Jông siêz tir tar tâu tros châuz nhoz cêr yuôv ntus đriv Lào Cai

Oz pêz châuv shông tưz đhâu muk, zơưv Lê Quốc Việt cux tsênhv ndo njôngr txos têx qơư chiê nênhs nhoz tir tar thiêz 9 lênhx nênhs sêiz jor kror qơư no li tsưr ziv sik côngv tir tar tâu jông thâuv hmo ntux hli 2 shông 1979.

Phênhv ntâu chor chiến sĩ sêiz jor ntơưv kror qơư no zos hluôk nênhs Cộng sản Hồ Chí Minh, thiêz zos xar viên Hợp tác xã. Đrâuv oz lênhx nênhs tưz muk uô tuz lênhv, tsênhv yuôr mak tsuôk muôx 18 txos 20 shông; hluôk tiv zix nhiv kruôr muôx 17 shông, tsênhv cơưv lớp 9. Taz sik, tas nro sơưr đơưk tsik muôx nênhs nyêi thiêz cxơưx txos cêr txov hlo, tsuôk xar cov tâu cxaz chuôz ntâuk tros châuz por vêv ntus đriv. Zơưv Việt hêik pâuz:“Pêz zos chor nênhs nhoz ntơưv qơư lơưv viv li tsik nyêi đaz tsi hlo. Zos nyêi mak pêz tưz khiêr lok txix thâuv nzor lơưv. Xav xưk li hnuz 17 tros châuz piz ntâuk tuôx, taz sik pêz ntâuk trâu hmo 18, têis cik sơưr nzor 19. Pêz kror qơư ntâuk tros châuz mak tsik muôx nênhs pâuz tâu, tsuôk pư jê ntơưv cêr xưz, njuôk xav tros châuz zuôr tuôx muk đhâu ntơưv no, zos tưz tuôx muk đhâu mak zênhx njiz trâus xưz”.

Qơư tự vệ no sêiz jor ntu muôx 1 cêik cêr txix qox Hồ Kiều txos cêik cêr 1 Txox cêr 70, zos kror qơư zâu xưz taz sik zos đôiv tự vệ thị xar Lào Cai thâuv ntêx li kror qơư lok six zov chênhr.

Têx hôngz poz lêiv muk, hôngz poz chơưk tsês, fov lox, xor hlâu, fov cxuô zav tâu sir zôngv tas hur si, đros trâu tập thể sêiz jor ntơưv qơư no li txơưx xar tơưv, sir jos tưz paz ntâuk tâu zênhx liv lox: tir tar tâu oz luz yêz xe tăng, ntâuk zênhx chor tros châuz muôx chôngz đuô zuk lok six ntâu, tir tar chor tros châuz ntâuz tuôx txix ciês ntơưv kror qơư no muôx 6 six hơưv, paz trâu pêx xênhv thị xar khiêr muk đrêiv ngaz tuk.

Nênhs sơưr thơưx sêiz car ntơưv qơư jor Kiều Đình Cát puz pâuz, đhâu jiês tir ntâuk tâu truôx jông, tas nro chor nênhs tir tar ntâuk tros châuz ntơưv no tưz txar lok trâu kror qơư tov kaz, paz ngaz tuk trâu tas nro cxuô lênhx nênhs. Iz lênhx nênhs hâur chor nênhs tir tar no tov kaz no tâu kruôk zos Zênhx shôngx lưx lươngv vũ trang nhân dân. Co zos hêik txos pêz tsưr ziv ntâuk du kích, đros muôx tsưr tsix Đảng ntơưv thax tsav qơư li siêz njênhs njôngr, chox kriê ndar six hơưv, huv zos:“Đros muôx sơưr đơưk hâur qơư sêiz jor tir tar co li sir jos. Cur cux hêik trâu sơưr đơưk tiêk, pêz tso siêz viv tưz gôngr côngv tâu iz phênhv đas jos trâu côngz xưv por vêv ntus đriv têz qơưk, iz thiêr lok cux tsik txar, tsik nyêi trâus tuôs hlo. Kror co hêik tơưv tâu cêr tso siêz, truôx siêz, muôx siêz njênhs njôngr trâu Đảng, njênhs njôngr trâu zênhx liv”.

