Chiê pêz hêir Hmôngz têx suôz kênhx đros đrêiv tsôngv px nhoz xã Nùng Nàng

Hnuz tưs cux li, thâuv têis cik sơưr nzor hnuz ciêz yênhx hli, ntơưv tsêr vênhx huôv jos Lao Tỷ Phùng, xã Nùng Nàng, huyện Tam Đường, tỉnh Lai Châu, tsôngv px sđ tưz tuôx muôx njêx muôs cxix cxuô chiê cơưv shâuv yuôz pêz Hmôngz têx suôz kênhx, đhiê kênhx. Ntơưv no, tsôngv px thiêz tsôngv kruô cux shir phaz lul yuôz kênhx nthuôr uô cêr lov jêv, sik phêiz kênh têx njiêz luk khơưk tsês thiêz huôv tsar truôx pêz Hmôngz têx txux chi kênhx cxôngx nzor. Đros trâu tsưr ziv, siêz xar njôngr tuôr cov tâu truôx zuk hêir nênhs têx txux chi, vênhx huôv jông cov muôx đros đrêiv hâur luz nênhx niêx hnuz, txuôk đros huôv tsar cxuô qơư, ndis huôk têz qơưs. Txix shông 2020, Qơư khơưk tsês thiêz huôv tsar pêz Hmôngz txux chi kênhx jos Lao Tỷ Phùng, xã Nùng Nàng, huyện Tam Đường tưz tâu cxiv tsa, muôx 22 lênhx. Cxuô lênhx uô hâux lưv khơưk tsês têx txux chi kênhx co,  hnuz nhôngs lâuk, hluôk tsik siz thôngx, taz sik sđ têx tsưr ziv siêz xar cux xar cov tuôr tâu truôx zuk hêir nênhs têx txux chi, vênhx huôv jông cxôngx nzor tsik chiê pôngz plox. Zơưv Cường x Chang nhoz jos Chin Chu Chải, xã Nùng Nàng, huyện Tam Đường hêik pâuz: “Qơư khơưk tsês thiêz tsiv uô pêz Hmôngz têx kênhx no, pêz cux tsik so chox muk yuôz nthuôr uô cêr lov jêv trâu têx hnuz tỉnh, huyện kriz ntênhk hội. Cur đros uô hâux lưv tsiv uô kênhx cux tsik so gra kênhx muk yuôx nthuôr uô cêr lov jêv, zos huyện, tỉnh tsưr tsix”

Pêz hêir nênhs Hmôngz nhoz Lai Châu cux li cxuô hêir nênhs tsơưs hâur thax tsav, hâur ntu khưr huôv tsar uô kôngz lôngk, pêz Hmôngz cux pâuz tsiv uô tâu ntâu zav txux chi jông huv đros đrêiv zuk hêir nênhs luz nênhx nox nhoz muk lok hâur niêx hnuz. Hâur ntơư, kênhx cux zos iz zav txux chi, vênhx huôv jông tâu sir zôngv nthuôr uô cêr lov jêv thiêz tâu sir zôngv uô đaz uô kruô. Zơưv Dũng x Thox zos iz lênhx cưk pâuz yuôz kênhx nhoz xã Nùng Nàng, huyện Tam Đường hêik pâuz:“Txix thâuv tsênhv zâu cur tưz pâuz txos pêz Hmôngz têx kênhx, thâuv cur muôx 13 shông cur tưz cơưv shâuv yuôz kênhx. Pêz Hmôngz têx kênhx tâu sir zôngv uô đaz uô kruô thiêz tâu chox muk yuôz nthuôr uô cêr lov jêv hâur têx hnuz kriz ntênhk hội. Chênhr zos li hêik ntơư, txix thâuv muôx 16 shông, cur tưz cơưv shâuv pâuz tsiv uô tâu kênhx chox lok sir zôngv thiêz muôs trâu ciêz đrôngl”

Chiê khơưk tsês tâu truôx pêz Hmôngz têx txux chi, vênhx huôv jông cxôngx nzor cov muôx đros đrêiv hâur luz nênhx, hâur ntâu shông đhâu hâu nov cxuô tsênhv qơư hâur thax tsưav tỉnh Lai Châu tưz muôx phênhv nhiêx paz cxơưz cxiz tsôngv px sđ huôv tsar truôx têx txux chi, vênhx huôv jông txuôk đros huôv tsar qơư ndis uô si, sêiz shuôk têz qơưs. Zơưv Hảng A Nhà, Phưv Chủ tịch ủy ban xã Nùng Nàng, huyện Tam Đường, tỉnh Lai Châu hêik pâuz nzir: “Chor cưk yuôz kênhx, cưk tsiv uô kênhx hâur thax tsav xã Nùng Nàng tưz paz tâu qơư tsês thiêz huôv tsar truôx têx txux chi, vênhx huôv jông cxôngx nzor. Hâur ntu đhâu, chor cưk yuôz kênhx, cưk tsiv uô kênhx tưz  tror cxênhz đuô têx txux chi, vênhx huôv jông co; lar hêik zos txux chi kênhx, cxuô jax đhiê kênhx”

Luôs hâux lưv khơưk tsês thiêz huôv tsar truôx têx txux chi, vênhx huôv jông tsiv grê, hâur ntơư muôx pêz Hmôngz txux chi kênhx tưz tâu hâu nov hâur thax tsav tỉnh Lai Châu moz siêz txos txuôk đros huôv tsar cxuô qơư ndis uô sik, sêiz shuôk têz qơưs. Thiêz ntơư cux chênhr zos iz luôs hâux lưv cxơưz cxiz pêz hêir nênhs Hmôngz huôv tsar truôx zuk hêir nênhs têx txux chi, vênhx huôv tsiv grê, paz phênhv trâu cxuô hêir nênhs VN muôx ntâu txux chi, vênhx huôv jông huv đros hâur luz nênhx./.

                                         Tsu cxêik nhênhv-Khắc Kiên, CQTT Tây Bắc