CM thứ 4-26/4/2017

7 tàng bệnh lâng pọ cuồng mua họn

1-Bệnh chếp mák hùa chằư

          Phạ đét họn hại hức cọ báu mi lợi hẳư mák hùa chằư. Mák hùa chằư đảy dệt vịa lài cánh tặp văn xưa cánh huyết áp xùng. Lượt khủn pưa mết lài nặm mi xương dệt hẳư đút thiếu ô xy, dệt mướt moi pày, báu cọ lộm tài báu ngau.

          Luông vện ník: Pưng côn chếp mák hùa chằư cận kìn dà lâng toi đơn khòng bác sỹ, lâng pùa pày toi dà dón huyết áp. Báu pền pày ma lài chơ phạ đét, cận tư mụ, tư cúp chơ pày tang nọk phạ đét họn, báu pền kìn lài chương kìn mi chất pi cánh pền kìn lài nặm. pền chự chơ áp nặm cưm.

2-Bệnh pền niềng.

          Phạ đét họn cánh xưa Iốt mi xương lỏ cốc pài dệt ók bệnh pền niềng. Chơ côn pền bệnh lâng hền ók hứa, mák hùa chằư tặp văn, tà căư, cần dón lông( Chăm va kìn lài), xép nặm, pày phải bàu lài, mư sơn, phồm huống. Bệnh nị cận đảy dàu dà cuồng dan hầng hy, toi luông lăm le khòng bác sỹ.

          Luông chự phong: Báu pền pày tang nọk chơ phạ đét họn.

3-Chếp mák kanh mák khèn:

          Bệnh lâng hền ók nẳng pưng côn non lài báu cọ năng hầng chằm máy điều hoà. Chơ non tứn lâng hền chấp lăm mo lăm tồ pék xương chơ dệt vịa nắc, tít xắư mák kanh mák khèn hền chếp, pày ma dạk cánh nhương mự nhương hền nắc nưới.

          Luông dàu dà: Non dú đì hẳư mák canh , mák khèn đảy dặng dom, pền bíp cặn, dệt hẳư mák kanh mák khèn họn khửn, xủ phải xô chụp xắư cồn păn cắư bón chếp cánh kìn dà kháng  chếp mák kanh mák khèn.

4-Nhiễm trùng nằng

          Mua họn, lâng hền pền hít, pền hò. Va pày ỉn nhang liệp him nặm bể, pày tìn pười lâng hền nhiễm trùng báu cọ pền hò.

          Luông chự phong: Báu pền dú xẳư chằm lài cắp côn đàng pền bệnh nhiễm trùng nằng, báu pền pày tin pười chơ pày nhang nẳng phổng him nặm bể, báu pền năng lô pá nhả, sai. Cận dàu dà ngày chơ hền pền căn cai, pền hít, pền pưới.

5-Chuốp tồ khốp

          Bón nhung khốp, tồ tèn lẳn mi xương căư đành khửn, nhiễm độc( Mi xương hạ, nào sảy, chếp nẳng đúk), mau hùa, mi xương dệt huyết áp dón lông, hà chằư cặp báu cọ mướt moipày.

          Luông dàu dà: Cận dà ngày bón chuốp tồ tèn lẳn cuồng dan chơ nưng cốc khoẹ. Cốc khoẹ cận àu lay độc ók khói nằng, chúp chất độc ók xìa, àu sài phúk hặt xìa tang cỏng pa bát vạy cẳn tân báu hẳư chất độc lam pày bón ứn, kìn dà chự phong di ứng.

6-Chếp bốk co

Kìn kèm, nặm đán cưm báu cọ áp nặm cưm lỏ cốc pài dệt pền bệnh.

          Luông chự phong cánh luông dàu dà: Kìn nặm ún ón( Nặm khoáng, che khèo), co pền păn khằn. Va pền nắc lỏ đảy kìn dà pưa bệnh nị cọ hiểm hại đối cắp mák hùa chằư cánh mák xáy lằng.

          7-Bệnh chếp pùm

Pưng manh bệnh dệt pền bệnh mi nẳng lài bón. Manh bệnh cọ pe văn chơ phạ đét họn cánh mi xương khảu mưa cuồng lăm mo toi căm kìn báu cọ chơ mư uối. Côn chếp pền nắc nưới, hạ, tháo tọng, nào xảy.

          Luông dàu dà: Kìn dà vạy hẳư chất độc cuồng lăm mo ók ma tang nọk xìa, xòng ma pền kìn lài nặm xùn cừa vạy phụi xắư nặm mết xìa cuồng lăm mo. Chơ đàng chếp pùm pền kìn khảu cành lèo. Báu pền dản xắn chơ hền hạ báu cọ tháo tọng ặn lỏ khù lâng hền chơ chuốp bứa mau.

