ꪮꪙꪸ ꪚꪱꪥ - ꪚꪮꪙ ꪣꪱ ꪮꪙꪲ ꪤꪱꪣ ꪘꪉꪰ ꪶꪠꪉ ꪼꪔ ꪚꪀꪰ

          ꪣꪲ ꪥꪱꪙ ꪼꪜ ꪀꪱꪥ 3 ꪔꪉꪲ ꪠꪴ ꪖꪷ-ꪮꪙꪸ ꪚꪱꪥ-ꪩꪱꪫ ꪀꪱꪥ ,ꪵꪄꪀ ꪤꪴ ꪩꪲꪀ ꪻꪒ ꪀꪷ ꪼꪒ ꪥꪉꪰ ꫄ꪚꪉ ꪵꪩ ꪝꪉꪳ ꪭꪮꪙ ꪙꪱ ꪁꪽ ꪭꪮꪙ ꪢꪴ ꪀꪱꪉ ꪊꪱꪥ. ꪼꪅ ꪙꪲ, ꪝꪉꪳ ꪭꪮꪙ ꪙꪱ ꪁꪽ ꪭꪮꪙ ꪼꪒ ꪶꪛ ꪪꪽ ꪬꪫꪱ, ꫃ꪖ  ꪖꪱꪫ ꪵꪀꪉ ꪥꪴ ꪩꪲꪀ ꫄ꪀꪚ ꪛꪉꪰ ꪎꪚꪸ ꪔꪱꪉ ꪚꪮꪙ ꪙꪣꪾ ꪒꪙꪲ ꪅꪽ ꪋꪽ ꪵꪠꪙ ꪹꪣꪉ ꪜꪲ 2017 ꪣꪺ ꪘꪱꪫ ꪙꪲ ꪁꪷ ꪹꪚꪱ ꪫꪱꪉ ꪒꪲꪙ ꪹꪭ ,ꪼꪅ ꪁꪷ ꪹꪨꪉ ꪏꪱꪉ ꪚꪷ ꪠꪀꪰ ꪵꪩ ꪋꪽ ꪉꪱꪣ ꪔꪱ.

          ꪁꪷ ꪵꪜ  ꪵꪏꪉ ꪝꪉꪳ ꪔꪉꪲ ꪼꪔ ꪚꪀꪰ ꪮꪙꪳ, ꪮꪙꪸ ꪚꪱꪥ ꪐꪽ ꪵꪥꪉ ꪤꪴ ꪩꪲꪀ ꪚꪱꪙ ꪄꪺꪉ ꪨꪷ ꪩꪺꪉ ꪵꪭꪉ ꪀꪺꪉ ꪫꪀꪸ ꫃ꪥꪒ ꪤꪴ ꪩꪲꪀ. ꪹꪝ ꪵꪏꪉ ꪙꪽ ꪵꪔ ꪝꪉꪳ ꪭꪫꪙꪸ ꪤꪴ ꪶꪠꪉ ꪔꪣꪾ ꪵꪏꪉ ꪪꪽ ꫄ꪊꪘ ,ꪪꪽ ꪮꪙꪸ, ꪮꪙꪸ ꪚꪲꪉ ꪭꪮꪒ ꪝꪉꪳ ꪭꪫꪙꪸ ꪶꪠꪉ ꪎꪴꪉ ꪢꪴ ꪀꪱꪉ ꪊꪱꪥ ꪵꪀꪉ ꪋꪱꪣ ꪹꪔꪱ, ꪊꪉꪲ ꪁꪫꪙꪸ ꪒꪸ ꪹꪠꪉ ꪝꪮꪣ ꪋꪙꪸ ꪜꪱꪫ, ꪋꪮꪥ ꫛ ꫄ꪤꪙ ꫃ꪥꪒ ꪤꪴ ꪩꪲꪀ.

          ꪝꪉꪳ ꪚꪮꪙ ꪙꪣꪾ ꪒꪲꪙ ꪅꪽ ꪋꪽ ꪵꪀꪉ ꪝꪉꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꪹꪚꪱ ꪣꪲ ꪨꪱꪥ ꪕꪷ ꪝꪉꪳ ꪔꪉꪲ ꪮꪙꪳ ꪀꪺꪉ ꪶꪠꪉ ,ꪮꪙꪸ ꪚꪱꪥ ꪐꪽ ꪵꪥꪉ ꪼꪒ ꪝꪉꪳ ꪩꪺꪉ ꪭꪉꪰ ꪵꪭꪉ ꪥꪉꪸ ꪼꪫ ꪜꪴꪀ ꪋꪺꪙ ꪵꪄꪀ ꪣꪱ ꪮꪙꪸ ꪤꪱꪣ ꪹꪏꪉ ꪵꪠꪒ ꪕꪲ ꪫꪱꪙ ꪵꪕꪫ ꪏꪴ ꪘꪉꪰ ꪝꪴ ꪹꪄꪱ ꪡꪱ-ꪢꪴ ꪀꪱꪉ ꪊꪱꪥ. ꪨꪷ ꪚꪮꪘ ꪼꪫ ꪵꪕꪫ ꪏꪴ ꪋꪽ ꫄ꪐꪒ ꪫꪒꪸ ꪘꪱꪣ ꪵꪀꪉ ꫃ꪕꪉ ꪵꪠꪙ ꪒꪲꪙ; ꪖꪲ ꪎꪱ ꪈꪸ ꪶꪨ ꪁꪷ ꫄ꪩꪉ ꪶꪔ ꪊꪀꪳ ꪵꪏ ꪫꪮꪉ ꪀꪚꪾ ꪨꪱꪥ ꫛ ꪹꪭꪉ ꪨꪱꪥ ꪫꪀꪸ ꫃ꪥꪒ ꪮꪙꪳ.

