cuô đax đax ntưs lol. Niêv lâuk Lý Thị Phin pheiz kênh cxaz:“Muôx 2 zav txir puôx zêv zos puôx zêv blâuv thiêz txuô. Puôx zêv blâuv thâuv hâu mak siêr sei đuô. Puôx zêv nox kaz đuô, jôngx đuô thiêz tsi pluôk”.

          Txir puôx zêv uô ntêx thâuv hâu tsov muôz nzuôr cov hur têx môngr jêz, ar thiêz nqeik tơưr cov hur mav li hâu. Puôx zêv hâu lơưr 2 tsưr ziv: muôz txir puôx zêv tso hâur lâux câuz tsâu đêx trâu hâur co txơưv hâu, max mav đo thiêx tsi trâus tơưs muôx nhos 30 phênhz txơưv siêr. Đrâuv co tsênhv muôx iz tsưr ziv hâu thiêz zos râuz đêx bâu uô ntêx mav muôz txir puôx zêv tsu hâur co, vâuv txos thâuv siêr txơưv tâu.Txir puôx zêv thâuv hâu siêr mak nox lok six kaz. Khênhr tâu nênhs Cho Yên Bái nox đros mor blâuv, greix, njês. Lơưr tsôngv box Cho, puôx zav zos iz zav txir ntông chiv chir tuôx, jông trâu lênhx nênhs li đas jos, paz pư jông tsâus jos. Nhiv no txir puôx zêv tsi taz zos nênhs Cho li zav nox kaz mak tsênhv tâu ntâu lênhx nênhs nhoz têx thax tsav txơưr nhiêv nox. Niêv lâuk Nguyễn Thị Hương, phường Đồng Tâm, đrôngs Yên Bái puz pâuz:“ Cxôngx thâuv cur tsênhv zâu tưz tâu nox txir puôx zêv, lok six kaz. Tiv zix zos txir puôx zêv blâuv. Cheix txir puôx zêv tưs cur cux zuôr chiê nox. Cur lok six nhiêv nox zav nox no”.

          Txos cheix txir puôx zêv siêr shông tưs, têx chuôz zis nênhs Cho nhoz Yên Bái cux hâu txir puôx zêv nox lok six kaz, lênhx tưs tâu iz jiês nox siv mak zuôr ndo njôngr txos zav nox kaz no./.

(Thiều Nghiệp- Txâur Vax cxeik nhênhv)