ꪵꪔꪉ ꪩꪉꪸ ꪼꪀ ꪁꪫꪱꪉ, ꪩꪺꪉ ꫃ꪥꪒ ꪭꪉꪷ ꪻꪬ ꪝꪲ ꪙꪮꪉ ꪶꪠꪉ ꪎꪉꪴ

        ꪀꪚꪾ ꪀꪱꪥ 15 ꪝꪽ ꪒꪙꪲ ꪼꪬ ꪎꪺꪙ ꪘꪉꪷ ꪶꪗꪙ ꪙꪣꪷ ꪹꪊꪱ, ꪎꪱ ꪔꪱ ꪊꪱꪥ ꪭꪫꪙꪸ ꪚꪀꪷ ꪬꪱ ꪔꪉꪲ ꪩꪱꪫ ꪀꪱꪥ , ꪬꪺ ꪜꪲ 2015 ꪹꪮꪥ ꪈꪫꪙꪸ ꪩꪱꪙ ꪵꪯꪉ ꪁꪷ ꪀꪴ ꪀꪱꪥ 100 ꪋꪫꪥꪸ ꪢꪽ ꪵꪔ ꫄ꪈꪙ ꪭꪱꪉ ꪝꪮꪣ ꪀꪚꪾ ꪶꪎ ꫃ꪉꪘ ꪼꪠ ꪤꪮꪣ ꪼꪒꪶ ꪹꪮꪥ ꪤꪮꪣ ꪻꪎ ꪫꪀꪸ ꪵꪔꪉ ꪩꪉꪸ ꪼꪀ ꪁꪫꪱꪉ ꪜꪮꪥ ꪀꪺꪉ ꪎꪺꪙ. ꪋꪺ ꪹꪭꪙ ꪹꪮꪥ ꪁꪷ ꪤꪮꪣ ꪮꪮꪀ 50 ꪋꪫꪥꪸ ꪢꪽ ꪼꪫ ꪏꪳ ꪭꪺꪀ ꫃ꪨꪀ ꪢꪱ ꪩꪮꪣ , ꪀꪱꪥ 70 ꪋꪫꪸꪥ ꪢꪽ ꪏꪳ ꪝꪽ ꫜ ꪶꪔ ꪹꪋ ꪵꪀꪉ ꪭꪣꪾ ꪼꪫ ꪹꪀ ꪼꪀ. ꪹꪝ ꪩꪣꪾ ꪒꪴ ꪵꪣꪙ ꪀꪲ ꪗꪺꪒ ꪵꪀꪉ ꫄ꪅꪉ ꪋꪳ ꪡꪮꪉ ꫃ꪛꪉ ꪹꪏꪉ ꪙꪽ ꪝꪉꪳ ꪼꪀ ꪢ ꪱꪵꪝ ꪫꪽ, ꪼꪅ ꪁꪷ ꪵꪝ ꪮꪮꪀ ꪋꪲ ꪮꪱꪫ ꪬꪮꪒ 4 ꪝꪽ ꪶꪔ. ꪀꪱ ꪄꪱꪥ ꪜꪽ ꫄ꪝꪉ ꪼꪜ ꪵꪔ 190 ꪝꪽ ꪭꪮꪒ 200 ꪝꪽ ꪢꪽ ꪢꪮꪥ ꫄ꪀꪙ , ꪵꪔ ꪙꪽ ꪹꪮꪥ ꪁꪷ ꪣꪲ ꫄ꪉꪙ ꪎꪴ ꪶꪤꪉ ꪵꪔ ꪫꪀꪸ ꪄꪱꪥ ꪼꪀ.

          ꪹꪚꪱ ꪎꪺꪙ ꪕꪷ ꫃ꪥꪒ ꪭꪉꪷ ꪻꪬ ꪋꪺ ꪹꪭꪙ ꪹꪊꪱ ꪩꪱ, ꪹꪮꪥ ꪩꪱꪙ ꪵꪯꪉ ꪑꪉꪷ ꫄ꪩꪉ ꫄ꪋ ꪵꪚꪉ ꪜꪽ ꪀꪉꪲ ꪉꪣꪸ ꪵꪔꪉ ꪩꪉꪸ ꪼꪀ ꪁꪫꪱꪉ ꪻꪬ ꪝꪲ ꪙꪮꪉ.

          ꪭꪫꪙꪸ ꪶꪠꪉ ꪎꪉꪴ ꪚꪀꪷ ꪬꪱ ꪒꪱꪉ ꪤꪮꪣ ꫄ꪉꪙ ꪢꪱ ꪼꪄ ꪤꪴ ꪩꪀꪲ, ꪹꪏꪉ ꪙꪽ ꪵꪄꪀ ꪥꪴ ꪩꪀꪲ ꪣꪱ ꪤꪱꪣ ꪥꪉꪷ ꪤꪮꪣ ꪹꪑꪉ ꪣꪳ ꪹꪑꪉ ꪨꪱꪥ. ꪩꪺꪉ ꪵꪔꪉ ꪩꪉꪸ ꪼꪀ ꪁꪫꪱꪉ ꪨꪷ ꪩꪺꪉ ꫃ꪥꪒ ꫜ ꪼꪫ ꪢꪱ ꪼꪄ ꪥꪴ ꪩꪀꪲ ꪁꪱꪒ ꪁꪙꪸ ꪀꪚꪾ ꪶꪘꪉ ꪉꪚꪸ.

