Cựt pền côn hăng mi pưa púk mák kiểng nẳng đìn pu

Hươn quề dú cá huyện Văn Giang, tỉnh Hưng Yên, pọm cắp tay hươn khửn ma cá huyện Phù Yền, tỉnh Sơn La tánh tăm puồng kìn đơi dú té pì 1963, mưa khoẹ chua hươn lung Nguyễn Văn Ngân dú bản Văn Yên, xã Mương Thải cọ tí thàng đìn púk khảu li, lẹo nhại ma púk san tàng cò kìn mák xương mák mặn hậu, mák muông, hák va báu cựt đảy lang đì kinh tế xùng, pưa ca con báu tẹt tiêng. Pì 2011, lằng chơ pày hươn quề pày bấng le nẳng san bón púk cò mák kiểng nẳng tà đìn pu cựt đảy ca con kinh tế xùng, lung Ngân cọ quyết định xự kỉ xíp cốc ma púk thử bấng. Hền cò mák kiểng cọ chọp sồm cắp nặm đìn nẳng nị, xương nặn mỏi pì lung Ngân cọ púk tứm lệch nọ, họt khạy chua hươn lung cọ mi họt 2 héc ta đìn púk mák kiểng cánh mák pục.

Đìn báu dệt hanh côn xìa lạ, pì 2014, xuần mak kiểng khòng lung Ngân cọ pền chu cốc khọe pền lài mak cánh kìn bàn, báu pền bệnh. Lung Ngân lăm đù men kỹ thuật, báu xủ lài dà pảy chự cò puk bồng. Pì 2015, lung Ngân thù dáo 18 tấn mak kiểng, cắp ca khài 30 triệu mằn mỏi tấn. Lằng chơ xị xìa chu tàng ngơn phí, chua hươn lung cọ cựt đảy tà mả dáo 400 triệu mằn. Té nặn ma, cò mak kiểng cọ cựt pền tàng cò puk bồng cốc chính cựt ma thù nhập xùng hăử tay hươn. Họt pì 2016, cài 2 héc ta cò mak kiểng cọ cựt đảy dáo 30 tấn, xị xìa chu tàng ngơn chua hươn lung cọ cựt đảy tà mả dáo 700 triệu mằn, thù nhập pằn pâng mỏi hùa côn cựt đảy 16 triệu mằn mỏi côn mỏi bườn.

Cựt đảy lang đì xương mự nị, lung Ngân cọ pọ lài khù dak cha, pưa puk mak kiểng nẳng tà đìn pu xương nặn cọ dak cha cuồng vịa lăm đù. Lung Ngân va hịa, khù cận hà nhất cuồng vịa puk mak kiểng, mak nghe ặn lỏ chự phong bệnh cánh xủ khún dà pảy chự cò puk bồng men luông. Lung lâng pày bấng le xuần mak, tắt lan nga, hụ hền ok văn bổng manh cắt hại vạy mi luông dàu dà chọp xồm. Vạy cò mak mả pe chăn đì, lung Ngân cọ xủ khún dà chọp xồm, cạt kiên dà khún hóa học cắp khún vi sinh, khún lang. Chơ cò pền mak pôi nga cọm, lung đảy dệt hảng cặm vạy báu hăử nga hắc. Đảy lăm đù, dàu dà men luông, mak kiểng kìn bàn, đảy lài côn mặc kìn.

Báu chư hịa cựt pền côn hăng mi pưa puk mak kiểng nẳng đìn pu, chua hươn lung Ngân nhăng lâng tạ mi vịa dệt hăử 6 côn dệt dượn cắp mức lường 2 triệu hả mỏi bườn.

Hạng pì, lung Ngân cọ chik bok kinh nghiệm puk bồng hăử dáo 30 côn táo khửn té vịa lựa chựa, kỹ thuật puk, lăm đù cánh thù pít. Xòng ma choi dừa ma tang ngơn cốc cánh bánh pằn kinh nghiệm dệt dượn hăử 8 chua hươn cặt, chua hươn pọ dak cha cuồng bản.

Vạy mi đảy chương hang tiêng àn toi luông pùn Việt gáp, bườn 9/2016, lung Ngân cọ ok nả tánh ok hợp tác xã puk cò kìn mak  cắp 7 thành viền, tà đìn puk mak kiểng đảy chứng nhẳn toi luông pùn Việt gáp lỏ 9 héc ta. Lung Ngân đảy cồng nhẳn lỏ chua hươn dệt dượn, cạ khài giỏi cấp Trung ương dan té pì 2012-2016./.

