Sir jos txu grês tsơưs txiêz nanv zaoz thôngz nhoz Sơn La

Nhoz sâuv niêv cêr lox, đhâu thax tsav buôk 2 huyện Mai Sơn thiêz Yên Châu (Sơn La), đơưv Chiềng Đông nhoz xã Chiềng Đông (Yên Châu) tâu pâuz txos zos ntu cêr riêz nênhs khênhr muôx yưv txiêz nanv zaoz thôngz viv iz saz ntus cêr zos tsas cưx ha toz, iz saz ntus cêr zos trôngz siêz, cêr muk lok greiv, ar nxaz thiêz cêr nkrâuk lêv, tsik zôngx ziv tsar yêz muk lok. Niêx shông, sâuv ntu cêr no muôx ntâu txuz txiêz nanv zaoz thôngz, uô ruôr hiêv tsik jông txos lênhx nênhs thiêz uô puôk tsuôx têx yêz tsar muk lok. Zov chênhr li txuz txiêz nanv muôx yưv hnuz 20/1/2021 sâuv ntu muk đhâu luz đơưv no, thâuv iz luz yêz teiv thâux cà phê đrâu 2 luz yêz teiv txơưr uô 1 lênhx nênhs tsar yêz tuôs ciês ntơưv qơư thiêz 2 lênhx txơưr trâus saz; lok sik đraz hli 2 nhiv kruôr đhâu, yêz ô tô gra biển số BKS 29H- 460.36 muk lơưr saz Sơn La- Hà Nội, thâuv tsênhv grê đơưv tưz đrâu iz luz yêz ô tô txơưr tsênhv muk lơưr saz Hà Nội-Sơn La. Môngr jông tsi muôx lênhx nênhs trâus tuôs, taz sik têx txuz txiêz nanv tưz uô zaoz thôngz muk lok tsi tâu hâur ntâu six hơưv.

          Chiê txu grêk tsơưs têx txuz txiêz nanv zaoz thôngz sâuv ntu cêr no, shông 2021, tỉnh Sơn La tưz uô tiêr dự án kho đuô ntu cêr co đros muôx 3 qơư chơưv paz, krêz đar plas cêr, xor their lax caz ntâu qơư. Tix lâuk Lò Việt Hùng, nhoz tiểu khu 1, thị trấn Hát Lót, huyện Mai Sơn (Sơn La) – lênhx nênhs yax six muk đhâu ntu cêr no puz pâuz:“Thax tsav đơưv Chiềng Đông nhiv no tưz tâu tsov cưv yưv pênhr, cxiv tsa thiêz krêz đar cxaz têx qơư chơưv paz, têx lênhx nênhs tsar yêz ndê muk tâus cêr zuôr muôx cxaz têx qơư chiê txu grês tsơưs txiêz nanv zaoz thôngz, cur lok six tso siêz”.

          Uô tsưr ziv txu grês tsơưs txiêz nanv zaoz thôngz, hâur 3 shôngk tror lok no, tiv phaz tưz sir jos khưx phưx, yưr lir 13 qơư. Hâur co, muôx 6 qơư nhoz sâv têx niêv cêr 6, 6C, 37 thiêz 43 khênhr muôx txiêz nanv zaoz thôngz. 6 qơư no, txix shông 2019 txos shông 2021 tưz muôx yưv 46 txuz txiêz nanv zaoz thôngz, uô 7 lênhx nênhs tuôs, trâus saz zuôr xar 60 lênhx thiêz puôk tsuôx 90 ntâu luz yêz cxuô zav.