          Luông chự phong: àu xà phọng suối mư cón chơ kìn  cánh pảy chự căm kìn men luông.

BSKĐS-Huyền dịch

7 ꪔꪱꪉ ꫃ꪛꪉ ꫄ꪩꪉ ꪝꪷ ꪀꪺꪉ ꪣꪺ ꪭꪮꪙ

1-꫃ꪛꪉ ꫃ꪊꪚ ꪢꪱꪀ ꪬꪺ ꪼꪊ

          ꪡꪱ ꪵꪒꪒ ꪭꪮꪙ ꪭꪱꪥ ꪭꪀꪳ ꪁꪷ ꪹꪚꪱ ꪣꪲ ꫄ꪩꪥ ꪻꪬ ꪢꪱꪀ ꪬꪺ ꪻꪊ. ꪢꪱꪀ ꪬꪺ ꪻꪊ ꪼꪒ ꫃ꪥꪒ ꪫꪀꪸ ꪨꪱꪥ ,ꪕꪚꪾ ꪫꪽ ꪹꪏ ꪵꪀꪉ ꪬꪫꪒꪸ ꪮꪱꪚ ꪎꪴꪉ. ꪹꪩꪒ ꪄꪴꪙ ꪹꪝ ꫃ꪢꪒ ꪨꪱꪥ ꪙꪣꪾ ꪣꪲ ꪹꪏꪉ ꫃ꪥꪒ ꪒꪴꪒ ꪖꪫꪸ ꪶꪯ ꪏꪲ, ꫃ꪥꪒ ꪹꪢꪒ ꪣꪮꪥ ꪼꪜ ꪹꪚꪱ ꪁꪷ ꪶꪩꪣ ꪔꪱꪥ ꪹꪚꪱ ꪹꪉꪱ.

          ꪩꪺꪉ ꪋꪳ ꪡꪮꪉ: ꪝꪉꪳ ꫛ ꫃ꪊꪚ ꪢꪱꪀ ꪬꪺ ꪻꪊ ꫄ꪁꪙ ꪀꪙꪲ ꪤꪱ ꫄ꪩꪉ ꪕꪮꪥ ꪩꪺꪉ ꪊꪲ ꪚꪮꪀ ꪄꪮꪉ ꪚꪱꪀ ꪎꪲ, ꫄ꪩꪉ ꪜꪺ ꪼꪜ ꪕꪮꪥ ꪤꪱ ꪤꪮꪙ ꪬꪫꪒꪸ ꪮꪱꪚ. ꪹꪚꪱ ꫃ꪜꪙ ꪼꪜ ꪣꪱ ꪨꪱꪥ ꪕꪱꪉ ꪙꪮꪀ ꫄ꪋ ꪡꪱ ꪵꪒꪒ ꪭꪮꪙ ,ꪹꪚꪱ ꫃ꪜꪙ ꪀꪙꪲ ꪨꪱꪥ ꪹꪋꪉ ꪀꪙꪲ ꪣꪲ ꫄ꪊꪒ ꪝꪲ ꪵꪀꪉ ꫃ꪜꪙ ꪀꪙꪲ ꪨꪱꪥ ꪙꪣꪾ.

2-꫃ꪛꪉ ꫃ꪜꪙ ꪘꪉꪸ

          ꪡꪱ ꪵꪒꪒ ꪭꪮꪙ ꪵꪀꪉ ꪹꪏ ꪮꪲ ꪶꪮꪒ ꪣꪲ ꪹꪏꪉ ꪨꪷ ꪶꪀꪀ ꪜꪱꪥ ꫃ꪥꪒ ꪮꪀꪀ ꫃ꪛꪉ ꫃ꪜꪙ ꪘꪉꪸ. ꫄ꪋ ꫛ ꫃ꪜꪙ ꫃ꪛꪉ ꫄ꪩꪉ ꫃ꪬꪙ ꪮꪮꪀ ꪹꪬꪀ ,ꪢꪱꪀ ꪬꪺ ꪻꪊ ꪔꪚꪾ ꪪꪽ, ꪔꪱ ꪻꪁ ,ꪤꪮꪙ ꫄ꪀꪙ( ꪋꪣꪾ ꪫꪱ ꪀꪙꪲ ꪨꪱꪥ) ,ꪵꪎꪚ ꪙꪣꪾ, ꪼꪜ ꪠꪱꪥ ꪹꪚꪱ ꪨꪱꪥ ꪹꪕ ,ꪣꪳ ꫄ꪏꪙ ,ꪶꪠꪣ ꪬꪺꪉ .꫃ꪛꪉ ꪙꪲ ꫄ꪁꪙ ꪼꪒ ꪹꪤꪱ ꪤꪱ ꪀꪺꪉ ꪥꪱꪙ ꫄ꪬꪉ ꪭꪲ.

