Têiv plor hluôk tiv zix Đại hôiv Đảng tas nro têz qơưk jiês tiv 13-zơưv Hà Đức Minh (zus shông 1987) nhiv kruôr tâu chiê uô Bí thư Huyện ủy Si Ma Cai. No cux zos Bí thư Huyện ủy hluôk tiv zix ntơưv tỉnh Lào Cai nhoz ntu no. zơưv Minh cux tsênhv zos têiv plor tsik chuyên trách Côx hôiv khóa 15. Hâur shôngk shông 2021, zơưv Minh tâu chôngz lênhx nênhs thav txos thâuv cxaz chuôz Đại hôiv Đảng tas nro têz qơưk jiês tiv 13 zos lênhx nênhs hluôk tiv zix. Ntơưv ntu co, têz pov chir luk nus đros pưk txux zos hluôk nênhs uô lơưr tsưr ziv zos shông 2030 Việt Nam zos yênhx luz têz qơưk hlôngr yiêz jông thiêz shông 2045 zos yênhx têz qơưk công nghiệp, zơưv Minh hêik tiêk, chor hluôk nênhs hâur ntu yiêz txuv sir jos cơưv nzir txux chi, chênhz zênhv, tax tâu iz nền kinh têr yiêz li têx zoz qơưx, tiv zix zos công nghê, hlôngr yiêz sôr chiê uô tâu trơưk jiês cách mạng công ngiệp 4.0 sâuv ntiêx têz./.

(An Kiên-Lik Thox cxêik nhênhv)

Têis cik 6/6, zuôr xar 14.000 lênhx shux xênhz lớp 9 nhoz tỉnh Sơn La piz thik tưr xêir zuôr muk cơưv lớp 10, shông cơưv 2022-2023 đros môn thik xưz thơưx zos môn Ngữ Văn, lơưr tsưr ziv xar tơưv uô hâur six hơưv zos 120 phênhz. Jiês thik tưr no tâu tsưr tsix đêz đar, hlôngr trâu thâuv ntêx no tsuôk muôx tsêr cơưv cxênhx pêz Chuyên, tsêr cơưv cxênhx pêz Nội trú tỉnh thik tưr. Đhâu jiês thik tưr no chor tsêr cơưv cxênhx pêz nhoz Sơn La vav tiêk zuôr xêir tâu chor shux xênhz tax tâu têx tsêr cơưv cxênhx pêz li zoz qơưx kruôz kriê hâur ntu yiêz. Jiês thi tưr xêir zuôr shux xênhz cơưv lớp 10 cxênhx pêz, shông cơưv 2022-2023 muôx zuôr xar 40 kror qơư thik tưr đros xar muôx 14.000 lênhx shux xênhz cxaz chuôz thik. Chor tsêr cơưv tsưr tsix xêir zuôr lơưr tsưr ziv thik tưr, hlôngr trâu xêir zuôr đhâu ntâuz ntơưr li têx shông uô ntêx, kror no puz pov tâu nganhx Zoz zux Sơn La li sir jos hâur gra siêz tsơưr lươngv chor shux xênhz tuôx cơưv hâur tsêr cơưv. Pos Phạm Tuyết Loan, Phưv Hiệu trưởng, Phưv trưởng qơư thik tưr tsêr cơưv cxênhx pêz Tô Hiệu, thành phố Sơn La puz pâuz:

“Cux ntêr lơưv tỉnh thiêz tsưr tsix jiês thik tưr tuôx cơưv lớp 10 li nhiv no, thâuv ntêx no mak tsuôk zos tsêr cơưv cxênhx pêz Chuyên thiêz tsêr cơưv cxênhx pêz Nội trú tỉnh thik tưr xưz, hok nhiv no mak chor tsêr cơưv thik tưr tưz muôx ntâu đuô lơưv, lơưr cur ntâuk gri mak zos iz kror lok six jông, viv muôx thik tưr, pêz zuôr xêir tsov tâu chor shux xênhz muôx txux chi, siêz xar jông; đhâu jiês thik tưr no pêz zuôr xêir tsov tâu chor shux xênhz tax tâu lơưr tsaz yênhx zoz zux phôv thông yiêz li zoz qơưx thox cxov”./.

(Trấn Long-Lik Thox cxêik nhênhv)

Xor mông txix Ban kho đuô têx cêr ar, Sở Zoz thôngz-Vận tải tỉnh Lai Châu, ntơưv thax tsav qơư nhiv kruôr pov muôx 2 kror qơư ar poz lok cxuz cêr ntơưv txox cêr 133, uô cêr muk lok tsik tâu hâur ntâu six hơưv. Tsênhv tsênhz, ar xưz pov muôx yưv ntơưv cêik cêr 41+760 nhoz jok Ít Luông, xar Nậm Sỏ, huyện Tân Uyên thiêz cêik cêr 51+040 ntơưv jok Hua Cuổi, xar Nậm Cuổi, huyện Sìn Hồ. Đhâu ciês pov muôx yưv ar poz, taz viv sêiz car ntu cêr no tưz tso nênhs, chuôz zênhx cxuô zav tuôx thoz huk kho đuô cêr. Txos nhiv no, chor qơư muôx ar poz tưz thoz huk tâu chiê nênhs thiêz têx yêz zâu muk lok đhâu. Nhiv no taz viv kho tsênhv sir jos thoz huk, kho cov tâu tiêr ciês têx ntu cêr muôx ar poz co, taz sik tiv sâuv thax tsav cux tsênhv muôx ntux lok nas, viv li cux phiv liv tsik tsơưs trâus hâux lưv thoz huk, kho đuô chor ntu cêr co./.

(Khắc Kiên-Lik Thox cxêik nhênhv)

Cux ntơưv Lào Cai, iz tas hmo txos têis cik sơưr nzor hnuz 6/6, tix lâus Giàng Giả, zus shông 1998, nhoz jok Cán Cấu 2, xar Tả Thàng, huyện Mường Khương, tỉnh Lào Cai muk tso đêx trâu hâur têx liêx chêk njiz ntux lok nas viv li tưz khiêr muk gâuv hâur tsêr liêx. Txos 2 six ntâu zar sơưr nzor chêk muôx xoz tuô lok trâus uô tix lâus tuôs ciês. Đhâu muôx yưv txuz hâux lưv no, nênhs trâus tuôs tưz tâu chox lok uô đaz uô kruô. Nhiv no tsênhv zos chêix cxuô thax tsav qơư piz uô liêx. Cơ quan muôx vax huôv hêik pâuz, sơưr đơưk tsuv uô jông sêiz shuôk, nriêr pâuz têx xor mông njuôk xav, hêik pâuz lok ntux yar ntux nas chiê muôx tsưr ziv phax têx têx phiv liv muôx yưv./.

(An Kiên-Lik Thox cxêik nhênhv)