Lai Châu: Mốt mú cạ khài cuôn dàng tổng hợp

khảm cài đèn mương chuốp pắt

          Hụ đảy nang quam té dần mương cánh đảy chủm mú cảnh sát sok tang, cồng àn tỉnh Lai Châu nhẳn danh mưa khẹo, lẹo báo cáo cắp bàn giám đốc cồng àn tỉnh vạy nhẳn danh chuyên án cánh mi luông chôm hặp khòng lài chủm mú. Lằng tuận nưng điều tra, pưng trinh sát cọ nhẳn danh nẳng phổng xã Pu Nhi, huyện Điện Biên Đông, tỉnh Điện Biên mi mú côn nưng lỏ chựa côn Mông đàng cạt kiên cắp san côn mương Lao tánh cạ khài khồn chiên phít phép chất cuôn dàng té mương Lao khảu ma tỉnh Điện Biên lạo chiên khửn mưa tỉnh Lai Châu, Lao Cài vạy àu paỳ cá mương Trung Quốc khài.

          Thượng tá Lê Quốc Khánh, Phó trưởng phọng cảnh sát điều tra côn phít tội ma tang cuôn dàng, cồng àn tỉnh Lai Châu hẳư hụ: Pưng vịa dệt khòng mốt mú nị nhương mự nhương lắc lèm. Mỏi côn đảy giào mỏi nả vịa lá cằn cánh báu mi phằư hụ vịa dệt khòng phằư. Lằng chơ cuon dàng đảy khồn chiên té mương Lao ma nẳng đèn mương Việt nàm, hư mốt côn nị khồn chiên ma tọp hòm vạy nẳng thành phố Điện Biên Phủ vạy hó. Lằng nặn, pưng côn mương Lao nhập cảnh khảu ma Việt Nàm cánh 2 côn ứn lỏ pày cá Lao Cài vạy nhẳn hang.

          2 côn ặn lỏ Sủng A Thai, ók pì 1996, côn mương Lao cánh Hờ A Chua, ok pì 1989, dú nẳng bản Phủ Lồng, xã Pu Nhi, huyện Điện Biên Đông, tỉnh Điện Biên cọ chuốp pắt, cắp 300 păn viền cuôn dàng tổng hợp, pọm cắp san chương khòng ứn. Thiếu tướng Lê Văn Bảy , giám đốc cồng àn tỉnh Lai Châu, Trưởng Bàn uồn pa chuyên án hẳư hụ: ăn nị lỏ chuyên án phá mun mốt mú cạ khài cuôn dàng nhắư khòng chủm mú cồng àn tỉnh Lai Châu cánh va cọ men chuyên án mi số lượng cuôn dàng tổng hợp nhắư nhất tênh phén mương nặp té cón ma họtkhạy. ăn nị lỏ mốt mú côn phít tội mi luông chôm hặp khòng côn mương nok, khồn chiên cuôn dàng khảm cài đèn mương khảu ma mương Việt nàm vạy chiên pày họt mương thứ 3.

          Chuyên án phá mun mốt mú cạ khài, khồn chiên cuôn dàng tổng hợp khảm cài đèn mương khòng Cồng àn tỉnh Lai Châu tưa nị lỏ lang pek chôm mâng 55 pì mự tẳng tánh chủm mú Cảnh sát dần mương Việt Nàm. Lang pek cái diên lang pek, chủm mú cồng àn tỉnh Lai Châu chí cằm quyết chấp năm pưng luông pùn nghiệp vụ, cẳn tân mốt mú cạ khài cuôn dàng nhắư, hôm phân chự mẳn tiêng àn nẳng cuồng phổng./.

