Mênhx cxưx Giáy nhoz qơư trâus đêx ngaz cuôr Quang Kim tsưr tsix hôiv grêk uô liêx thor ntux nas

              Ntênhk hôiv tâu tsưr tsix ntơưv quảng trường tsênhv qơư xar Quang Kim, muôx chôngz lênhx nênhs nhoz ntơưv qơư thiêz tsông kruô tuôx sêiz shuôk.

            Lơưr cxôngx nzor, iz jêx jok cux muôx iz kror qơư thor cov uô tâu kôngz lôngk ntâu đros muôx ntâu zav tâu uô ntơưv thax tsav qơư li nduôr gù, mor blâuv, kê kêiz jak liêz, njêl pok nêiz nthênh….

           Cxuô kror txơưr cux tsuv muôx hâur ntênhk hôiv zos lêiv poz; sik tưr xuôk tưv lêix liêx thiêz tsêz nôngz; đros muôx tsôngv box Giáy li têx zav nthuôr uô cêr lov jêv jông thiêz têx zav uô si cxôngx nzor li sik lâuz pak, sik tưr tâus qox shôngz… Pos Lò Thị Dủn, jok Làng Toòng, xar Quang Kim hêik pâuz: “Shông tưs cux muôx jiês yuôz trax, đhiê pax vuôs. Ntênhk hôiv zos chiê thor trâu iz shông yiêz muôx ntux yar ntux nas jông, tsik muôx nas chuô lox, đêx ngaz cuôr, ar poz”.

           Uô ntêx, hâur shông 2024, ntux nas chuô đêx ngaz cuôr tưz uô ruôr hiêv muôx 30 ntâu héc ta ar kôngz nuv thiêz đêx liv nhoz xar Quang Kim.

            Lơưr zơưv Ngô Hoàng Sơn, Chủ tịch Ủy ban xar, đhâu ciês trâus ntux nas đêx ngaz cuôr ruôr hiêv, chinhr quyền ntơưv qơư tưz sêi đrơưv paz, hêik pox nhuôs tror kho đuô uô nox, chiv ntux tsâus nhiv kruôr đhâu têx kôngz lôngk uô tâu muôs sâuv ciêz đrôngs muôx 80% pir li tsêiz no, chor hax huv uô tâu ntâu zos kok zax zưv, poz cưk, su hào, jâuz krưr lok zos jâuz poz… Ntênhk hôiv grêk uô liêx tsưr tsix trâu thâuv hâur shôngk shông yiêz cux zos chiê paz cxơưz cxiz trâu pox nhuôs sir jos sik tưr uô nox: “Chiv ntux yiêz shông no pêz zuôr kriz uô xar muôx 50 héc ta. Ciês đhâu ntênhk hôiv grêk uô liêx, pox nhuôs zuôr piz uô ciês chiv yiêz. Pêz tưz muôx tsưr ziv thoz huk têx cưx đêx, kho đuô têx trâus ntux nas chuôz ruôr hiêv txos txix khơưz têx cưx đêx txơưr chiê tok đêx uô ntêx; đros co zos hêik trâu thênhv siêz paz yưv pênhr chiê kho đuô, uô chak cov muôx txâuk đêx trâu chor liêx hâur xar”.

              Zơưv Phạm Văn Tâm, Trưởng phòng Vênhx huôv-Thôngz xor mông huyện Bát Xát, tỉnh Lào Cai puz pâuz: đros hnuz hôiv vênhx huôv Hmôngz thiêz hnuz hôiv zav nox tâu tsưr tsix ntơưv thax tsav 2 xar Dền Thàng thiêz Mường Hum, ntênhk hôiv grêk uô liêx xar Quang Kim zos iz hâur pêz xor xưv vênhx huôv thâuv hâur shôngk shông yiêz lox tiv zix tsưr tsix ntơưv huyện Bát Xát hâur shông 2025, tsês chiê ntâu kror jông trâu pêx xênhv, tsôngv kruô tuôx sêiz shuôk hâur chor hnuz thâuv hâur shôngk shông yiêz: “Tiv zix, pêz kriz uô jông mênhx cxưx têx vênhx huôv, phongx cxưx cxôngx nzor; uô lơưr luz nênhx vav mênhx hâur ntênhk hôiv, đros têx cui tênhv lok ngaz tuk zoz thôngz, ngaz tuk zav nox, piêr pâuz têx hax huv, kôngz nuv cxôngx nzor thiêz têx hax huv OCOP muôx ntơưv thax tsav qơư”./.

An Kiên-Lik Thox cxêik nhênhv