T Thủy-Huyền dịch

ꪁꪒꪳ ꫃ꪜꪙ ꫛ ꪭꪉꪰ ꪣꪲ ꪹꪝ ꪜꪴꪀ ꪢꪱꪀ ꪀꪉꪸ ꪘꪉꪰ ꪒꪙꪲ ꪝꪴ

ꪹꪭꪙ ꫃ꪀꪫ ꪤꪴ ꪁꪱ ꪭꪫꪙꪸ ꪪꪽ ꪤꪱꪉ ꪔꪉꪲ ꪬꪉꪳ ꪮꪙꪸ, ꪝꪮꪣ ꪀꪚꪾ ꪼꪕ ꪹꪭꪙ ꪄꪙꪳ ꪣꪱ ꪁꪱ ꪠꪴ ꪮꪙꪸ, ꪔꪉꪲ ꫄ꪎꪙ ꪨꪱ ꪵꪔ ꪜꪲ 1963, ꪹꪣ ꪵꪅꪫ ꪋꪺ ꪹꪭꪙ ꪩꪉꪴ ꪈꪫꪙꪸ ꪪꪽ ꫄ꪈꪙ ꪤꪴ ꪚꪱꪙ ꪪꪽ ꪮꪙꪸ, ꪎꪱ ꪹꪣꪉ ꪖꪱꪥ ꪁꪷ ꪔꪲ ꪖꪱꪉ ꪒꪙꪲ ꪜꪴꪀ ꪹꪄꪱ ꪩꪲ, ꪵꪩꪫ ꪑꪱꪥ ꪣꪱ ꪜꪴꪀ ꪏꪱꪙ ꪔꪱꪉ ꪀꪷ ꪀꪙꪲ ꪢꪱꪀ ꪹꪏꪉ ꪢꪱꪀ ꪣꪽ, ꪢꪱꪀ ꪣꪺꪉ ꪬꪱꪀ ꪫꪱ ꪹꪚꪱ ꪁꪒꪳ ꪼꪒ ꪩꪱꪉ ꪒꪲ ꪀꪉꪲ ꫃ꪔ ꪎꪴꪉ ,ꪹꪝ ꪁꪱ ꪁꪮꪙ ꪹꪚꪱ ꪵꪕꪒ ꪕꪉꪸ. ꪜꪲ 2011 ꪨꪉꪰ ꫄ꪋ ꪼꪜ ꫄ꪚꪉ ꪵꪩ ꪘꪉꪰ ꪏꪱꪙ ꪚꪮꪙ ꪜꪴꪀ ꪀꪷ ꪢꪱꪀ ꪀꪉꪸ ꪘꪉꪰ ꪔꪱ ꪒꪙꪲ ꪝꪴ ꪁꪒꪳ ꪼꪒ ꪩꪱꪉ ꪒꪲ ꪀꪲꪉ ꫃ꪔ ꪎꪴꪉ ,ꪩꪴꪉ ꫄ꪈꪙ ꪁꪷ ꪏꪳ  ꪀꪲ ꪎꪚꪲ ꪶꪀꪀ ꪣꪱ ꪜꪴꪀ ꪖꪳ ꫄ꪚꪉ. ꫃ꪬꪙ ꪀꪷ ꪢꪱꪀ ꪀꪉꪸ ꪋꪮꪚ ꪶꪎꪣ ꪀꪚꪾ ꪙꪣꪾ ꪒꪙꪲ ꪘꪉꪰ ꪘꪲ ꪹꪏꪉ ꪙꪽ ꪢꪮꪥ ꪜꪲ ꪩꪴꪉ ꫄ꪈꪙ ꪁꪷ ꪜꪴꪀ ꪔꪣꪳ ꫃ꪩꪀ ꪙꪮꪥ, ꪭꪮꪒ ꪼꪅ ꪋꪺ ꪹꪭꪙ ꪩꪉꪴ ꪁꪷ ꪣꪲ ꪭꪮꪒ 2 ꪵꪬꪀ ꪕꪱ ꪒꪙꪲ ꪜꪴꪀ ꪢꪱꪀ ꪀꪉꪸ ꪵꪀꪉ ꪢꪱꪀ ꪝꪴꪀ.