          Đros khưx phưx têx qơư khênhr muôx yưv txiêz nanv zaoz thôngz, têx nganhx, tiv phaz nhoz Sơn La cux tsov cưv yax mông, heik kriê zaoz zux chei taz por zaoz thôngz cêr ar, cêr đêx txos tsôngv box. Zơưv Nguyễn Đức Thặng, Phưv Chủ tịch UB huyện Thuận Châu, tỉnh Sơn La puz pâuz:“Pêz seiz jông côngz xưv yax mông thiêz canhv pov nzor lok têx cêr, têx qơư khênhr muôx yưv txiêz nanv zaoz thôngz; đrâuv co zos sir jos niêx shông uô uô cê têx phênhv pênhr txix TW, tiv phaz, tiv zix zos muôz cxaz pênhr txix tiv phaz chiê kho đuô têx cêr muk lok zos huyện seiz car chiê taz por trâu tas nro têx yêz muk lok, tsôngv box tâu taz por đuô”.

          Lơưr zơưv Nguyễn Văn Chính, Phưv giám đốc Sở zaoz thôngz vênhv teiv tỉnh Sơn La, txơưv tưz krêz uô ntâu tsưr ziv; têx cêr zaoz thôngz cux tâu kho đuô ntâu pir đros thâuv ntêx, taz sik chor txuz txiêz nanv zaoz thôngz sâuv thax tsav cux tsi tâu txu grês. Shông 2022, tas nro tỉnh muôx yưv 35 txuz txiêz nanv zaoz thôngz, uô 30 lênhx nênhs tuôs, 35 lênhx txơưr trâus saz. Tsênhz mênhx no tso pov têx cấp, têx nganhx, tiv phaz tsuv krêz uô têx tsưr ziv cov txos qơư đuô thiêz. Li ntơưv thiêx li txu grês tas nro 3 tiêu chí lok chor txuz txiêz nanv, nênhs trâus tuôs thiêz trâus saz tiv txiêz nanv zaoz thôngz:    “Nganhx zaoz thôngz chêx chôngk sik côngv đros têx nganhx muôx txơưx jênhv chuôz tsar qênhz yuôx, seiz car têx yêz cxaz chuôz zaoz thôngz muôx txâuk ploz tsênhr kỹ thuật, khưx phưx qênhx shênhx yêz thâux hnhar tsi trơưk cui tênhv thâuv muk lok sâuv cêr. Yuôr đros cơ sở cxuô zav, iz hâur têx tsov cưv uô ntêx zos seiz car, thix ziv yưr lir têx qơư khênhr muôx yưv txiêz nanv zaoz thôngz chiê txu grês txiêz nanv zaoz thôngz sâuv cxix luôk zaoz thôngz cêr ar hâur ntu zuôr txos”./.

                                                               Trấn Long-Txâur Vax cxeik nhênhv

Taz por ngaz tuk vêv xênhz zav nox hâur chor tsêr cơưv niêv txir zus mor nhoz tox siêz

Tsêr cơưv cxênhx iz Tả Phìn, huyện tox siêz Sìn Hồ (Lai Châu) muôx 400 ntâu shux xênhz zos têx tuz nhuôs tsôngv box Hmôngz, Cho ntơưv thax tsav qơư tsênhv cơưv ntơưr, hâur co, zuôr xar iz đraz shux xênhz no nox, nhoz hâur tsêr cơưv niêv txir zus mor. Chiê khưx phưx qênhx shênhx vax tsêr cxuô zav tsik jông, đaz tuôs tas, tiv zix zos têx tsêr uô jâuz mor nox, tsêr cơưv ntơưr tưz yưv pênhr paz đêx liv; chor chuôz zênhx phưx vưv trâu nox hâuk thiêz đhâu thâuv nox hâuk tas puôr lênhx tâu vêv xênhz hur si, txo grêk tsơưs tiv zix trâus tsơưr tưx zav nox. Cưk kriê ntơưr Trần Đức Hoan, Hiệu trưởng tsêr cơưv phêiz kênh:“Tsêr cơưv tưz bax iz luz lâux câuz lox chiê yênhx ciêz, yênhx hnuz chor cưk kriê ntơưr râuz đêx chiê zâus têx fax ntiv mak chor shux xênhz co tưz nzuôr đhâu. Chor fax ntiv đhâu nox tas yênhx hnuz tâu nzuôr hur si, taz por tâu jiêz kruôr hux si uô ntêx thâuv chor shux xênhz zuôr zôngv chiê nox jâuz mor”.

