Jâuz caz paz hlôngr yiêz têz qơưk tox siêz

          Ciês thâuv caz chaz xor jiês xuz thơưx hâur chiv jâuz caz shông no, pos Trần Thị Hoàn nhoz jos Ngòi Hóp, xã Báo Đáp, huyện Trấn Yên, tỉnh Yên Bái tưz qir bax trâu jiês zus caz chaz xor lơưr co. Txơưv tưz zuôr xar muôx 70 shông hnuz nhôngs, taz sik pos Hoàn 2 niêv txir thâuv tưs cux sir jos chos jâuz caz. Pos Hoàn puz pâuz, pênhr yưv tsi ntâu taz sik ho sâu liv tâu sei, tsưr ziv tsoz phưz mak tsi lax, côngz xưv huv đros têx lênhx nênhs xưk li pos Hoàn 2 niêv txir. Chungz fênhx iz shông, chuôz zis pos Hoàn muôx phênhv sâu 70 tsov đeiv txix chos jâuz caz tu zus caz chaz xor: “Txix thâuv nhiv kruôr tu zus caz chaz xor mak kinh têr chuôz zis jông đuô, tsi zuôr khov txos tuz nhuôk, tiv 2 zos hâur jos muôx têx côngz tsinhx tul tsi cux muôx phênhv sâu gôngr côngv, xưk li cxiv tsa tsêr vênhx huôv jêx jos thiêz uô cêr...”

          Muôx zuôr xar 10 shông uô hâux lưv chos jâuz caz, chuôz zis niêv lâuk Nguyễn Thị Dung nhoz jos Đồng Bưởi, xã Báo Đáp, huyện Trấn Yên tưz hlôngr tas nro mênhv chêx chos blêx tsi jông chiê chos jâuz caz. Nhiv no đros chuôz zis li mênhv chêx chos jâuz caz, iz luz hlik niêv lâuk chuôz zis sâu tâu muôx nhos 12 tsov đeiv.  “Cur pov phênhv sâu txix jâuz caz siêz đuô 3 jiês pir đros chos blêx, poz cưk. Mak tu zus caz chaz xor cux tsi khưr”.

          Chuôz zis niêv lâuk Nguyễn Thị Thảo, nhoz jos Đồng Bưởi, xã Báo Đáp nhiv kruôr uô hâux lưv tu zus caz chaz xor jiês xuz thơưx. Thâuv ntêx niêv lâuk Thảo chuôz zis ntiêr liêx têz chiê uô taz sik viv li muôx lênhx nênhs uô, shông no, đhâu muk seiz trâur nuv chos jâuz caz ntơưv tiv phaz, niêv lâuk Thảo cuiz tênhv uô hâux lưv no. Chiê txi grês têx hâux lưv tsi jông muôx yưv, muôx qơư sâu zuôr ngaz tul, niêv lâuk Thảo tưz cxaz chuôz HTX tiv phaz thiêz muôx tâu yênhx côngz hâur jiês xuz thơưx uô hâux lưv no: “ Qir thơưx cur cux xar tu zus caz chaz xor thiêz muôx têx lênhx nênhs hâur HTX paz max, pir li thâuv muôx tul tsi lok jâuz caz, caz chaz xor trâus moz....mak cux muôx lênhx nênhs tuôx paz zuk seiz viv zuk nhiv kruôr uô tsi tâu muôx chênhz zênhv. Grê muôs xor muôx têx thâuv tâu 180 cxênhz txos 190 cxênhz đeiv mak cur pov phênhv sâu muôx chêx cuk”.

          Xã Báo Đáp nhiv no muôx zuôr xar 150 hecta chos jâuz caz, hâur co mênhv chêx sâu tâu zos 132 hecta, xor caz shông 2022 tax zuôr xar 210 tênhr, chox lok phênhv sâu 20 tỷ đeiv ntâu trâu tiv phaz.

          Xã li qơư tsov txos zos ziv hnuz ziv krêz đar mênhv chêx chos jâuz caz chiê tu zus caz chaz xor. Chiê uô tâu tsưr ziv no, tiv phaz xav tênhv chêx chôngk nriêr qơư sâu zuôr ngaz tul trâu xiv huv. Pos Ngô Thị Thúy Vân, Chủ tịch Hội nôngx mênhx xã Báo Đáp, huyện Trấn Yên, tỉnh Yên Bái puz pâuz: “Thâuv ntêx tsi tâu sik côngv mak pox nhuôk chiv chir zus chiv chir muôs trâu niêv ciêz. Shông 2022 nhiv kruôr đhâu, tsêr meir cxiv tsa sâuv thax tsav xã, pox nhuôk ziv njênhs njôngr đuô lok tsoz jâuz caz, hâux lưv tu zus caz chaz xor, thiêz ziv muôx chôngz tsôngv box uô hâux lưv no”.

          Zơưv Đinh Xuân Trường, Giám đốc Công ty cổ phần jâuz caz Yên Bái puz pâuz: Chiê taz por muôx xor caz chiv uô cux xưk li taz por tsơưr lươngv xor, công ty sâu zuôr xor caz trâu têx xã sâuv thax tsav huyện Trấn Yên thiêz têx tiv phaz nhoz buôk co. Taz sik tso tơưv tsưr ziv sâu zuôr muôx nhos 1 cxênhz tênhr xor caz hâur shông no. No zos iz tsưr ziv paz tsôngv box Trấn Yên tso siêz uô hâux lưv no: “ Công ty cam kết đros pox nhuôk sâu zuôr tas nro xiv huv cxuô zav. Pox nhuôk tu zus tsi tâu tax mak công ty muôx lênhx nênhs tuôx paz heik kriê chiê pox nhuôk tu zus sâu tâu xor caz jông đuô, muôx phênhv sâu ngaz tul. Hâux lưv sik côngv zuôr paz pox nhuôk muôx tsưr ziv uô jông đuô, tiv 2 zos paz doanh nghiệp muôx xor caz jông đuô, tsơưr lươngv siêz đuô, chiê uô tâu têx xiv huv jông tiv zix phưx vưv niêv ciêz muôs tơưv”.

          Lơưr njuôs xav 1 hecta jâuz caz sâu tâu muôx nhos 200 tsov đeiv, siêz đuô txix 2-3 jiês pir đros chos têx tsoz chos txơưr. Nhiv no, cux xưk li nhoz Báo Đáp, têx xã chos jâuz caz txơưr nhoz Trấn Yên puôr lênhx yênhx lix têx tuêv sik hux jos thiêz HTX, paz sik côngv jông hâur chuôz zis tsêz chos tu zus thiêz taz viv sâu zuôr. Têx shôngk đhâu, tỉnh Yên Bái đros doanh nghiệp cux krêz uô ntâu tsaz yênhx paz têx ziv chuôz zis tu zus caz chaz xor li: paz nhiêx cxiv uô tsêr tu zus caz chaz xor, paz tsưr ziv tu zus thiêz tiv zix zos sâu zuôr xiv huv đros grê ngaz tul....No zos têx paz hâux lưv chos jâuz caz thiêz tu zus caz chaz xor tâu krêz uô đêz đar, huôv tsar đuô, chox lok luz nênhx tsâu sor sâuv têx thax tsav qơư nhoz Yên Bái./.

(Đinh Tuấn-Txâur Vax cxeik nhênhv)