UB TP Lai Châu nhiv kruôr muôx ntâuz ntơưr heik tso tsês têx huôx tôngv muôv muôs jix vuv tsi zuôr trâus sâuv thax tsav thiêz tso shux xênhz sâuv tas nro thax tsav cơưv ntơưr trực tuyến hâur tsêr; six hơưv uô txix 12 six tas hmo hnuz xiêz 7/11. Ntâuz ntơưr heik mênhx, tiv moz Covid-19 huôv xênhz phêv liv sâuv thax tsav tỉnh Lai Châu, tiv zix zos ntơưv xã Bản Giang, huyện Tam Đường, njuôs xav cik moz siêz txos côngv thôngx; chiê taz por côngz xưv nriêr, cêv kuôk nênhs moz thiêz têx lênhx nênhs njuôs xav trâus cik moz, Chủ tịch UB TP Lai Châu heik têx chiz coaz, taz viv sâuv thax tsav thành phố, Chủ tịch UB têx xã, phường huiz tôngv têx lưx lươngv ciêr chênhr qênhz yuôx đêz đar têx lênhx nênhs njuôs xav trâus cik moz Covid-19 sâuv thax tsav; ciêr chênhr cêv kuôk, njuôs siv sei têx thax tsav trâus moz siêz, têx ciêz đrôngs, thax tsav muôx lênhx nênhs trâus moz F0 tuôx txos./.

(VOV-Txâur Vax cxeik nhênhv)

Ciêz đhâu Ủy ban Thường vụ Côx hôiv li Nghị quyết 406 thiêz Chính phủ li Nghị định 92 tâu tso tơưv, uô trơưk, nganhx Nhiêx sê tỉnh Sơn La tưz sêi đrơưv qênhz yuôx chor doanh nghiệp, tsưr tsix, tiz nênhs njiz trâus phiv liv tiz moz Covid-19 chiê paz cov hla đhâu têx phiv liv, tror sir jos huôv tsar uô kinh têr. Lơưr zơưv Đặng Quang Hưng, Phưv Cục trưởng Cục nhiêx sê tỉnh Sơn La, txos nhiv no, Cục nhiêx sê tưz nriêr pâuz muôx 1.800 ntâu doanh nghiệp njuôk xav tâu txo grêk tsơưs 30% nhiêx sê phênhv sâu tsuv thêv hâur shông 2021; 7.200 ntâu ziv chuôz zis, tiz nênhs kinh doanh njuôk xav zuôr tâu paz tsik thêv nhiêx sê hâur chor hli zar kaz shông:

“Chor doanh nghiệp sâuv thax tsav tỉnh Sơn La tsênhv njiz trâus phiv liv lok nhiêx txiêx, hâux lưv uô, viv li chor tsênhv chêi nhiêx sê no tâu kriz uô mak têx doanh nghiệp zuôr muôx ntâu kror liv đuô hâur tror uô nox, kinh doanh, đhâu co zuôr paz muôx hâux lưv uô trâu nênhs lox tôngv, paz muôx nzir phênhv sâu trâu nênhs lox tôngv thiêz muôx nzir nhiêx thêv trâu nhiêx txiêx têz qơưk têx shông lơưr co”./.

(Trấn Long-Lik Thox cxêik nhênhv)

Li ntâu tiv phaz hâur tas nro têz qơưk, moz Covid-19 tưz uô zênhr shar ntâu txos luz nênhx xã hội nhoz Yên Bái, hâur co muôx côngv thôngx doanh nghiệp tiv phaz. Ciês thâuv moz huôv xênhz hâur têz qơưk, Yên Bái uô jông côngz xưv phax tar thiêz tuôr truôx zos thax tsav taz por, côngv thôngx doanh nghiệp tỉnh no qir tror hôx phưx tsiv uô, muôv muôs thiêz chuv tôngv phax tar moz Covid-19. Zơưv Nguyễn Văn Đức, Giám đốc tsêr meir xi măng nhoz Công ty cổ phần xi măng thiêz khoáng cxax Yên Bái puz pâuz: Nhiv no, moz hâur tas nro têz qơưk tưz qir tâu tir tar, têx huôx tôngv tsênhv tror hlôngr trâu ntu fênhx yax yiêz, viv li Công ty tưz tror huôx tôngv tsiv uô, muôv muôs, nriêr niêv ciêz, chuv tôngv phax tar moz Covid-19:

“Chiê shưv đros qênhx shênhx moz huôv xênhz, pêz công ty tưz chuv tôngv uô iz cxiê tsưr ziv chiê cxênhx txuôk li kho đuô têx zav meir, hlôngr yiêz công nghệ chiê muôz siêz chêx cuk tsiv uô...Đrâuv co bax trâu hâux lưv zos muôx nênhs moz F1 lok sik muôx nênhs trâus moz mak cêv kuôk, tsi uô zênhr shar lok sik chiê moz cik txos têx qơư txơưr thiêz uô zênhr shar txos hâux lưv tsiv uô”./.

(Thừa Xuân-Txâur Vax cxeik nhênhv)

Thâuv 7 six sơưr nzor hnuz 7/11, tôv côngz xưv Zênhx Pênhz phax Pa Thơm, Bôv đôiv Pênhz phax tỉnh Điện Biên sik côngv đros Công an xar Pa Thơm cxov tâu oz lênhx nênhs zos Nạ Văn Xuân, zus shông 1981; Quàng Văn Song, zus shông 1975, nhoz ntơưv jok Púng Bon, xar Pa thơm, huyện Điện Biên, tỉnh Điện Biên nhiês cêr muk đhâu ntus đriv trâu saz têz qơưk Lào chiê uô jos thiêz tâu thêv têx côngz co txix zax zênhz. Đhâu nriêr pâuz, mak Xuân thiêz Song puôr lênhx zos oz lênhx nênhs muôx zênhk zax zênhz, hnuz 6/11, oz lênhx nênhs no tưz nhiês cêr muk trâu jok Na Luông, huyện Mường Mày, tỉnh Phong Sa Lỳ, Lào chiê uô jos thiêz tâu thêv côngz uô jos txix zax zênhz chiê sir zôngv; thâuv tror lok Việt Nam txos jok Púng Bon, xar Pa Thơm, huyện Điện Biên chêk trâus cxov tsês. Taz viv tưz uô tiêr ntâuz ntơưr choz zok oz lênhx nênhs no trâu Tsênhv qơư Y têr huyện Điện Biên chiê chox muk cêv kuôk trơưk cui tênhv./.

(Vũ Lợi-Lik Thox cxêik nhênhv)