          ꪩꪺꪉ ꪋꪳ ꪡꪮꪉ: ꪹꪚꪱ ꫃ꪜꪙ ꪼꪜ ꪕꪱꪉ ꪙꪮꪀ ꫄ꪋ ꪠꪱ ꪵꪒꪒ ꪭꪮꪙ.

3-꫃ꪊꪚ ꪢꪱꪀ ꪵꪁꪉ ꪢꪱꪀ ꪵꪄꪙ:

          ꫃ꪛꪉ ꫄ꪩꪉ ꫃ꪬꪙ ꪮꪮꪀ ꪘꪉꪰ ꪝꪉꪳ ꫛ ꪙꪮꪙ ꪨꪱꪥ ꪹꪚꪱ ꪁꪷ ꪙꪉꪰ ꫄ꪬꪉ ꪊꪣꪾ ꪼꪢ ꪒꪫꪸ ꪬꪫꪱ. ꫄ꪋ ꪙꪮꪙ ꪔꪙꪴ ꫄ꪩꪉ ꫃ꪬꪙ ꫃ꪊꪚ ꪩꪣꪾ ꪣꪷ ꪵꪜꪀ ꪹꪏꪉ ꫄ꪋ ꫃ꪥꪒ ꪫꪀꪸ ꪘꪀꪰ.

          ꪩꪺꪉ ꪹꪤꪱ ꪤꪱ: ꪙꪮꪙ ꪤꪴ ꪒꪲ, ꫃ꪜꪙ ꪚꪲꪚ ꪁꪽ ꪵꪀꪉ ꪎꪴ ꪠꪱꪥ ꪤꪽ ꪵꪎ ꪋꪴꪚ ꪻꪎ ꪶꪀꪙ ꪝꪽ ꪻꪎ ꪚꪮꪙ ꫃ꪊꪚ ꪵꪀꪉ ꪀꪙꪲ ꪤꪱ ꪄꪱꪉ ꫃ꪊꪚ.

4-ꪑꪣꪸ ꪊꪴꪉ ꪘꪉꪰ

ꪣꪺ ꪭꪮꪙ ꫄ꪩꪉ ꫃ꪬꪙ ꫃ꪜꪙ ꪬꪲꪒ ,꫃ꪜꪙ ꪬꪷ. ꪫꪱ ꪼꪜ ꪮꪙꪲ ꪑꪱꪉ ꪩꪚꪸ ꪭꪣꪲ ꪙꪣꪾ ꫃ꪚ ꪫꪱ ꪼꪜ ꪔꪙꪲ ꪹꪜꪥ ꪁꪷ ꪋꪲ ꪊꪺꪚ ꫃ꪜꪙ ꪬꪷ.

ꪩꪺꪉ ꪋꪳ ꪡꪮꪉ: ꪹꪚꪱ ꫃ꪜꪙ ꪔꪒꪲ ꪖꪀꪳ ꪭꪮꪒ ꪝꪉꪳ ꫛ ꫃ꪜꪙ ꪬꪲꪒ ,꫃ꪜꪙ ꪹꪜꪥ ,ꪹꪚꪱ ꫃ꪜꪙ ꪑꪱꪉ ꪔꪙꪲ ꪹꪜꪥ ꪘꪉꪰ ꪶꪠꪉ ꪭꪣꪲ ꪙꪣꪾ ꫃ꪚ. ꫄ꪁꪙ ꪹꪤꪱ ꪤꪱ ꪼꪈ ꫄ꪋ ꫃ꪬꪙ ꫃ꪜꪙ ꪁꪽ ꪁꪱꪥ ,꫃ꪜꪙ ꪬꪒꪲ ꫃ꪜꪙ ꪹꪜꪥ.

5-ꪶꪊꪚ ꪶꪔ ꪶꪄꪚ

ꪚꪮꪙ ꪑꪴꪉ ꪶꪄꪚ ꪶꪔ ꪵꪔꪙ ꪨꪽ ꪣꪲ ꪹꪏꪉ ꪻꪁ ꪵꪒꪉ ꪄꪙꪳ ,ꪐꪣꪸ ꪶꪒꪀ ,ꪹꪣꪱ ꪬꪺ, ꪣꪲ ꪹꪏꪉ ꫃ꪥꪒ ꪬꪫꪒꪸ ꪮꪱꪚ ꪤꪮꪙ ꪶꪩꪉ ,ꪬꪱ ꪻꪊ ꪀꪚꪾ ꪹꪚꪱ ꪁꪷ ꪹꪢꪒ ꪣꪮꪥ ꪼꪜ.