Đhâu tir ntâuk tros châuz, chor chiến sĩ sêiz jor ntơưv kror qơư no ho tror sir jos cxiv tsa têz qơưk, nênhs uô cưk kriê ntơưr, nênhs uô tsưr doanh nghiệp, nênhs tâu xav chiê khơưk kruôk zos Cưk kriê ntơưr ưu tú, nênhs uô Trưởng Ban cxiv tsa Đảng Tỉnh ủy… Yênhx shông, chor jiês sik njiz cux tsênhv tâu tsưr tsix chiê tror tis njiê thiêz thav txos ntu nênhx đrav ntêx co.

Ntâuk tros châuz nhiv no tưz đhâu muk lơưv đêz. Tuk qox Hồ Kiều hla đhâu đêx Nậm Thi txuôk jông oz saz ntus đêx nhoz ntus đriv Lào Cai-Hà Khẩu, muôx chôngz tàu thâux hax huv, pêx xênhv, tsôngv kruô muk lok chôngz hâur yênhx hnuz. Txox cêr lox 70 tâu kho lox jông đuô muk trơưk thax tsav ntus đriv, ntus đriv oz saz têz qơưk nhiv no tưz muôx pêx xênhv têx vax tsêr tâu cxiv uô lox thiêz ntâu jux juk./.

                                                                     An Kiên-Lik Thox cxêik nhênhv

Yên Bái taz por luôs hâux lưv seiz njuôk shuôs moz hâur shôngk shông yiêz

Chiê taz por hâux lưv seiz njuôk shuôs, kho moz thiêz tsoz phưz đas jos trâu tsôngv pêx xênhv hâur ntu no, Sở Y tế tỉnh Yên Bái tưz tso tơưv luôs hâux lưv tsênhv tsênhz, chox kriê cxuô taz viv hâur ngênhx y tế txix tỉnh txos cxuô qơư seiz njuôk shuôs, kho moz gênhk thiêz muôx txâuk yuôx, lênhx nênhs, chuôz zênhx seiz njuôk shuôs, kho moz. Iz chas co, têx qơư y tế tưz phênhz canr bôv, y, bác sĩ nhoz trơưr ntơưv qơư, bax cxix cxuô têx yuôx, chuôz zênhx, txax trâu nênhs moz tuôx nhoz pư....chiê phưx luôs hâux lưv seiz njuôk shuôs, kho moz gênhk thiêz chơưv kho chor nênhs trâul moz hnhar, têx lênhx trâul ntos yêz, trâul kâus tưx uz no..... Pos Trịnh Thu Hoài, Bác sỹ Chuyên khoa 2, phưv Giám đốc tsêr kho moz đa khoa tỉnh Yên Bái heik pâuz:“Pêz thâuv tưs tưz tso trơưr nênhs nhoz ntơưv qơư uô hâux lưv, txix têx hloz txos trâu têx khoa, phongx. Lok sâuv chuôz zênhx, yêz thâux xa nênhs moz mak pêz puôr lênhx muôx nhoz đreiv ntơưv qơư chiê thâux xa chor nênhs moz hnhar thâuv zuôr trâul txos. Đros thiêz nênhs moz tuôx nhoz kho moz gênhk hâur tsêr yuôx, pêz qơư uô jâuz mor nox hâur co thâuv tưs cux uô thiêz bax txâuk têx pluôk nox hur si”.

Bác sỹ Phạm Thanh Hương, Phưv Giám đốc tsêr kho moz Đa khoa thax tsav Nghĩa Lộ heik pâuz, ntơưv no zos qơư lênhk txeik thiêz seiz njuôk shuôs, kho moz trâu tsôngv pêx xênhv cxuô huyện, thị xã faz Tây tỉnh Yên Bái. Tsêr kho moz tso nênhs nhoz trơưr ntơưv qơư chiê tok txeik thiêz uô hâux lưv seiz njuôk shuôs, kho moz trâu nênhs moz tuôx seiz njuôk shuôs moz gênhk:“Pêz tsêr kho moz cux tưz bax cxiv tsa tsưr ziv, lênhx nênhs, chuôz zênhx phưx vưv uô hâux lưv seiz njuôk shuôs, kho moz. Tiv iz zos pêz tso nênhs nhoz đreiv ntơưv qơư uô hâux lưv. Tiv 2, phênhz côngz lênhx nênhs lês uô têx hâux lưv seiz njuôk shuôs, chơưv kho moz zênhx max 115 muk nhoz têx qơư tsưr tsix ntênhs hội. Tiv 3, bax lênhx nênhs uô hâux lưv fêis kho moz gênhk chiê chơưv paz zênhx max chor qơư kho moz thênhv kis thâuv zuôr trâul ntơư”.

