Cheix ntux yiêz sor si nhoz tox siêz Yên Bái

Shông đhâu, tas nro tỉnh Yên Bái tưz paz max zuôr xar 44 tyv đeiv chiê pêx xênhv huôv tsar uô nox. Tsênhv tsênhz, tưz paz uô 25 dưv anr huôv tsar uô nox lơưr tsưr ziv yiêz; paz lok sâuv tu zus nhux tưv; huôv tsar chos jôngr ntông…. Txix co, paz tsar ndê tas nro têx xiv kôngz-jôngr-đêx nuv shông 2022 tax zuôr xar 5 cxênhz tyv đeiv. Zơưv Lê Trọng Khang, Chủ tịch Ủy ban huyện Mù Cang Chải, tỉnh Yên Bái heik pâuz: “Huyện tưz sir jos piêr kriê têx tsưr ziv tu zus tsiêx cxu cux iz zav li tu têx tsoz chos ntông nox txir thiêz uô lơưr sik côngv nhoz HTX, doanh nghiệp đros pêx xênhv taz por jông”.

Têx pêx xênhv sik côngv đros doanh nghiệp huôv tsar uô kôngz nhoz tox siêz Yên Bái nhiv no tưz muôx ntâu, tso pov tsôngv box cxuô heir nênhs tsơưs li txux chi tsưr ziv jênhv pâuz tưz hlôngr yiêz, gra lok têx muôx liv, paz cxơưz luz nênhx huôv tsar, vav mênhx.

Huyện Trấn Yên zos thax tsav chos ntâu đuô hur si têx jâuz caz hâur tỉnh Yên Bái, muôx 300 ha ntâu thiêz 1.500 chuôz zis đros cxaz chuôz; chor lưk caz tax iz cxênhz ntâu tênhr, gra lok phênhv sâu tâu 200 tsov đeiv iz ha. Ntơưv thax tsav qơư co nhiv no tưz yênhx lix têx paz sik côngv đros chor qơư uô luôs hâux lưv heik sâuv tsiv uô thiêz sâu zuôr têx lưk caz. Nhiv kruôr no tsêr meir tsiv uô caz chaz xor nhoz công ty chos jâuz caz, tu zus caz chaz xor Yên Bái cux tưz qir uô hâux lưv, sik côngv đros pêx xênhv huôv tsar uô li heik sâuv. Zơưv Trần Đức Tiến, Chủ tịch Ủy ban xã Bão Đáp, huyện Trấn Yên heik: “Pêx xênhv hâur xã Bão Đáp thâuv tưs tưz sir jos khưr uô nox, moz siêz trâu têx luôs hâux lưv chos jâuz, tu caz chaz xor, tâu tỉnh, huyện muôz jông six hơưv, chor công ty tưz tuôx yưv pênhr huôv tsar uô nox hâur thax tsav, txix ntơư muôx qơư sâu zuôr truôx tuk têx jâuz caz thiêz lưk caz”.

Đros trâu huôv tsar kinh tế, pêx xênhv tox siêz Yên Bái cux paz ntâu côngz đas jos trâu cxiv tsa jêx jok yiêz. Zơưv Nông Văn Vị nhoz jok Trại Phung, xã Tân Nguyên, huyện Yên Bình heik, shông nhiv kruôr đhâu tưz chiv chir muôz iz kro ar ntêr nhos 500 thiêr, đar 7-10 thiêr thiêz 500 tsoz ciêv fix muôx 5 shông ntor por tsês chiê krêz uô đar cêr jông muk lol trâu 200 ntâu chuôz zis. Zơưv Vị shir phaz heik pâuz: “Cur chuôz zis tưz tsi zuôr đaz tsi hlo, chiv chir muôz ar têz chiê krêz uô cêr cov đar, sđ zôngx ziv muk lol xưz”.

Nhoz Yên Bái, hâux lưv cxiv tsa jêx jok tsi tiêk moz siêz txos yưv pênhr cxiv tsa têx côngz trênhx hâur jêx jok, tsênhv tsưv ziv txos pêx xênhv luz nênhx xênhz huôx, nox nhoz muk lol thiêz. Thôngz đhâu cấp ủy đảng, hâu nov, têx đoanx thêv ntơưv qơư cêr moz siêz chox car, thiêz côngv thôngx sơưr đơưk sik thôngx siêz đros paz, ntâu chuôz zis pêx xênhv tưz hla đhâu cêr pluôs, muôx nox muôx hnar, muôx hâux lưv uô thiêz phênhv sâu tâu truôx, ntâu ziv chuôz zis pluôs cux tưz muôx tsêr yiêz nhoz, tok nox iz luz tsiêz 30 shir phaz, lov jêv.

Niêv lâul La Thị Ngọc nhoz jok Trại Phung, xã Tân Nguyên, huyện Yên Bình nhiv kruôr chox kruô muk ndis shuôs luz tsêr yiêz nhiv kruôr uô tâu shir phaz heik pâuz: Khov muôx Cuiv nhiêx paz uô tsêr niêv côngv siêz paz 40 tsov đeiv, đros trâu chuôz zis têx nhiêx txiêx cxênhx txuôs thiêz kêr chor cưr tix nênhx tsa iz lênhs iz kro mê njik, chuôz zis tưz cxiv uô tâu vax tsêr nhoz, txix nhiv no muk zuôr tsi trâul nyei thiêz cxơưx thâuv muôx ntux nas lox, chuô hloz lơưv: “Thâuv tưs cux xar njôngr cov muôx tâu iz luz tsêr khor truôx đros luôs nhoz, taz sik uô tsi tâuk. Shông no tâu sơưr đơưk paz li no, cur chuôz zis lok six jông siêz thiêz shir phaz”.

Luz nênhx tâu gra siêz, cêr yeiz pluôs txo grêk jux juk, tsôngv box cxuô heir nênhs nhoz tox siêz Yên Bái nhiv no muôx six hơưv, hnuz nhôngs tuôr tsês, por hưv chiê têx txux chi vênhx huôv thâuv nzor, muôx nhiêx txiêx cxiv kho, uô jông jav jêx jok, txix co huôv tsar ju lix truôx vênhk. Niêv lâul Lường Thị Hồng Chung, nhoz jok Chao Hạ, xã Nghĩa Lợi, thị xã Nghĩa Lộ heik pâuz: Uô ju lix côngv thôngx, tsôngv box muôx nzir phênhv sâu tâu, muôx nzir six hơưv tâu buôk ti txos têx tsưr ziv huôv tsar uô nox, tâu pâuz txos txux chi vênhx huôv txix têx lênhx kruô ndis seiz têz qơưk uô si chiê uô trâu pêz sơưr đơưk muôx luz nênhx vav mênhx, jông đuô: “Pêz sir jos gra siêz têx luôs hâux lưv uô phưx vưv tsôngv kruô, hok chor tuz nxeik nthuôr uô lov jêv mak pêz chiê lơưr zok nriêr, xeir cơưv shâuv uô nênhs Poz Ziz têx jax txux chi jông li: Heik cưr cxiêx, hu gâux, đhiê pax vuôs chiê phưx vưv kruô”./.

(Đinh Tuấn-Riê Lâux cxeik, nhênhv)