ꪩꪺꪉ ꪹꪤꪱ ꪤꪱ: ꫄ꪁꪙ ꪤꪱ ꪼꪈ ꪚꪮꪙ ꪊꪺꪚ ꪶꪔ ꪵꪔꪙ ꪒꪽ ꪀꪺꪉ ꪥꪱꪙ ꫄ꪋ ꫜ ꪶꪀꪀ ꪵꪅꪫ. ꪹꪣ ꪵꪅꪫ ꫄ꪁꪙ ꪼꪒ ꪹꪮꪱ ꪼꪩ ꪮꪮꪀ ꪎꪸ, ꪹꪮꪱ ꪎꪱꪥ ꪠꪴꪀ ꪭꪒꪰ ꪕꪱꪉ ꪀꪮꪉ ꪝꪱ ꪚꪱꪒ ꪼꪫ ꪀꪽ ꫄ꪕꪙ ꪹꪚꪱ ꪻꪬ ꫄ꪊꪒ ꪶꪒꪀ ꪩꪱꪣ ꪼꪜ ꪚꪮꪙ ꪮꪙꪳ.

6-꫃ꪊꪚ ꪶꪚꪀ ꪁꪷ

          ꪀꪙꪲ ꪵꪀꪣ ,ꪀꪙꪲ ꪙꪣꪾ ꪒꪱꪙ ꪁꪣꪳ ꪹꪚꪱ ꪁꪷ ꪮꪱꪚ ꪙꪣꪾ ꪁꪣꪳ ꪨꪷ ꪶꪀꪀ ꪜꪱꪥ ꫃ꪥꪒ ꫃ꪜꪙ ꫃ꪛꪉ.

          ꪩꪺꪉ ꪋꪳ ꪡꪮꪉ ꪵꪀꪉ ꪩꪺꪉ ꪹꪤꪱ ꪤꪱ: ꪀꪙꪲ ꪙꪣꪾ ꪮꪴꪙ ꪮꪮꪙ ,ꪁꪷ ꪝꪽ ꪄꪽ. ꪫꪱ ꫃ꪜꪙ ꪘꪀꪰ ꪨꪷ ꪼꪒ ꪀꪙꪲ ꪤꪱ ꪹꪝ ꫃ꪛꪉ ꪙꪲ ꪁꪷ ꪬꪣꪸ ꪭꪱꪥ ꪭꪮꪒ ꪢꪱꪀ ꪬꪺ ꪻꪊ ꪵꪀꪉ ꪢꪱꪀ ꪼꪎ ꪨꪉꪰ.

          7-꫃ꪛꪉ ꫃ꪊꪚ ꪜꪴꪣ

          ꪝꪉꪳ ꪵꪣꪉ ꫃ꪛꪉ ꫃ꪥꪒ ꫃ꪜꪙ ꪮꪮꪀ ꫃ꪛꪉ ꪁꪷ ꪣꪲ ꪘꪉꪰ ꪨꪱꪥ ꪚꪮꪙ .ꪵꪣꪉ ꫃ꪛꪉ ꪁꪷ ꪵꪝ ꪮꪮꪀ ꪫꪽ ꫄ꪋ ꪡꪱ ꪵꪒꪒ ꪭꪮꪙ ꪵꪀꪉ ꪣꪲ ꪹꪏꪉ ꪹꪄꪱ ꪹꪣ ꪀꪺꪉ ꪩꪣꪾ ꪣꪷ ꪕꪮꪥ ꪁꪣꪾ ꪀꪙꪲ.

          ꪩꪺꪉ ꪹꪤꪱ ꪤꪱ: ꪀꪙꪲ ꪤꪱ ꪼꪫ ꪻꪬ ꫄ꪊꪒ ꪶꪒꪀ ꪀꪺꪉ  ꪩꪣꪾ ꪣꪷ ꪮꪮꪀ ꪣꪱ ꪔꪱꪉ ꪙꪮꪀ ꪎꪸ, ꪎꪮꪉ ꪣꪱ ꫃ꪜꪙ ꪀꪙꪲ ꪨꪱꪥ ꪙꪣꪾ. ꫄ꪋ ꫃ꪊꪚ ꪜꪴꪣ ꫃ꪜꪙ ꪀꪙꪲ ꪹꪄꪱ ꪵꪀꪉ ꪵꪨꪫ.

          ꪩꪺꪉ ꪋꪳ ꪡꪮꪉ: ꪹꪮꪱ ꪎꪱ ꪡꪮꪉ ꪎꪺꪥ ꪣꪳ ꪀꪮꪙ ꫄ꪋ ꪀꪙꪲ ꪵꪀꪉ ꪼꪜ ꪋꪳ ꪁꪣꪾ ꪀꪙꪲ ꪵꪣꪙ ꪩꪺꪉ.