Khắc Kiên-Huyền dịch

ꪨꪱꪥ ꪹꪊꪱ: ꪶꪢꪒ ꪢꪴ ꪁꪱ ꪄꪱꪥ ꪁꪺꪙ ꪤꪱꪉ ꪶꪔꪉ ꫄ꪭꪚ ꪄꪱꪣ ꪀꪱꪥ ꪵꪒꪙ ꪹꪣꪉ ꪊꪺꪚ ꪜꪒꪰ

ꪭꪴ ꪼꪒ ꪙꪱꪉ ꪁꪫꪱꪣ ꪵꪔ ꫄ꪤꪙ ꪹꪣꪉ ꪵꪀꪉ ꪼꪒ ꪊꪣꪴ ꪢꪴ ꪵꪀꪉ ꪎꪱꪒ ꪎꪮꪀ ꪕꪱꪉ ꪶꪀꪉ ꪮꪱꪘ ꪔꪉꪲ ꪨꪱꪥ ꪹꪊꪱ ꪐꪽ ꪵꪥꪉ ꪹꪣ ꪵꪅꪫ ,ꪵꪩꪫ ꪚꪱꪫ ꪀꪱꪫ ꪀꪚꪾ ꪚꪱꪙ ꪤꪱꪣ ꪶꪒꪀ ꪶꪀꪉ ꪮꪱꪙ ꪔꪉꪲ ꪼꪫ ꪐꪽ ꪵꪥꪉ ꪊꪫꪙꪸ ꪮꪱꪙ ꪵꪀꪉ ꪣꪲ ꪩꪺꪉ ꪶꪋꪣ ꪭꪚꪾ ꪄꪮꪉ ꪨꪱꪥ ꪊꪣꪴ ꪢꪴ. ꪨꪉꪰ ꪕꪺꪙ ꫜ ꪒꪫꪸ ꪋꪱ ꪝꪉꪳ ꪋꪉꪲ ꪎꪱꪒ ꪁꪷ ꪐꪽ ꪵꪥꪉ ꪘꪉꪰ ꪎꪱ ꪝꪴ ꪑꪲ ,ꪭꪫꪙꪸ ꪓꪙꪸ ꪚꪙꪸ ꪶꪒꪉ ,ꪔꪉꪲ ꪓꪙꪸ ꪚꪙꪸ ꪣꪲ ꪢꪴ ꫛ ꫜ ꪨꪷ ꪹꪋ ꫛ ꪶꪣꪉ ꪒꪱꪉ ꪁꪱꪒ ꪀꪙꪸ ꪀꪚꪾ ꪎꪱꪘ ꫛ ꪹꪣꪉ ꪩꪱꪫ ꪵꪔꪉ ꪁꪱ ꪄꪱꪥ ꪶꪄꪙ ꪋꪙꪸ ꪠꪒꪲ ꪵꪠꪚ 7ꪊꪒ ꪁꪺꪙ ꪤꪱꪉ ꪵꪔ ꪹꪣꪉ ꪩꪱꪫ ꪹꪄꪱ ꪣꪱ ꪔꪉꪲ ꪓꪙꪸ ꪚꪙꪸ ꪵꪩꪫ ꪋꪙꪸ ꪄꪙꪳ ꪹꪣ ꪨꪱꪥ ꪹꪊꪱ, ꪩꪱꪫ ꪀꪱꪥ ꪼꪫ ꪹꪮꪱ ꪼꪜ ꪁꪱ ꪹꪣꪉ ꪊꪉꪴ ꪀꪺꪀ ꪄꪱꪥ.

ꪹꪗꪉ ꪔꪱ ꫃ꪨ ꪀꪺꪀ ꪵꪄꪉ ꪠꪷ ꪹꪊꪉ ꪡꪮꪉ ꪵꪀꪉ ꪎꪱꪒ ꪒꪫꪸ ꪋꪱ ꫛ ꪠꪒꪲ ꪶꪕꪥ ꪣꪱ ꪕꪱꪉ ꪁꪺꪙ ꪤꪱꪉ ꪶꪀꪉ ꪮꪱꪙ ꪔꪉꪲ ꪨꪱꪥ ꪹꪊꪱ ꪻꪬ ꪭꪴ: ꪝꪉꪳ ꪫꪀꪸ ꫃ꪤꪒ ꪄꪮꪉ ꪶꪢꪒ ꪢꪴ ꪙꪲ ꪹꪑꪉ ꪣꪳ ꪹꪑꪉ ꪨꪱꪀ ꪵꪨꪣ. ꪢꪮꪥ ꫛ ꪼꪒ ꪤꪱꪫ ꪢꪮꪥ ꪘꪱ ꪫꪀꪸ ꪨꪱꪀ ꪀꪽ ꪵꪀꪉ ꪹꪚꪱ ꪣꪲ ꪻꪠ ꪭꪴ ꪫꪀꪸ ꫃ꪥꪒ ꪄꪮꪉ ꪻꪠ. ꪨꪉꪰ ꫄ꪋ ꪁꪺꪙ ꪤꪱꪉ ꪼꪒ ꪶꪄꪙ ꪋꪙꪸ ꪣꪱ ꪘꪉꪰ ꪵꪒꪙ ꪹꪣꪉ ꪫꪒꪸ ꪘꪱꪢ ,ꪭꪳ ꪶꪢꪒ ꫛ ꪙꪲ ꪶꪄꪙ ꪋꪙꪸ ꪣꪱ ꪕꪮꪚ ꪬꪮꪣ ꪼꪫ ꪘꪉꪰ ꪵꪗꪉ ꪶꪠ ꪓꪙꪸ ꪚꪙꪸ ꪼꪫ ꪬꪷ. ꪨꪉꪰ ꪙꪽ ꪣꪲ 2 ꫛ ꪮꪙꪳ ꪨꪷ ꪼꪜ ꪁꪱ ꪩꪱꪫ ꪀꪱꪥ ꪼꪫ ꪐꪽ ꪹꪋꪉ ꪭꪱꪉ.

