Zar hnuz kêix 26/12, Hnuz hôiv vênhx huôv mênhx cxưx Hmôngz tas nro têz qơưk jiês tiv 3 shông 2021 ntơưv tỉnh Lai Châu tưz suôv câuv. Hnuz hôiv vênhx huôv mênhx cxưx Hmôngz tas nro têz qơưk jiês tiv pêz shông 2021 tâu tsưr tsix ntơưv Lai Châu txix hnuz 24/12 đros tsênhv njiêz “Tuôr chiê, phuôx huiz têx vênhx huôv jông mênhx cxưx Hmôngz-Siz bâus, sik côngv siêz, sik đros huôv tsar”, Hnuz hôiv zaz zâuv xar muôx 3.000 lênhx nênhs zos mênhx cxưx Hmôngz tuôx txix 11 tỉnh zos: Lai Châu, Lào Cai, Hà Giang, Yên Bái, Tuyên Quang, Cao Bằng, Bắc Kạn, Lạng Sơn, Điện Biên, Đắk Lắk thiêz Thanh Hóa cxaz chuôz. Hnuz hôiv tưz hêik tơưv tâu mênhx xưx Hmôngz têx vênhx huôv jông; piêr pâuz lok mênhx cxưx Hmôngz têx đuôz, chuôz zênhx cxuô zav; ntâuz trâur lâus hêik tơưv tâu tsênhz mênhx lok vênhx huôv mênhx cxưx Hmôngz hâur chor vênhx huôv Việt Nam. Hnuz hôiv tưz paz trâu sơưr đơưk pâuz tâu, sir jos tuôr chiê tsôngv box cxuô mênhx cxưx hêik cxuô, tsôngv box mênhx cxưx Hmôngz hêik taz li têx tsiv gri vênhx huôv jông. Txix co, muôx siêz njênhs đuô trâu Đảng, têz qơưk li lênhx tov, têx cêr chêi chiê sik côngv siêz cxiv tsa luz nênhx cov vav mênhx, hlôngr yiêz jông đuô./.

(Khắc Kiên-Lik Thox cxêik nhênhv)

Tsêr cơưv cxênhx 3 Tô Hiệu, luz tsêr cơưv muôx bê hu trơưk li lênhx tuz lênhv Tô Hiệu sir jos tir thêir ntâuk trol châuz, tsưx phưv têz qơưk tâu tas siv nênhx shông no tưz 60 shông (1961-2021). Ntênhs chiv nhênhv nhiv kruôr đhâu tâu tsêr cơưv tsưr tsix uô jông. Tsêr cơưv cxênhx 2, cxênhx 3 Tô Hiệu (nhiv no zos tsêr cơưv cxênhx 3 Tô Hiệu), thâuv ntêx zos tsêr cơưv trâu chor canr bôv Khu tự trị Thái Mèo têx tuz nhuôs nhoz cơưv txux (tov kaz no hlôngr hu uô thax tsav tự trị Tây Bắc) nhoz ntơưv thị trấn Thuận Châu, huyện Thuận Châu-Sơn La. Đhâu ntâu shông, ntâu fâuv hâu nov, hlôngr ntâu qơư nhoz, lar heik zos tsuv yêik txar viv trol châuz Mỹ ntâuk tuô, tax txos shông 1966, tsêr cơưv thiêx pheiz nưk muôx nưk li heiks âuv thiêz txos shông 1991 li truôx tuk qơư nhoz kriê thiêz cơưv txux chi ntơưv thax tsav qơư no hâur TP Sơn La. 60 shông cxiv tsa thiêz huôv tsar, zuôr xar 25 cxênhz lênhx shux xênhz đhâu ntâu fâuv tưz cơưv thiêz hloz tiêr txix hâur luz tsêr cơưv no lok. Thiếu tướng Hoàng Ngọc Dũng, kuz Phưv Tư lệnh quân khu 2, thâuv ntêx zos shux xênhz cơưv ntơưv luz tsêr cơưv co shông 1974-1977 shir phaz heik:

