Mák nuối bàn côn pền bệnh niểu bàn nắc chí kìn đảy va báu?

Chiêng pi nọng hặc xường! Bệnh niểu bàn nắc lỏ tàng bệnh hiểm hại. ăn nị lỏ tàng bệnh lâng hền cướt sình ók chơ chất bàn cuồng lượt lưn khửn xùng cài mức hẳư phép. Chu côn mi xương chí chuốp pền bệnh nị chăm va pùn lan đằư, nặp cá làn nọi.

          Khù đáng pồng chằư ặn lỏ côn pền bệnh niểu bàn cọ báu hụ chảu đàng pền bệnh, tạu họt chơ hền biến chứng hiểm hại xương chếp mák hùa chằư, huyết áp dón lông tắm lài…

          Toi pưng bác sỹ, mák nuối lỏ tàng căm kìn chẹp cánh mi lài Vi ta min cánh khoáng chất, mák ài hòm hường, kìn ngai cánh mi xương kìn đảy lài. Chu côn té thảu ké nóm nọi kìn mák nuối pọm mi lợi hẳư pặc hanh. Riềng đối cắp côn pền bệnh niểu bàn nắc, kìn mák nuối lỏ cận hà vạy tứm ten pưng chất dinh dưỡng, Vi ta min cánh khoáng chất hẳư lăm mo.

Khù cận pồng chằư lỏ côn pền bệnh niểu bàn nắc cận đảy kìn căm chất bàn. Cuồng mák nuối bàn mi lài chất bàn Fructoza cánh chất bàn Glucora, chơ kìn khảu mưa lỏ sam khảu mưa cuồng lăm mo ngày, dệt hẳư chất bàn cuồng lượt lưn khửn xùng. Pưa xương nặn, côn pền bệnh niểu bàn nắc báu pền kìn lài mák nuối bàn xương mák muông, mák mị, mák nà. Vạy chự phong chất bàn dón lông tắm lài cuồng dan báng càng 2 pựa kìn  báu cọ lằng chơ dẹt vịa, côn chếp mi xương kìn mák nuối lệch nọi vạy nhẳn pao pặc hanh.

          Côn pền bệnh niểu bàn nắc mi xương kìn mák nuói toi lang áo khòng chảu hák va pi nọng pền pồng chằư lựa chọn pưng tàng mák nuối báu bàn lài xương mák kiểng, mák lê, mák cai, mák mặn, mák uổi, mák táo, mák tành nặm./.

T Thuỳ-Huyền dịch

          ꪢꪱꪀ ꪘꪺꪥ ꪚꪱꪙ ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪊꪲ ꪀꪙꪲ ꪼꪒ ꪫꪱ ꪹꪚꪱ

          ꪋꪉꪸ ꪝꪲ ꪙꪮꪉ ꪭꪀꪰ ꪹꪎꪉ! ꫃ꪛꪉ ꪘꪫꪸ ꪚꪱꪙ ꪘꪀꪰ ꪨꪷ ꪔꪱꪉ ꫃ꪛꪉ ꪬꪣꪸ ꪭꪱꪥ. ꪯꪽ ꪙꪲ ꪨꪷ ꪔꪱꪉ ꫃ꪛꪉ ꫄ꪩꪉ ꫃ꪬꪙ ꪹꪀꪒ ꪎꪉꪲ ꪮꪮꪀ ꫄ꪋ ꫄ꪊꪒ ꪚꪱꪙ ꪀꪺꪉ ꪹꪩꪒ ꪹꪩꪙ ꪄꪙꪳ ꪎꪴꪉ ꪀꪱꪥ ꪢꪀꪳ ꪻꪬ ꪵꪠꪚ. ꪋꪴ ꫛ ꪣꪲ ꪹꪏꪉ ꪋꪲ ꪊꪺꪚ ꫃ꪜꪙ ꫃ꪛꪉ ꪙꪲ ꪋꪣꪾ ꪫꪱ ꪜꪴꪙ ꪩꪱꪙ ꪻꪒ ꪙꪚꪾ ꪀꪱ ꪨꪱꪙ ꪙꪮꪥ.

          ꪄꪴ ꪒꪱꪉ ꪶꪜꪉ ꪻꪊ ꪯꪽ ꪨꪷ ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪁꪷ ꪹꪚꪱ ꪭꪴꪴ ꪹꪊꪱ ꪒꪱꪉ ꫃ꪜꪙ ꫃ꪛꪉ, ꪹꪕꪱ ꪭꪮꪒ ꫄ꪋ ꫃ꪜꪙ ꪘꪀꪰ ꪬꪣꪸ ꪭꪱꪥ ꪹꪏꪉ ꫃ꪊꪚ ꪢꪱꪀ ꪬꪺ ꪻꪊ ,ꪬꪫꪒꪸ ꪮꪱꪚ ꪤꪮꪙ ꪶꪩꪉ ꪔꪣꪾ ꪨꪱꪥ.

