ꪩꪉꪴ ꪊꪉꪲ ꫃ꪥꪒ ꪭꪉ ꪷꪵꪔ ꪩꪺꪉ ꫃ꪥꪒ ꪀꪉꪲ ꫃ꪔ ꪨꪱꪥ ꪔꪱꪉ

        ꪋꪲ ꪮꪱꪫ ꪭꪮꪒ 70 ꪲꪜꪲ ꫜ, ꪬꪱꪀ ꪫꪱ ꪨꪉꪴ ꪡꪱꪣ ꪏꪺꪙ ꪊꪉꪲ ꪤꪴ ꪘꪉꪷ ꪎꪮꪣ 1, ꪔꪫꪸꪥ ꪄꪴꪴ 6, ꪖꪲ ꫃ꪊꪙ ꪬꪱꪒ ꪨꪮꪒ , ꪭꪫꪸꪙ ꪢꪱꪥ ꫄ꪎꪙ , ꪔꪉꪲ ꫄ꪎꪙ ꪨꪱ ꪑꪉꪷ ꪊꪮꪉ ꪵꪭꪉ ꪢꪱ ꪼꪄ ꪀꪉꪲ꫃ꪔ ꪹꪭꪙ ꪤꪱꪫ. ꪊꪮꪙ ꪙꪽ ꪩꪉꪴ ꪊꪉꪲ ꪁꪷ ꪣꪲ ꪥꪱꪙ ꪝꪷ ꪨꪱꪥ ꪥꪱꪀ ꪋꪱ, ꪝꪀꪷ ꪵꪭꪉ ꪮꪥꪸ, ꫄ꪋ ꪙꪽ ꪕꪱꪉ ꫄ꪎꪙ ꪨꪱ ꪼꪜ ꪣꪱ ꪑꪉꪷ ꪤꪱꪀ ꪋꪱ ꪹꪏꪉ ꪙꪽ ꪩꪉꪳ ꪎꪷ ꪥꪉꪷ ꪼꪫ ꪝꪮꪣ ꪀꪚꪴꪾ ꪣꪸ ꫛꪥꪒ ꪹꪥꪙ ꫄ꪅꪉ ꪨꪷ ꪻꪬ ꪩꪀꪴ ꪹꪔꪱ ꪵꪮꪚ ꪭꪮꪀꪌ

          ꪨꪉꪷ ꫄ꪋ ꪔꪱꪫ ꪢꪱ ꪓꪸ ꪹꪠꪉ , ꪶꪋꪣ ꪭꪚꪾ ꪎꪉꪲ ꪭꪫꪱꪒ ꪶꪭꪥ ꪶꪘꪉ ꫄ꪤꪙ ꪘꪉꪷ ꪖꪲ ꫄ꪊꪙ , ꪝꪮꪣ ꪀꪚꪾ ꪩꪺꪉ ꪊꪮꪉ ꪵꪭꪉ ꪋꪮꪥ ꪹꪤ ꪣꪱ ꪕꪱꪉ ꫄ꪉꪙ ꪶꪀꪀ ꪵꪀꪉ ꪩꪺꪉ ꪭꪴꪤ ꪋꪱꪉ ꪣꪱ ꪕꪱꪉ ꪶꪭꪥ , ꪘꪉ ꪷ ꪔꪱ ꪒꪙꪲ 5 ꪵꪬꪀ ꪕꪱ ꪒꪙꪲ ꪎꪺꪙ ꪝꪴ ꪄꪮꪉ ꪋꪺ ꪹꪭꪙ ꪩꪉꪴ, ꪩꪉꪴ ꪊꪉꪲ ꪜꪀꪴ ꪀꪷ ꪀꪙꪲ ꪢꪱꪀ , ꪵꪔꪉ ꪩꪉꪸ ꪼꪀ ꪜꪮꪥ ꪀꪺꪉ ꪎꪺꪙ, ꪬꪱꪀ ꪪ ꪱꪨꪱꪉ ꪒꪲ ꪀꪉꪲ ꫃ꪔ ꫃ꪭ ꪼꪒ ꪕꪷ ꪻꪒ. ꪨꪉꪷ ꫄ꪋ ꪼꪜ ꪤꪱꪣ ꪵꪮꪚ ꪭꪮꪀ ꪘꪉꪷ ꪏꪱꪙ ꪩꪺꪉ ꫃ꪥꪒ ꪀꪉꪲ ꫄ꪔ ꪶꪝꪙ ꪤꪮꪙ ꪘꪉꪷ ꪔꪉꪲ, ꪩꪉꪴ ꫃ꪬꪙ ꪩꪺꪉ ꪵꪔꪉ ꪩꪉꪸ ꪔꪱ ꪔꪸꪙ ꪋꪮꪘ ꪅꪷ ꪀꪚꪾ ꪋꪺ ꪹꪭꪙ ꪹꪊꪱ, ꪩꪉꪴ ꪁꪷ ꪶꪎ ꪫꪱꪙ ꪀꪚꪾ ꪩꪀꪴ ꪣꪸ ꪤꪮꪣ ꪻꪎ  ꪫꪀꪸ ꪵꪔꪉ ꪩꪉꪸ ꪔꪱ ꪔꪙꪸ. ꪜꪲ 2012, ꪩꪉꪴ ꪊꪉꪲ ꪔꪉ ꪶꪀꪀ ꪩꪉꪸ 10 ꪶꪀꪙ ꪔꪱ ꪔꪙꪸ, ꪨꪉꪷ ꪜꪲ ꫜ ꫃ꪬꪙ ꫄ꪉꪙ ꪤꪮꪣ ꪻꪎ ꪹꪚꪱ ꪨꪱꪥ , ꪵꪩꪫ ꪄꪱꪥ ꪙꪾ ꪔꪱ ꪔꪙꪸ ꪁꪷ ꪼꪒ , ꪹꪏꪉ ꪙꪽ ꪋꪺ ꪹꪭꪙ ꪩꪉꪴ ꪩꪉꪸ ꪔꪣꪳ ꪨꪱꪥ ꪶꪀꪙ ꪔꪱ ꪔꪙꪸ, ꪭꪮꪒ ꪼꪅ ꪁꪷ ꪣꪲ ꪋꪲ ꪮꪱꪫ ꪭꪮꪒ 50 ꪶꪀꪙ ꪔꪱ ꪔꪙꪸ.