          ꪶꪔ ꪼꪀ ꪁꪫꪱꪉ ꪨꪷ ꪹꪋ ꪼꪀ ꪓꪸ ꪹꪠꪉ, ꪘꪉꪷ ꪵꪀꪉ ꪒꪀꪴ ꪝꪮꪣ ꪹꪢꪱ ꪒꪣꪾ, ꪹꪐ ꪘꪱ ꪬꪽ, ꪀꪙꪲ ꪵꪋꪚ ꪮꪱꪥ ꪬꪮꪣ , ꪹꪚꪱ ꪣꪲ ꪝꪲ ꪨꪱꪥ ꪹꪏꪉ ꪹꪋ ꪼꪀ ꪮꪙꪳ ꪘꪉꪷ ꪓꪸ ꪹꪠꪉ ꪵꪀꪉ ꪨꪷ ꪔꪱꪉ ꪤꪱ ꪀꪫꪲꪥ ꪄꪮꪉ ꪝꪲ ꪙꪮꪉ.

          ꪩꪺꪉ ꪵꪔꪉ ꪩꪉꪸ ꪼꪀ ꪁꪫꪱꪉ ꪄꪮꪉ ꪋꪺ ꪹꪭꪙ ꪹꪮꪥ ꪈꪫꪙꪸ ꪨꪱꪙ ꪵꪯꪉ ꪁꪷ ꪶꪭꪣ ꫄ꪡꪙ ꪻꪎ ꪫꪀꪸ ꪜꪙꪸ ꪖꪱꪥ ꪹꪋ ꪡꪽ ꪀꪷ ꪜꪀꪴ ꪶꪚꪉ , ꪶꪔ ꪵꪔꪉ ꪩꪉꪸ, ꪋꪴ ꪼꪒ ꪝꪉꪳ ꪔꪱꪉ ꪶꪔ ꪹꪋ ꪀꪫꪲꪥꪶ ꫃ꪤꪒ ꪮꪮꪀ ꪝꪉꪳ ꪔꪱꪉ ꪹꪋꪉ ꪭꪱꪉ ꪄꪱꪥ ꪼꪒ ꪁꪱ ꪁꪮꪙ ꪎꪉꪴ. ꪀꪱꪥ ꪙꪽ ꪋꪮꪥ ꪝꪷ ꪼꪭ ꪵꪣ ꪙꪱ ꪜꪙꪸ ꪻꪢ ꪩꪺꪉ ꪈꪣꪾ, ꪫꪀꪸ ꫃ꪥꪒ, ꪋꪱꪉ ꪵꪔꪭ ꪮꪮꪀ ꪨꪱꪥ ꪩꪺꪉ ꫃ꪤꪒ ꪹꪥꪙ ꪁꪷ ꪹꪏꪉ ꪵꪔꪉ ꪩꪉꪸ ꪁꪒꪳ ꪼꪒ ꪩꪱꪉ ꪒꪲ.

                                                                   ꪵꪗꪉ ꪖꪫꪲꪥ - ꪵꪭꪉ ꪥꪀꪲ

Tảnh liệng cáy quang, luông dệt hăng hảu pi nọng phổng xùng

        Cắp cài 15 păn đin hay xuân nẳng thôn Nặm Châu, xã Tà Chải, huyện bắc Hà, tỉnh Lao Cài, hùa pi 2015 ưởi Nguyễn Lan Anh cọ củ cài 100 triệu mằn té Ngân hang pọm cắp số ngơn phảy dom đảy, ưởi cọ dom sáư vịa tảnh liệng cáy quang pói cuông xuân. Chua hươn ưởi cọ dóm ók 50 triệu mằn vạy sự hụa lếch ma lọm, cài 70 triệu mằn vạy sự păn nưng tô chựa cánh hăm cừa cáy. Pưa lăm đu men kỹ thuật cánh khâng chự phong bệnh xương nặn pưng cáy mả pe văn, khay cọ pe ók chi áo họt 4 păn tô. Ca khài păn pâng pày té 190 păn họt 200 păn mằn mỏi cân, té nặn ưởi cọ mi ngơn xủ dống té vịa khài cáy.              Báu xuấn to dệt hăng hảu chua hươn chảu lạ, ưởi Lan Anh nhăng lâng chơ bánh păn luông tảnh liệng cáy quang cắp pi nọng.

        Huyện Phổng xùng Bắc Hà đang dom ngơn mả khày du lịch, xương nặn khék du lịch ma dam, dặng dom nhương mự nhương lài. Luông tảnh liệng cáy quang lỏ luông dệt nưng vạy mả khay du lịch cạt kiên cắp nông nghiệp.

          Tô cáy quang lỏ chựa cáy địa phương, nằng cánh đúk pọm màu đằm, nhứa nà hằn, kin chẹp ai hòm, báu mi pi lài xương chựa cáy ứn nẳng địa phương cánh lỏ tàng dà quý khong pi nọng.

          Luông tảnh liệng cáy quang khong chua hươn ưởi Nguyễn Lan Anh cọ hôm phân sáư vịa piến thái chựa phăn co púk bông, tô tảnh liệng, chự đảy pưng tang tô chựa quý, dệt ók pưng tàng chương hang khai đảy ca con xùng. Cài nặn choi po hay me na piến máư luông ngắm, vịa dệt, chang tánh ók lai luông dệt dượn cọ xương tảnh liệng cựt đảy lang đi ./.

Thanh Thuỷ - Hạnh dịch