Pưng tàng bệnh pộ pền niểu bàn nắc dệt ók

          1-Dệt hại họt sài ền: Pưa mi lài chất bàn cuồng lượt, dệt hại họt pưng mạch lượt nọi liệng sài ền. Côn chếp hền pền ma mạt. Pưng khù nị lâng hền ók nẳng òng tìn xương nặn òng tìn lâng chuốp pưới ók mi xương dệt nhiễm trùng, nhứa nau mìn cánh đảy kẻ co tìn xìa.

          2-Dệt hại họt mák sáy lằng: Pưa chất bàn cuồng lượt áo xùng dệt hại họt pưng mạch lượt cuồng mák xáy lằng, dệt hẳư mák sáy lằng báu thồng đảy chất uối hại.

          3-Dệt hại họt kén tà: Pưng mạch lượt nọi cuồng kén tà, mi xương chuốp tằn báu cọ ték cuồng tà xương nặn cọ dệt chếp tà. Khù nưng mắư, pền bệnh niểu bàn nắc mi xương dệt tà mua, tà bót.

          4-Dệt hại họt mạch lượt mák hùa chằư: Chếp mák hùa chằư pộ pền bệnh niểu bàn nắc dệt ók lỏ hiểm hại lài cánh lâng pọ. Côn chếp lâng huyết áp xùng, mạch lượt báu lông, dệt chếp mák hùa chằư, chếp ék mi xương chí chuốp siệt mo. Toi tồ số biền mài hẳư hền 65% số côn chuốp siệt mo pộ pền bệnh niểu bàn nắc lỏ pộ mạch lượt báu lông.

          5-Nhiễm trùng: Côn pền bệnh niểu bàn nắc mi xương chuốp nhiễm trùng ngai cánh mi xương chí chuốp nhiễm trùng nẳng chu bón xương: khẻo, hứa, nhiễm trung nằng dệt pền pưới, nhiễm trùng mák sáy lằng.

          Va pền niểu bàn nắc cọ hiểm hại lài hák va xum hau mi xương cẳn tân đảy pưng khù vạu nừa va pi nọng kiểm soát đảy chất bàn cuồng lượt. Pưa xương nặn pi nọng mi xương lựa chọn hẳư chảu luông pùn tiêng àn vạy mi đảy puồng kìn đơi dú hảo hanh./.

                             ꪝꪉꪳ ꪔꪱꪉ ꫃ꪛꪉ ꪶꪝ ꫃ꪜꪙ ꪘꪫꪸ ꪚꪱꪙ ꪘꪀꪰ ꫃ꪥꪒ ꪮꪮꪀ

1-꫃ꪥꪒ ꪭꪱꪥ ꪭꪮꪒ ꪎꪱꪥ ꫃ꪮꪙ: ꪹꪝ ꪀꪺꪉ ꪹꪩꪒ ꪣꪲ ꪨꪱꪤ ꫄ꪊꪒ ꪚꪱꪙ ꫃ꪥꪒ ꪭꪱꪥ ꪭꪮꪒ ꪝꪉꪳ ꪵꪣꪀ ꪹꪩꪒ ꪙꪮꪥ ꪀꪺꪉ ꫃ꪮꪙ. ꫛ ꫃ꪊꪚ ꫃ꪬꪙ ꫃ꪜꪙ ꪣꪱꪀ ꪣꪱꪒ. ꪝꪉꪳ ꪄꪴ ꪙꪲ ꫄ꪩꪉ ꫃ꪬꪙ ꫃ꪜꪙ ꪘꪉꪰ ꪮꪮꪉ ꪔꪙꪲ ꪹꪏꪉ ꪙꪽ ꪮꪮꪉ ꪔꪙꪲ ꫄ꪩꪉ ꫃ꪬꪙ ꪹꪜꪥ ꪮꪮꪀ ꪣꪲ ꪹꪏꪉ ꫄ꪥꪒ ꪐꪣꪸ ꪊꪴꪉ ,꫃ꪥꪒ ꪹꪐ ꪹꪙꪱ ꪢꪙꪲ ꪵꪀꪉ ꪼꪒ ꪵꪀ ꪁꪷ ꪔꪙꪲ ꪎꪸ.

2-꫃ꪥꪒ ꪭꪱꪥ ꪭꪮꪒ ꪢꪱꪀ ꪼꪎ ꪨꪉꪰ: ꪹꪝ ꫄ꪊꪒ ꪚꪱꪙ ꪀꪺꪉ ꪹꪩꪒ ꪮꪱꪫ ꪨꪱꪥ ꫃ꪥꪒ ꪭꪱꪥ ꪭꪮꪒ ꪝꪉꪳ ꪵꪢꪀ ꪹꪩꪒ ꪀꪺꪉ ꪢꪱꪀ ꪼꪎ ꪨꪉꪰ, ꫃ꪥꪒ ꪻꪬ ꪢꪱꪀ ꪼꪎ ꪨꪉꪰ ꪹꪚꪱ ꪖꪮꪉ ꪼꪒ ꫄ꪊꪒ ꪮꪺꪥ ꪭꪱꪥ.

