Pêx xênhv Mường Ảng (Điện Biên) li cêr shir phaz hâur chêix sâu cà phê

Hâur têx hnuz no, tsôngv pêx xênhv chos cà phê nhoz huyện Mường Ảng, tỉnh Điện Biên tsênhv tsêx trung sâu đê txir cà phê. Têx trêr txir cà phê txi ndư thiêz siêr liêz jông hâur ntu kinh têr njiz ntâu phiv liv tiv moz Covid-19 tưz phênhv tưs paz trâu pêx xênhv tsik  yuô cxơưx. Niêv tix Nguyễn Thị Hương, zos chuôz zis chos cà phê nhoz jok Hua Nguống, xar Ảng Cang, huyện Mường Ảng puz pâuz:“Shông no cà phê muôs tâu grê siêz mê njik,  viv li pêz lok six shir phaz. Chiv shông no mak txir cà phê cux siêr jông thiêz sâu tâu ntâu. Tsêiz no mak sâu tâu tsơưs, shông no xav cux tâu ntâu đuô oz bâus”.

Têx shông jê lok no, cà phê Mường Ảng shông tưs muôs tâu gri  siêz cux tsuôk zos 6.000-7.000 đêiv iz cir txir nhôngk xưz; têx shông gri cà phê grêk kik, tsuôk  muôs tâu 3.000 đêiv iz cir, uô trâu ntâu chuôz zis chos cà phê tso tsês yênhx cxênhz héc ta cà phê tsik tu. Shông no, đhâu thâuv pâuz tâu muôx taz viv sơưr lok sâu zuôr đros gri siêz đuô cxiê shông, viv li tas nro chor cà phê hâur thax tsav tưz tâu têx tuz luôv muôz nhiêx zuôr qir mfông, viv li cà phê sâu tâu ntâu đuô cxiê shông. Txix ciês thâuv hâur chiv, gri muôs cà phê tưz tâu txix 7.000-8.000 đêiv iz cir txir nhôngk. Zơưv Kiều Xuân Hoàng, trưởng phongx Kôngz nuv thiêz Huôv tsar jêx jok huyện Mường Ảng hêik: “Sâuv thax tsav huyện Mường Ảng, pox nhuôs tsênhv piz hla trâu chêix sâu cà phê. Lơưr cơ quan uô hâux lưv no li ntâuk gri mak tsơưr lươngv chor txir cà phê huyện Mường Ảng shông no tax tâu thiêz siêz đuô pir li tsưr ziv tưz tso tơưv zos 3.500 tấn”.

Iz chas sâu tâu ntâu, muôs tâu gri, chor chuôz zis chos cà phê Mường Ảng tsênhv muôx nzir cêr shir phaz zos tas nro chor cà phê shông no zuôr tâu Công ty trách nhiệm hữu hạn zuôr muôs tơưv saz đrâuv têz qơưk cà phê Việt Bắc, qơư uô hâux lưv nhoz ntơưv tỉnh Điện Biên sâu zuôr. Zơưv Phạm Bá Vương, hlôngr njêx muôs Công ty trách nhiệm hữu hạn zuôr muôs tơưv saz đrâuv têz qơưk cà phê Việt Bắc puz pâuz:“Công ty tưz cxiv tsa cxiv luôs sâu zuôr têx hax huv trâu pox nhuôs đros Ủy ban huyện đros tas nro chor chuôz zis chos cà phê, đros gri muôs chor txir cà phê nhôngk zos 10 cxênhz đêiv iz cir, taz por uô tâu trơưk li công ty tưz tso tơưv zos têx txir njuôz tsik ntâu đuô 5% thiêz chor txir tsik jông đaz tuôs tsik ntâu đuô 5%”.

Cà phê sâu tâu ntâu, muôs tâu gri, ho muôx tâu qơư muôs truôx, co tsênhv tsênhz zos têx shir phaz chiê nganhx uô cà phê nhoz huyện Mường Ảng, tỉnh Điện Biên zuôr tror khưx phưx tâu hâur ntâu shông njiz trâus phiv liv. Txix co, chor chuôz zis chos cà phê zuôr muôx nzir siêz njênhs chiê yưv pênhr, huôv tsar truôx zav tsoz chos tâu xav zos tsoz chos chênhr ntơưv thax tsav qơư hâur ntâu shông zuôr txos./.

Vũ Lợi-Lik Thox cxêik nhênhv