          ꪝꪉꪳ ꪜꪲ ꪊꪣꪾ ꪙꪲ ꪤꪴ ꪩꪲꪀ 2 ꪔꪲꪉ ꪠꪴ ꪖꪷ -ꪩꪱꪫ ꪀꪱꪥ ꪁꪷ ꪢꪱ ꪼꪄ ꪬꪽ ꪵꪭꪉ. ꪤꪴ ꪀꪱꪉ 2 ꪒꪸ ꪹꪠꪉ ꪙꪲ ꪮꪙꪸ ꪚꪱꪥ ꪁꪷ ꪵꪣꪙ ꪒꪸ ꪹꪠꪉ ꫜ ꪉꪱꪥ ꪒꪲ ꪀꪺꪉ ꪫꪀꪸ ꪢꪱ ꪼꪄ ꪤꪴ ꪩꪲꪀ. ꪩꪺꪉ ꪵꪭꪉ ꪄꪮꪉ ꪔꪉꪸ ꪮꪙꪸ ꪚꪱꪥ ꪨꪷ ꫄ꪎꪣ ꪕꪱꪉ ꪵꪎ ꪵꪩꪙ ꪫꪽ ꪶꪘꪥ ꪚꪱꪥ-ꪩꪱꪫ ꪀꪱꪥ ꪁꪷ ꪉꪱꪥ ꪒꪲ ꪻꪬ ꪔꪉꪲ ꪹꪝ ꫄ꪥꪒ ꪶꪣꪣ ꪵꪩꪫ ꪹꪮꪱ ꪹꪄꪱ ꪎꪴ. ꪮꪙꪸ ꪚꪱꪥ ꪁꪷ ꪶꪋꪣ ꪔꪮꪙ ꪵꪄꪀ ꪵꪔ ꪝꪉꪳ ꪔꪲꪉ ꪒꪲꪙ ꪻꪔ ꪵꪀꪉ ꪵꪔ ꪔꪉꪲ ꪩꪱꪫ ꪀꪱꪥ ꪶꪩꪉ ꪣꪱ ꪮꪙꪲ ꪤꪱꪣ ꪤꪴ ꪩꪲꪀ.

          ꪜꪲ 2016 ꪋꪮꪣ ꪀꪱꪥ ꪣꪱ, ꪮꪙꪸ ꪚꪱꪥ ꪶꪋꪣ ꪔꪮꪙ ꪀꪱꪥ 500 ꪝꪽ ꪵꪄꪀ ꪤꪴ ꪩꪲꪀ ꪨꪱꪥ ꫄ꪐꪒ ꪙꪚꪾ ꪵꪔ ꪀꪮꪙ ꪣꪱ ꪭꪮꪒ ꪼꪅ ,ꪀꪺꪉ ꪙꪽ ꪣꪲ ꪀꪱꪥ 20.400 ꪵꪄꪀ ꪹꪣꪉ ꪮꪮꪀ ,ꪵꪤꪫꪉ ꪖꪴ ꪁꪒꪳ ꪼꪒ 250 ꪔꪲ ꪢꪽ. ꪼꪫ ꪎꪚꪳ ꪔꪱꪣ ꪜꪴꪀ ꪋꪺꪙ ꪵꪄꪀ ꪤꪴ ꪩꪲꪀ ꪣꪱ ꪮꪙꪲ ꪤꪱꪣ .ꪵꪈꪉ ꪤꪴ ꪩꪲꪀ ꪮꪙꪸ ꪚꪱꪥ ꪒꪱꪉ ꪜꪴꪀ ꪝꪺ ꪘꪱ ꪫꪀꪸ ꪋꪙꪸ ꪜꪱꪫ; ꪤꪮꪣ ꫄ꪉꪙ ꪶꪀꪀ ꪔꪉꪰ ꪵꪔꪉ ꪶꪀꪀ ꪹꪉꪙ ꪎꪉꪲ ꪄꪮꪉ ꪵꪀꪉ ꪕꪱ ꪮꪮꪀ ꪹꪋꪉ ꪭꪱꪉ ꪤꪴ ꪩꪲꪀ ꪻꪢ. ꪀꪱꪥ ꪙꪽ, ꪮꪱ ꪮꪙꪸ ꪚꪱꪥ ꪁꪒꪳ ꫄ꪜꪙ ꪚꪮꪙ ꪼꪒ ꪨꪱꪥ ꪵꪄꪀ ꪣꪱ ꪮꪙꪲ ꪤꪱꪣ ,ꪩꪙꪳ ꪹꪏ ꪨꪷ ꪀꪺꪉ ꪜꪲ ꪴꪤ ꪨꪲꪀ ꪵꪠꪙ ꪹꪣꪉ ꪼꪔ ꪚꪀꪰ ꪜꪲ 2017 ꪙꪲ.

ꪒꪲꪉ ꪶꪔꪙ-ꪬꪫꪙꪸ ꪥꪲꪀ