2 ꫛ ꪯꪽ ꪨꪷ ꪎꪉꪴ ꪯꪱ ꪗꪱꪥ ꪮꪮꪀ ꪜꪲ 1996 ꫛ ꪹꪣꪉ ꪩꪱꪫ ꪵꪀꪉ ꫄ꪬ ꪯꪱ ꪋꪺ ꪮꪮꪀ ꪜꪲ 1989 ꪤꪴ ꪘꪉꪰ ꪚꪱꪙ ꪠꪴ ꪶꪨꪉ ,ꪎꪱ ꪝꪴ ꪑꪲ ,ꪭꪫꪙꪸ ꪓꪙꪸ ꪚꪙꪸ ꪶꪒꪉ ,ꪔꪉꪲ ꪓꪙꪸ ꪚꪙꪸ ꪁꪷ ꪊꪺꪚ ꪜꪒꪰ ꪀꪚꪾ 300 ꪝꪽ ꪪꪙꪲ ꪁꪺꪙ ꪤꪱꪉ ꪶꪔꪉ ꫄ꪭꪚ ꪝꪮꪣ ꪀꪚꪾ ꪏꪱꪙ ꪔꪱꪉ ꪹꪋꪉ ꪄꪮꪉ ꪮꪙꪳ. ꪖꪫꪸ ꪵꪔꪉ ꫃ꪩ ꪪꪽ ꪼꪚ ꪤꪱꪣ ꪶꪒꪀ ꪶꪀꪉ ꪮꪱꪙ ꪔꪉꪲ ꪨꪱꪥ ꪹꪊꪱ, ꪹꪊꪉ ꪚꪱꪘ ꪮꪺꪙ ꪝꪱ ꪊꪫꪙꪸ ꪮꪱꪙ ꪻꪬ ꪭꪴ: ꪯꪽ ꪙꪲ ꪨꪷ ꪊꪫꪙꪸ ꪮꪱꪙ ꪠꪱ ꪣꪴꪙ ꪶꪢꪒ ꪢꪴ ꪁꪱ ꪄꪱꪥ ꪮꪺꪙ ꪤꪱꪉ ꪻꪐ ꪄꪮꪉ ꪊꪣꪴ ꪢꪴ ꪶꪀꪉ ꪮꪱꪙ ꪨꪱꪥ ꪹꪊꪱ. ꪯꪽ ꪙꪲ ꪨꪷ ꪶꪢꪒ ꪢꪴ ꫛ ꪠꪒꪲ ꪶꪕꪥ ꪣꪲ ꪩꪺꪉ ꪶꪋꪣ ꪭꪚꪾ ꪄꪮꪉ ꫛ ꪹꪣꪉ ꪙꪮꪀ ,ꪶꪄꪙ ꪋꪙꪸ ꪁꪺꪙ ꪤꪱꪉ ꪄꪱꪣ ꪀꪱꪥ ꪵꪒꪙ ꪹꪣꪉ ꪹꪄꪱ ꪣꪱ ꪫꪀꪸ ꪘꪱꪣ ꪼꪫ ꪶꪄꪙ ꪋꪙꪸ ꪼꪜ ꪹꪣꪉ ꪖꪴ 3.

ꪊꪫꪙꪸ ꪮꪱꪙ ꪠꪱ ꪣꪙꪴ ꪶꪢꪒ ꪢꪴ ꪁꪱ ꪄꪱꪥ ꪶꪄꪙ ꪋꪙꪲ ꪁꪺꪙ ꪤꪱꪉ ꪶꪔꪉ ꫄ꪭꪚ ꪄꪱꪣ ꪀꪱꪥ ꪵꪒꪙ ꪹꪣꪉ ꪄꪮꪉ ꪶꪀꪉ ꪮꪱꪙ ꪔꪉꪲ ꪨꪱꪥ ꪹꪊꪱ ꪹꪕ ꪙꪲ ꪨꪷ ꪩꪱꪉ ꪵꪝꪀ ꪶꪋꪣ ꫄ꪣꪉ 55 ꪜꪲ ꪣꪳ ꪔꪉꪰ ꪵꪔꪉ ꪊꪣꪴ ꪢꪴ ꪵꪀꪉ ꪎꪱꪒ ꫄ꪤꪙ ꪹꪣꪉ ꪪꪒꪸ ꪘꪱꪣ. ꪩꪱꪉ ꪵꪝꪀ ꪀꪱꪥ ꪥꪙꪸ ꪩꪱꪉ ꪵꪝꪀ ꪊꪣꪴ ꪢꪴ ꪶꪀꪉ ꪮꪱꪙ ꪨꪱꪥ ꪹꪊꪱ ꪀꪣꪾ ꪀꪫꪒꪸ ꫄ꪊꪚ ꪙꪣꪾ ꪝꪉꪳ ꪩꪺꪉ ꪜꪙꪴ ꪉꪚꪸ ꪫꪴ, ꪀꪽ ꫄ꪕꪙ ꪶꪢꪒ ꪢꪴ ꪁꪱ ꪄꪱꪥ ꪁꪺꪙ ꪤꪱꪉ ꪻꪐ ꪶꪭꪣ ꫄ꪡꪙ ꪋꪳ ꪢꪽ ꪵꪙꪙ ꪕꪉꪸ ꪮꪱꪘ ꪘꪉꪰ ꪀꪺꪉ ꪶꪠꪉ.

ꪹꪩꪉ ꪬꪫꪙꪸ ꪥꪀꪲ