3-꫃ꪥꪒ ꪭꪱꪤ ꪭꪮꪒ ꪵꪀꪙ ꪔꪱ: ꪝꪉꪳ ꪵꪣꪀ ꪹꪩꪒ ꪙꪮꪥ ꪀꪺꪉ ꪵꪀꪙ ꪔꪱ, ꪣꪲ ꪹꪏꪉ ꪊꪺꪚ ꪔꪽ ꪎꪸ ꪹꪚꪱ ꪁꪷ ꪵꪔꪀ ꪮꪮꪀ ꪀꪺꪉ ꪔꪱ ꪹꪏꪉ ꪙꪽ ꪁꪷ ꫃ꪥꪒ ꫃ꪊꪚ ꪔꪱ. ꪄꪴ ꫜ ꪻꪢ ꪫꪱ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪣꪲ ꪹꪏꪉ ꫃ꪥꪒ ꪻꪬ ꪔꪱ ꪣꪺ, ꪔꪱ ꪚꪮꪒ ꪎꪸ.

4-꫃ꪥꪒ ꪭꪱꪥ ꪭꪮꪒ ꪵꪣꪀ ꪹꪩꪒ ꪵꪀꪉ ꪢꪱꪀ ꪬꪺ ꪻꪊ: ꫃ꪊꪚ ꪢꪱꪀ ꪬꪺ ꪻꪊ ꪘꪉꪰ ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪨꪷ ꪬꪣꪸ ꪭꪱꪥ ꪨꪱꪥ. ꫃ꪥꪒ ꪻꪬ ꫛ ꫃ꪊꪚ ꫄ꪩꪉ ꪬꪫꪸꪒ ꪮꪱꪚ ꪎꪴꪈ ,ꪵꪣꪀ ꪹꪩꪒ ꪹꪚꪱ ꪶꪩꪉ ,꫃ꪥꪒ ꫃ꪊꪚ ꪢꪱꪀ ꪬꪺ ꪻꪊ ,꫃ꪊꪚ ꪵꪮꪀ ꪣꪲ ꪹꪏꪉ ꪋꪲ ꪊꪺꪚ ꪏꪒꪸ ꪣꪷ. ꪕꪮꪥ ꪶꪔ ꪶꪎ ꪚꪙꪸ ꪢꪱꪥ ꪻꪬ ꫃ꪬꪙ 65% ꪶꪎ ꫛ ꪊꪺꪚ ꪏꪒꪸ ꪣꪷ ꪶꪝ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪨꪷ ꪶꪝ ꪵꪣꪀ ꪹꪩꪒ ꪹꪚꪱ ꪶꪩꪉ.

5-ꪐꪣꪸ ꪊꪴꪉ: ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪣꪲ ꪹꪏꪉ ꪊꪺꪚ ꪐꪣꪸ ꪊꪴꪉ ꪉꪱꪥ ꪵꪀꪉ ꪣꪲ ꪹꪏꪉ ꪐꪣꪸ ꪊꪴꪉ ꪘꪉꪰ ꪝꪉꪳ ꪚꪮꪙ ꪹꪏꪉ: ꪵꪄꪫ ,ꪹꪬ ,ꪐꪣꪸ ꪊꪴꪉ ꪘꪉꪰ ꪹꪜꪥ ꪮꪮꪀ ,ꪐꪣꪸ ꪊꪴꪉ ꪢꪱꪀ ꪼꪎ ꪨꪉꪰ.

          ꪫꪱ ꫃ꪜꪙ ꪘꪫꪸ ꪚꪱꪙ ꪘꪀꪰ ꪁꪷ ꪬꪣꪸ ꪭꪱꪥ ꪨꪱꪥ ꪬꪱꪀ ꪫꪱ ꪏꪴꪣ ꪹꪭꪱ ꪣꪲ ꪹꪏꪉ ꪀꪽ ꫄ꪕꪙ ꪼꪒ ꪝꪉꪳ ꪄꪴ ꪹꪫꪱ ꪹꪘ ꪫꪱ ꪝꪲ ꪙꪮꪉ ꪀꪣꪸ ꪎꪫꪱꪒ ꪼꪒ ꫄ꪊꪒ ꪚꪱꪙ ꪀꪺꪉ ꪹꪩꪒ. ꪹꪝ ꪹꪏꪉ ꪙꪽ ꪝꪲ ꪙꪮꪉ ꪣꪲ ꪹꪏꪉ ꪹꪩꪀ ꪋꪮꪙ ꪻꪬ ꪹꪊꪱ ꪩꪺꪉ ꪜꪴꪙ ꪕꪉꪸ ꪮꪱꪙ ꪼꪫ ꪣꪲ ꪼꪒ ꪜꪺꪉ ꪀꪙꪲ ꫄ꪓꪥ ꪤꪴ ꪬꪱꪫ ꪵꪭꪉ.

                                                                                       ꪹꪩꪉ ꪬꪫꪙꪸ ꪥꪀꪲ