Lơưr UB tỉnh Lai Châu li pov cov, tiv phaz tsênhv muôx 43 dự án yưv pênhr hâur vênhv thix kôngz nuv, tas nro pênhr đăng cir zos zuôr xar 5 cxênhz 900 tỷ đeiv. Txos nhiv no, tưz muôx 22 dự án uô tiêr, đros tas nro pênhr đăng cir zos 2 cxênhz 500 tỷ đeiv; têx dự án tsênhv yuôr mak tsênhv krêz uô. Chiê têx dự án yưv pênhr lok vênhv thix kôngz nuv tâu krêz uô muôx chêx cuk, txos nhiv no, chính quyênx tỉnh Lai Châu tưz cir 11 ntâuz ntơưr đros têx tsưr yưv pênhr. Tỉnh cux yênhx lix têx đoanx côngz xưv yax six muk qênhz yuôx, seiz shuôk hâux lưv krêz uô dự án ntơưv têx tiv phaz chiê car chêx têx phêv liv, tsi tâu huv đros lok sik côngv, ar têz, njuôs xav...Zơưv Trần Bảo Trung, Qênhx chủ tịch UB huyện Phong Thổ (Lai Châu) puz pâuz: “Chiê tax tâu tsưr ziv lơưr Nghị quyết Đại hội Đảng bộ huyện tso tơưv, uô ntêx pêz tsuv chêx chôngk nriêr qơư sâu zuôr xiv huv. Đhâu thâuv nriêr tâu qơư sâu zuôr ngaz tul mak pêz vênhv zôngv têx pênhr jos txix têx tsaz yênhx têz qơưk li qơư tsov txos thiêz muôz pênhr txix huyện chiê paz pox nhuôs tror huôv tsar. Đros co pêz zaz zâuv, hu lơưs têx doanh nghiệp yưv pênhr sik côngv đros pox nhuôs chiê chos tsơưz lơưr tsưr ziv taz por zav nox”./.

(Khắc Kiên-Txâur Vax cxeik nhênhv)

Uỷ ban tỉnh Yên Bái nhiv kruôr tso tơưv quyết tinhv tsi puz Công ty tsiv uô, tsông têx poz jêz Dốc Thẳng uô têx luôs hâux tsông, jov poz jêz, viv uô tsi trơưk cui tinhv lok sâuv tsông, nquôr têx ar, poz jêz. Đros trâu quyết tinhv tsi puz uô hâux lưv, Công ty co cux trâul bluô 120 tsov đeiv nhiêx thiêz tsuv zơưv cov tas têx ar, poz jêz lơưr Công ty tsông, nquôr tsi trơưk cui tinhv ntơư lok tso trâu qơư tâu cơ quan muôx vax huôv tso chei nquôr. Công ty no zos zơưv Hoàng Minh Sớm uô Giám đốc, qơư uô hâux lưv nhoz ntơưv jok Ngòi Kèn, xã Liễu Đô, huyện Lục Yên (Yên Bái)./.

(Trịnh Xuân-Riê Lâux cxeik, nhênhv)

Iz jiês ntux kênhs 3,6 tưv nhiv kruôr muôx yưv ntơưv huyện Mường Nhé, tỉnh Điện Biên thâuv tas cik sơưr nzor hnuz xiêz 10/8. Jiês ntux kênhs tsi uô ruôr hiêv tul tsi. Nhiv no tsênhv qơư njuôs pov ntux kênhs thiêz niêv đêx hiêr ntak tror seiz njôngr qênhx shênhx ntux kênhs nhoz thax tsav no chiê thôngz pov txos chính quyênx tiv phaz. Uô ntêx co, lok hnuz 14/3 sâuv thax tsav tỉnh Điện Biên cux muôx jiês ntux kênhs 4,5 tưv richte nhoz xã Pú Hồng, huyện Điện Biên Đông, tỉnh Điên Biên./.

(VOVTB-Txâur Vax cxeik nhênhv)

Thâuv tưs txos hnuz tiv 7 thiêz hnuz ciêz hâur niêx ciêz, jok Chiềng đi 2, xã Vân Hồ, huyện Vân Hồ (sơn La) ho muôx chôngz lênhx ntâu tus siz zâuv tuôx ciêz lov jêv ntưk. Têx hax huv ntơưv no tâu tsôngv box tuôx uô têx qơư, tsêr fênhz suôz chiê nhoz jâuv muôs huv. Iz chas tsôngv box Hmôngz li 42 qơư muôs têx hax huv li: Grêix caz puôz tưv, njuôs kâuz, njuôs kruôr, cxuô zav jâuz tâuv, txir ntông, têx triêv txuôk, hlâu, pax ntâuz tsôngk tril yo tiêz….., chiêz Chiềng đi tsênhv hu zâuv tsôngv kruô sơưr đơưk xar tuôx car ciêz, ndis seiz têx txux chi li: Tuôr nduôr blêx, yuôz kênh, nthuôr uô têx txux chi lov jêv….thiêz. Niêv lâul Lê Thị Lệ, nhoz tỉnh Vĩnh Phúc tuôx heik: “Trơưk li pêz mak tuôx tox siêz, kror jông đuô hur si zos tâu ndis seiz têx ciêz, zuôr hax huv, zav nox kaz. Chênhr viv li, pêz lok six shir phaz, tas nro đoanx sơưr nzor siz zâuv tuôx car ciêz. Tsôngv box nhoz no siêz lok six jông, cur thiêz chor fôngx zưs hâur đoanx lênhx tưs cux shir phaz thâuv tuôx no uô si, ndis car ciêz”./.

(Lê Hạnh-Riê Lâux cxeik, nhênhv)