          ꪀꪚꪾ ꪝꪉꪳ ꪄꪴ  ꪄꪮꪠ ꪮꪮꪀ ꪵꪔ ꪝꪉꪳ ꫄ꪨꪚ ꪋꪙꪸ ꪀꪱꪥ ꪄꪮꪉ ꪶꪭꪥ ꪶꪘꪉ ꫄ꪤꪙ ꪵꪀꪉ ꪝꪉꪳ ꪵꪈꪉ ꪶꪔ ꪊꪀꪳ, ꪀꪱꪥ ꪝꪚꪾ ꪎꪳ ꪵꪀꪉ ꪵꪮꪚ ꪭꪮꪀ ꪘꪉꪷ ꪨꪱꪥ ꪋꪺ ꪹꪭꪙ ꪩꪉꪸ ꪔꪱ ꪔꪙ ꪀꪺꪉ ꪭꪫꪸꪙ, ꪝꪮꪣ ꪀꪚꪾ ꪼꪒ ꪩꪣꪾ ꪒꪴ ꪐꪽ ꪝꪱꪫ  ꪩꪺꪉ ꪜꪙꪴ ꪀꪲ ꪗꪺꪒ ꪹꪏꪉ ꪙꪽ ꪝꪉꪳ ꪶꪀꪙ ꪔꪱ ꪔꪙꪸ ꪄꪮꪉ ꪋꪺ ꪹꪭꪙ ꪢꪱ ꪵꪝ ꪫꪽ, ꪢꪮꪥ ꪜꪲ  ꪄꪴ ꪼꪒ ꪵꪔ 4 ꪕꪱ ꪭꪮꪒ 5 ꪕꪱ, ꪀꪱꪥ ꪕꪱ ꫛ ꫄ꪠꪙ ꪚꪮꪀ ꪵꪀꪉ ꪙꪣꪾ ꪶꪣꪣ ꪶꪔ ꪵꪣ , ꪏꪲ ꪎꪸ ꫄ꪉꪙ ꪶꪀꪀ ꪤꪮꪣ ꪻꪎ ꪔꪱ ꪢꪱ ꪤꪱꪫ 100 ꪋꪫꪥꪸ ꪢꪽ.

          ꪹꪚꪱ ꪎꪺꪙ ꪕꪷ ꪵꪔꪭ ꪩꪉꪸ ꪔꪱ ꪔꪙꪸꪶ ꪀꪚꪾ ꪒꪙꪲ ꪎꪺꪙ ꪀꪱꪫꪉ, ꪨꪉꪴ ꪊꪉꪲ ꪁꪷ ꪁꪱꪒ  ꪢꪱ ꪼꪄ ꪫꪀꪸ ꪵꪔꪉ ꪝꪉꪳ ꪔꪱꪉ ꪎꪒꪷ ꪎꪉꪲ ꪹꪏꪉ ꪶꪔ ꪼꪀ , ꪶꪔ ꪙꪱꪙ , ꪶꪔ ꪶꪙꪀ ꪵꪀꪉ ꪜꪀꪴ ꪝꪉꪳ ꪔꪱꪉ ꪀꪷ ꪀꪙꪲ ꪢꪱꪀ ꪹꪏꪉ ꪢꪱꪀ ꪘꪱ, ꪢꪱꪀ ꪑꪱꪙ , ꪢꪱꪀ ꪜꪀꪴ... ꪵꪔ ꪩꪺꪉ ꪵꪔꪉ ꪩꪉꪸ ꪔꪱ ꪔꪙꪲꪶ ꫃ꪜꪒ ꪼꪀ , ꪜꪴꪀ ꪀꪷ ꪀꪙꪲ ꪢꪱꪀ ꪢꪮꪥ ꪲꪜ ꪹꪚꪱ ꪎꪺꪙ ꪕꪷ ꪄꪱꪥ ꪼꪒ ꪀꪱ ꪋꪮꪙ ꪵꪔ 170 ꪭꪮꪒ 200 ꪋꪫꪥꪸ ꪢꪽ, ꪵꪩꪫ ꪑꪉꪷ ꪋꪱꪥ ꪨꪱꪥ ꪋꪺ ꪹꪭꪙ ꪝꪷ ꪼꪭ ꪵꪣ ꪙꪱ ꪵꪮꪚ ꪭꪮꪀ , ꪕꪙꪸ ꪶꪕ ꪀꪉꪲ ꪉꪣꪸ ꪢꪱ ꪼꪄ , ꪣꪲ ꪔꪣꪾ ꪵꪕꪙ ꫄ꪉꪙ ꪎꪴ ꪶꪤꪉ.

                                                                              ꪵꪖꪉ ꪖꪫꪲ- ꪵꪬꪉ ꪥꪀꪲ