Cxoz txưv uô cxâuv chêr tưr thik thiêz nênhs sơưr thơưx nganhx zaoz zux Sơn La li txơưx jênhv?

          Ntơưv jiês njiz thôngz xor mông đros pov tsir hnuz 23/7, zơưv Hoàng Tiến Đức, Giám đốc Sở zaoz zux thiêz thox cxov Sơn La- lênhx nênhs lov lik jiês thik THPT têz qơưk ntơưv tỉnh no tsi tuôx, uô ntâu lênhx nênhs uô pov tsir xar tsi thôngz. Uô ntêx co, zar hnuz keix hnuz 18/7, uô ntêx 1 hnuz thâuv Bộ zaoz zux thiêz thox cxov tỉnh li tuêv côngz xưv tuôx uô hâux lưv seiz car điểm thik, zơưv Phạm Đăng Quang, Phưv giám đốc Sở zaoz zux thiêz thox cxov tỉnh, lênhx nênhs tâu zơưv Hoàng Tiến Đức heik têz têx lênhx nênhs sâu xor xưv VOV li lul nus tưz khav tênhv, hâur jiês thik nhiv kruôr đhâu, Sơn La tưz uô trơưk têx tsưr ziv, cui tênhv thik. Hâur six hơưv seiz car tsi pov muôx tul tsi tsi jông. Shux xênhz nhoz Sơn La li điểm thik puôr lênhx zos khov txos têx shux xênhz li pênhr xưv txux chi:

          “ Pêz khav tênhv jiês thik tâu uô jông. Đhâu jiês thik siv uô ntêx mak tsênhv yuôr 3 luz hlik chiê tror cơưv shâuv muôz siêz yênhx tưv, têx shux xênhz tsi taz cơưv shâur hâur tsêr cơưv mak iz cxiê chuôz zis tsênhv ntiêr cưk kriê kriê cxaz trâu mê nhuôs. Li ntơưv 3 luz hlik co têx mê nhuôs shux xênhz tsâu siêz cơưv shâuv, tiv zix zos têx môn thik đại học”.

          Đhâu 5 hnuz xav tênhv, seiz car thiêz tơưv txênhz đros têx lênhx nênhs muôx lênhx coaz uô cxâuv, mak têx uô cxâuv hâur jiês thik nhoz Sơn La jux jus tâu yơưz tơưv. Tuêv côngz xưv, Bộ zaoz zux thiêz thox cxov li xor mông tso pov: Têx lênhx nênhs tưz uô cxâuv cui trình thiêz liv zôngv chiê hlôngr shux xênhz li điểm thik, tiv zix zos chêx cuk uô ntêx thâuv xa jax thik trâu Bộ zaoz zux thiêz thox cxov, zos iz hâux lưv uô chiê jav tâu chiz coaz coar lik têz qơưk. Tiv zix zos muôx tsưr tsix thiêz têx cán bộ nhoz hâur Ban chox kriê thiêz Hội đồng thi tỉnh cxaz chuôz. Lênhx nênhs sơưr thơưx hâux lưv no txos nhiv no tâu xav tênhv zos Phưv giám đốc Trần Xuân Yến thiêz 4 lênhx canr bộ nhoz hâur sở. Zơưv Mai Văn Trinh, Cục tsar Cục coar lik tsơưr lươngv, Bộ zaoz zux thiêz thox cxov puz pâuz:

          “ Lơưr cui chế thik THPT thiêz seiz côngz jênhv cơưv tiêr THPT nhiv no, tsưr ziv tsưr tsix uô mak uô lok six jông, huv đros thiêz heik kriê. Taz sik, chêx cuk thik tsuôk tax tâu zos têx hâux lưv tâu uô jông lơưr trơưk cui chêr thik. Têx uô cxâuv hâur Hội đồng thik Sở zaoz zux thiêz thox cxov Sơn La tưz uô cxâuv zov chênhr txos cui chêr thik”.

          Txơưv tiêk tsưr ziv uô cxâuv tâu tsưv ziv uô jông li chas, taz sik têx hâux lưv txơưr tsi lax chiê Hội đồng thik Sơn La pov tâu, pir li hâux lưv por coar jax thik. Lơưr cui chêr shux xênhz li jax thik tsuv tâu por coar jông, huv tso ntơưr, qar thik puôr lênhx tâu xâur thiêz lo ntơưr lơưr cui tênhv heik kriê. Thâuv krêz ntơưr lo tsuv uô biên bản ntâuz ntơưr thiêz muôx lênhx nênhs hlôngr njêx muôs têx thành viên Hội đồng chấm thik nhoz co seiz. Taz sik, têx cui tênhv no tưz tâu Hội đồng chấm thik THPT têz qơưk tỉnh Sơn La shông 2018 krêz uô tsi trơưk tsưr ziv. Meir tính zôngv chiê chấm thik cux tsi lo ntơưr thiêz tâu sir zôngv uô hâux lưv xưk li têx meir tính txơưr, hâur co hâux lưv tror seiz car đuô jax thik đhâu thâuv tâu chấm thik mak cux tsi tâu tâu tsưr tsix uô....

          Đros têx uô cxâuv zov chênhr co, tsôngv box muôx lul nus tiêk lênhx nênhs sơưr thơưx Nganhx zaoz zux thiêz thox cxov Sơn La tsuv muôx txơưx jênhv li chas lok jiês thik THPT têz qơưk shông 2018 thiêz zuôr yưr lir li chas?

          Nhiv no, Bộ công an li đoanx côngz xưv tsênhv tror sâuv cxaz têx ntâuz ntơưr thiêz tơưv txênhz đros têx lênhx nênhs muôx lênhx coaz. Đros têx jax thik trắc nghiệm lok six ntâu, têx lưx lươngv muôx txơưx jênhv cux tsênhv sir jos qênhz yuôx uô tsênhz mênhx hâux lưv uô cxâuv no./.

                                  (Thanh Thủy- Txâur Vax cxeik nhênhv)