Cux li tsêr cơưv Cxênhx iz Tả Phìn, Tsêr cơưv Phôv thôngz Mênhx cxưx niev txir zus mor Cxênhx iz Phăng Xô Lin, huyện Sìn Hồ tsik so tsov cưv txos qênhz yuôx zav nox txix ciês ntơưv qơư zuôr. Đrâuv xêir tsov chor qơư cungz têx hax huv zav nox jông, tsik so qênhz yuôx uô ntêx thâuv zuôr lok, tsêr cơưv tsênhv muôz têx thax ar hâur iz ndis tsêr cơưv ntơưr chiê chos jâuz hur, phưx vưv trâu 200 ntau lênhx shux xênhz hâur tsêr cơưv li pluôs nox yênhx hnuz. Cưk kriê ntơưr Nguyễn Thị Thắm, Phưv Hiệu trưởng tsêr cơưv puz pâuz: Tiv muôx tsik txâuk nhiêx txiêx, viv li tsêr cơưv ntơưr tsik tâu ntiêr nênhs chiê paz uô jâuz mor trâu shux xênhz nox. Viv li, chor cưk kriê ntơưr cê uô côngz xưv kriê ntơưr, cê uô ciês hâux lưv sêiz car, uô jâuz mor nox yênhx hnuz trâu chor shux xênhz:“Tsêr cơưv tưz tsưr tsix têx tôv, paz nênhs sêiz kaz lok ntu zuôr, uô têx zav nox cux xưk li phêiz kênh pluôs nox trâu shux xênhz. Hâur co, tsêr cơưv lok six tsov cưv txos taz por lok tsơưr pưr cux xưk li taz por ngaz tuk zav nox”.

Shông cơưv no, huyện tox siêz ntus đriv Sìn Hồ, tỉnh Lai Châu muôx 1.000 ntâu lớp cơưv, đros muôx 25.000 ntâu lênhx shux xênhz; hâur co, 2/3 zos shux xenhz nhoz hâur tsêr cơưv niêv txir zus mor. Txơưv tsênhv yuôr ntâu txov nhêv, tiv zix zos muôx tsik txâuk vax tsêr cxuô zav, taz sik têx tsêr cơưv tưz khưx phưx jux juk, tsưr tsix uô jâuz mor nox trâu shux xênhz nhoz hâur tsêr cơưv niêv txir zus mor cov huv đros trâu yênhx taz viv, thax tsav qơư. Khov co, hâur oz pêz shông tror lok no, sâuv thax tsav tsik pov muôx yưv txuz hâux lưv shux xênhz trâus tsơưr tưx zav nox tưs. Pos Nguyễn Thị Giang, Phưv trưởng phòng Zoz zux huyện Sìn Hồ, tỉnh Lai Châu hêik:“Têx taz viv tsêr cơưv ntơưr tsuv uô jông lơưr tsês chiê cux li uô têx zav nox huv zos trơưk tsưr ziv 3 thênhv. Nganhx cux chox kriê têx tsêr cơưv ntơưr chuôz cxaz uô chor tsưr tsix đoanx thêv, cux li shux xênhz niêv txir li têx côngz xưv sêiz kaz hâur tsêr cơưv ntơưr. Tsov cưv txos taz por vêv xênhz tiz nênhs cux xưk li hâur côngz xưv nox hâuk ntơưv têx tsêr cơưv ntơưr”.

Cux lơưr pos Giang, côngz xưv qênhz yuôx hâux lưv ntơưv têx tsêr uô jâuz mor nox trâu shux xênhz niêv txir zus mor cux tsik so tâu lưx lươngv muôx vax huôv tỉnh Lai Châu thiêz huyện Sìn Hồ tsov cưv txos, tsưr ziv zos paz txo grêk tsơưs tiv zix trâus tsơưr tưx zav nox, txix co paz gra siêz đas jos, txux chi cux xưk li tsơưr lươngv cơưv ntơưr trâu shux xênhz./.

                                                               Khắc Kiên-Lik Thox cxêik nhênhv