          ꪕꪮꪥ ꪝꪉꪳ ꪚꪱꪀ ꪎꪲ ꪢꪱꪀ ꪘꪺꪥ ꪨꪷ ꪔꪱꪉ ꪁꪣꪾ ꪀꪙꪲ ꪵꪋꪚ ꪣꪲ ꪨꪱꪥ ꪫꪲ ꪕꪱ ꪣꪙꪲ ꪵꪀꪉ ꪄꪫꪱꪉ ꫄ꪊꪒ ,ꪢꪱꪀ ꪮꪱꪥ ꪬꪮꪣ ꪹꪬꪉ, ꪀꪙꪲ ꪉꪱꪥ ꪵꪀꪉ ꪣꪲ ꪹꪏꪉ ꪀꪙꪲ ꪼꪒ ꪨꪱꪥ. ꪋꪴ ꫛ ꪵꪔ ꪹꪖꪱ ꪵꪀ ꪘꪮꪣ ꪙꪮꪥ ꪀꪙꪲ ꪢꪱꪀ ꪘꪺꪥ ꪝꪮꪣ ꪣꪲ ꫄ꪨꪥ ꪻꪬ ꪝꪀꪰ ꪵꪭꪉ. ꪤꪉꪸ ꪶꪒꪥ ꪀꪚꪾ ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪀꪙꪲ ꪢꪱꪀ ꪘꪺꪥ ꪨꪷ ꫄ꪁꪙ ꪬꪱ ꪼꪫ ꪔꪣꪳ ꪵꪕꪙ ꫄ꪊꪒ ꪤꪉꪲ ꪹꪤꪉ, ꪫꪲ ꪕꪱ ꪣꪲꪙ ꪵꪀꪉ ꪄꪫꪱꪉ ꫄ꪊꪒ ꪻꪬ ꪩꪣꪾ ꪣꪷ.

          ꪄꪴ ꫄ꪁꪙ ꪶꪜꪉ ꪻꪊ ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꫄ꪁꪙ ꪼꪒ ꪀꪙꪲ ꪁꪣꪾ ꫄ꪊꪒ ꪚꪱꪙ. ꪀꪺꪉ ꪢꪱꪀ ꪘꪺꪥ ꪚꪱꪙ ꪢꪲ ꪨꪱꪥ ꫄ꪊꪒ Fructoza  ꪵꪀꪉ ꫄ꪊꪒ ꪚꪱꪙ Glucora ꫄ꪋ ꪀꪙꪲ ꪨꪷ ꪏꪱꪣ ꪹꪄꪱ ꪹꪣ ꪀꪺꪉ ꪩꪣꪾ ꪣꪷ ꪼꪈ ,꫃ꪥꪒ ꪼꪬ ꫄ꪊꪒ ꪚꪱꪙ ꪀꪺꪉ ꪹꪩꪒ ꪩꪙꪳ ꪄꪙꪳ ꪎꪴꪉ. ꪹꪝ ꪹꪏꪉ ꪙꪽ ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪹꪚꪱ ꫃ꪜꪙ ꪀꪙꪲ ꪨꪱꪥ ꪢꪱꪀ ꪘꪺꪥ ꪚꪱꪙ ꪹꪏꪉ ꪢꪱꪀ ꪣꪺꪉ, ꪢꪱꪀ ꪣꪲꪀ, ꪢꪱꪀ ꪘꪱ. ꪼꪫ ꪋꪳ ꪡꪮꪉ ꫄ꪊꪒ ꪚꪱꪙ ꪤꪮꪙ ꪶꪩꪉ ꪔꪣꪾ ꪨꪱꪥ ꪀꪺꪉ ꪥꪱꪙ ꪀꪱꪉ 2 ꪹꪝ ꪀꪙꪲ ꪹꪚꪱ ꪁꪷ ꪨꪉꪰ ꫄ꪋ ꫃ꪤꪒ ꪫꪀꪸ ,ꫛ ꫃ꪊꪚ ꪣꪲ ꪹꪏꪉ ꪀꪙꪲ ꪢꪱꪀ ꪘꪺꪥ ꫃ꪩꪀ ꪙꪮꪥ ꪼꪫ ꪐꪽ ꪝꪱꪫ ꪝꪀꪰ ꪵꪭꪉ.

          ꫛ ꫃ꪜꪙ ꫃ꪛꪉ ꪘꪫꪸ ꪚꪱꪙ ꪘꪀꪰ ꪣꪲ ꪹꪏꪉ ꪀꪙꪲ ꪢꪱꪀ ꪘꪺꪥ ꪕꪮꪥ ꪩꪱꪉ ꪮꪱꪫ ꪄꪮꪉ ꪹꪊꪱ ꪬꪱꪀ ꪫꪱ ꪝꪲ ꪙꪮꪉ ꫃ꪜꪙ ꪶꪜꪉ ꪻꪊ ꪹꪩꪀ ꪋꪮꪙ ꪝꪉꪳ ꪔꪱꪉ ꪢꪱꪀ ꪘꪺꪥ ꪹꪚꪱ ꪚꪱꪙ ꪨꪱꪥ ꪹꪏꪉ ꪢꪱꪀ ꪀꪉꪸ ,ꪢꪱꪀ ꫃ꪩ ,ꪢꪱꪀ ꪁꪱꪥ ,ꪢꪱꪀ ꪣꪽ ,ꪢꪱꪀ ꪮꪺꪥ ,ꪢꪱꪀ ꪔꪱꪫ ,ꪢꪱꪀ ꪵꪔꪉ ꪙꪣꪾ.

ꪹꪩꪉ ꪭꪫꪙꪸ ꪥꪀꪲ