Hâur têx khoa chênhr kho chor nênhs trâul moz hnhar ntơưv tsêr kho moz Đa khoa thax tsav Nghĩa Lộ, thâuv tưs cux muôx ntâu nênhs moz. Chênhr viv li, tsêr kho moz tưz tso nzir chor bác sỹ, cưk yuôx coz hâur têx khoa txơưr đuô tuôx đros paz uô hâux lưv seiz njuôk shuôs, kho moz trâu lênhx nênhs moz. Đros thiêz thax tsav lox đar, ntâu qơư phiv liv muk lol viv li tsêr kho moz tsênhv yênhx lix têx paz nênhs uô hâux lưv seiz njuôk shuôs, kho moz saz đrâuv tsêr yuôx, thâuv tưs muôx lênhx nênhs trâul moz hnhar mak zênhx max sơưr cêr muk uô hâux lưv seiz njuôk shuôs kho moz. Bác sỹ Nguyễn Dương Quyền, Khoa hồi sức tích cực, tsêr kho moz Đa khoa thax tsav Nghĩa Lộ heik:“Chiê taz por luôs hâux lưv seiz njuôk shuôs cux li kho moz gênhk, tsoz phưz đas jos trâu nênhs trâul moz hnhar, Khoa hồi sức tưz muôx tsưr ziv fuô uô tsênhv tsênhz. Lok sâuv lênhx nênhs, khoa  tưz phênhz canr bôv nhoz trơưr ntơưv qơư uô hâux lưv chiê seiz njuôk shuôs, kho moz gênhk trâu nênhs moz. Iz chas ntơư, cux phênhz côngz, choz nzir hâux lưv trâu yênhx lênhx nênhs zos thâuv tưs muôx ntâu nênhs moz hênhr mak zênhx max đros paz seiz njuôk shuôs, kho moz gênhk trâu pêx xênhv”.

Đros trâu têx qơư hâur seiz njuôk shuôs, kho moz, têx taz viv y tế dưv phax cux tưz bax cxix cxuô chuôz zênhx, yuôx phax phôngz moz gênhk. Thạc sỹ, bác sỹ Nguyễn Trọng Phú, Phưv Giám đốc Tsênhv qơư qênhz njuôk shuôs moz gênhk tỉnh Yên Bái heik pâuz: Taz viv sir jos uô luôs hâux lưv seiz kaz chiê qênhz pov nzor, xưv lik zênhx max têx lênhx nênhs trâul moz xuz thơưx, tsi chiê ntâu tus chôngz lênhx trâul moz: “Tưz qênhz shuôs đuô têx chuôz zênhx, yuôx phax tir thêir moz hâur tsênhv qơư qênhz njuôk shuôs moz, hur si tsênhv qơư y tế huyện, thị xã, TP hâur tỉnh, bax jông luôs hâux lưv phax tar têx moz gênhk”.

Đros trâu ngênhx y tế bax jông cxuô zav li heik sâuv, chor nênhs nhênhz chơưv cux heik, chiê taz por đas jos trâu zuk thiêz têx lênhx nênhs hâur tsêr, tsôngv pêx xênhv tsuv sir zôngv têx zav nox hur, pâuz tsênhz qơư, hnar tsôngk tril yo sor si hâur têx hnuz no njiv chiê tsi trâul muôx moz, lar heik zos chor nênhs lâul hnuz nhôngs siêz thiêz nhuôs zâu. Tsi hâuk chơưr bia uô ntêx thâuv zuôr tsar yêz muk lol tâus cêr chiê tsưx phưv đas jos trâu zuk thiêz côngv thôngx./.

                                                     Đinh Tuấn-Riê Lâux cxeik, nhênhv