“Zos iz lênhx shux xênhz tâu cơưv đhâu hâur tsêr cơưv Tô Hiệu, cur lok six jông siêz thiêz shir phaz cơưk. Đros trâu chor cưk kriê têx tsưr ziv kriê txux chi, cêr uô nênhx trâu cxênhx tuz nhuôs, tsêr cơưv tưz paz lok six ntâu trâu gra siêz tsôngv pêx xênhv tỉnh Sơn La li txux chi tsưr ziv jênhv pâuz, iz chas co, kriê tâu cêr uô nênhx, txux chi trâu ntâu fâuv tuz nxeik đhâu ntâu tiêv. Cur cux lok six shir phaz thâuv tâu pâuz tiêk, hâur six hơưv zuôr txos, tsêr cơưv zuôr sir jos cov yênhx iz tsêr cơưv uô tâu jông luôs hâux lưv kriê txux chi hâur tỉnh, chiê cxiv tsa thiêz kriê tâu têx txux chi jông yax trâu chor tuz nxeik shux xênhz”./.

(Chẻo Thu-Riê Lâux cxeik, nhênhv)

Ntu đhâu, qênhx shênhx zuôr muôs, thâux gra thiêz jêik chiê têx tsơưr zax zênhz nhoz huyện tox siêz Điện Biên Đông (tỉnh Điện Biên) lok six phiv liv. Tas nro huyện Điện Biên Đông nhiv no muôx 1.200 ntâu lênhx nênhs muôx zênhk zax zênhz muôx ntâuz ntơưr sêiz car thiêz lok six chôngz lênhx nênhs txơưr đuô sêiz car tsik tâu ntơưv côngv thôngx, 100% chor xar, thị trấn sâuv thax tsav huyện puôr lênhx muôx nênhs muôx zênhk zax zênhz. No chênhr zos kror mak chor nênhs uô cxâuv chêi lok zax zênhz liv zôngv chiê nhiês zuôr muôx zax zênhz. Thiêz tsênhv tsênhz tưz muôx chôngz lênhx nênhs phamv cxâuv cik txos zuôr muôs jêik chiê thiêz zir zôngv zax zênhz, trâus lưx lươngv công an huyện pov thiêz cxov tsês. Thượng tá Hoàng Văn Hải, Phưv Trưởng Công an huyện Điện Biên Đông puz pâuz:

“Pêz xav jênhv thax tsav Điện Biên Đông zos qơư chiê gra zax zênhz lok muk đhâu, viv li tưz chox kriê cán bộ, chiến sĩ, chor đôiv uô côngz xưv tsêx trung nriêr pâuz chor nênhs uô cxâuv lok zax zênhz, đros đrêiv chor nênhs co chiê nriêr pâuz nzir thiêz phax tir tar cov txo grêk tsơưs tâu chor nênhs uô cxâuv lok zax zênhz sâuv thax tsav hâur ntu zuôr txos”./.

(Vũ Lợi-Lik Thox cxêik nhênhv)

Zar hnuz kêix 26/12, sâuv trôngz Fansipan tưz lok đâuk bu đhâu ntênhs Giáng sinh. Lar heik, ndax six hơưv Giáng sinh thiêz tsiêz zax lix 2022, txix nhiv no txos hnuz xiêz 02/1/2022, ntênhs hội cheix ntux no “Sa Pa-lol đâuk bu” cux tâu uô, krêz trôngx txeik tok tsôngv kruô sơưr đơưk tuôx ndis shuôs uô si tsi zuôr  nhiêx txiêx. No zos iz hâur 5 hâux lưv ntênhs hội tâu Sa Pa uô hâur niêx shông chiê tsôngv kruô sơưr đơưk tâu njiê seiz têx huôz ha, đâuk tê jông hâur cheix ntux no. Têx chuô txiêk lol cux uô jêx tưv ntơưv cxuô thax tsav hâur tỉnh grêk kis. Njuôk xav txix hmo 26/12 tror zar muk, ntơưv Lào Cai zuôr no njiv; nhoz têx thax tsav tox siêz muôx têx lol đâuk tê, thiêz muôx têx cux zuôr no ntêr hâur 2, 3 hnuz. Tsôngv box sơưr đơưk tsuv chênhr phax tir thêir no trâu lênhx nênhs, têx tsoz chos, tsiêx tu zus./.

(An Kiên-Riê Lâux cxeik, nhênhv)