ꪒꪙꪲ ꪹꪚꪱ ꫃ꪥꪒ ꪻꪬ ꪵꪭꪉ ꫛ ꪎꪸ ꪩꪱ ꪜꪲ 2014 ꪂꪺꪙ ꪢꪱꪀ ꪀꪉꪸ ꪄꪮꪉ ꪋꪺ ꪹꪭꪙ ꪩꪉꪴ ꫄ꪈꪙ ꪁꪷ ꫃ꪜꪙ ꪋꪴ ꪶꪀꪀ ꪵꪅꪫ ꫃ꪜꪙ ꪨꪱꪥ ꪢꪱꪀ ꪵꪀꪉ ꪀꪙꪲ ꪚꪱꪙ. ꪩꪉꪴ ꪩꪣꪾ ꪒꪴ ꪹꪤꪱ ꪤꪱ ꪵꪣꪙ ꪕꪮꪥ ꪀꪲ ꪖꪺꪒ ,ꪹꪚꪱ ꪎꪴ ꪨꪱꪥ ꪤꪱ ꪼꪜ ꪋꪳ ꪀꪷ ꪜꪴꪀ ꪶꪚꪉ. ꪜꪲ 2015 ꪩꪉꪴ ꫄ꪈꪙ ꪖꪴ ꪼꪒ ꪤꪱꪫ 18 ꫄ꪔꪙ ꪢꪱꪀ ꪀꪉꪸ ꪀꪚꪾ ꪁꪱ ꪄꪱꪥ 30 ꪋꪫꪸ ꪢꪽ ꪢꪮꪥ ꫃ꪔꪙ. ꪨꪉꪰ ꫄ꪋ ꪎꪲꪀ ꪎꪸ ꪋꪴ ꪔꪱꪉ ꫄ꪉꪙ ꪁꪷ ꪁꪒꪳ ꪼꪒ ꪔꪱ ꪢꪱ ꪤꪱꪫ 400 ꪋꪫꪸ ꪢꪽ. ꪭꪮꪒ ꪜꪲ 2016 ꪀꪱꪥ 2 ꪵꪬꪀ ꪕꪱ ꪀꪷ ꪢꪱꪀ ꪀꪉꪸ ꪁꪷ ꪁꪒꪳ ꪼꪒ ꪤꪱꪫ 30 ꫄ꪔꪙ ꪢꪱꪀ ,ꪔꪱ ꪢꪱ ꪁꪒꪳ ꪼꪒ 700 ꪋꪫꪸ ꪢꪽ.

ꪁꪒꪳ ꪼꪒ ꪩꪱꪉ ꪒꪲ ꪹꪏꪉ ꪣꪳ ꪙꪲ ꪩꪉꪴ ꫄ꪈꪙ ꪁꪷ ꪝꪷ ꪨꪱꪥ ꪥꪱꪀ ꪋꪱ. ꪩꪉꪴ ꫄ꪈꪙ ꪫꪱ ꪭꪀꪸ, ꪄꪴ ꫄ꪁꪙ ꪬꪱ ꫄ꪐꪒ ꪀꪺꪉ ꪫꪀꪸ ꪜꪴꪀ ꪢꪱꪀ ꪀꪉꪸ, ꪢꪱꪀ ꪵꪉ ꪯꪽ ꪨꪷ ꪋꪳ ꪡꪮꪉ ꪶꪚꪉ ꪵꪣꪉ ꪵꪀꪉ ꪎꪴ ꪤꪱ ꪼꪜ ꪋꪳ ꪀꪷ ꪜꪴꪀ ꪶꪚꪉ ꪵꪣꪙ ꪩꪺꪉ. ꪩꪉꪴ ꫄ꪩꪉ ꪼꪜ ꫄ꪚꪉ ꪵꪩ ꪎꪺꪙ ꪢꪱꪀ ,ꪕꪒꪰ ꪩꪱꪙ ꪉꪱ, ꪭꪴ ꫃ꪬꪙ ꪫꪽ ꪶꪚꪉ ꪵꪣꪉ ꪀꪒꪰ ꪭꪱꪥ ꪼꪫ ꪣꪲ ꪩꪺꪉ ꪹꪤꪱ ꪤꪱ ꫄ꪩꪚ ꪕꪽ.

ꪹꪚꪱ ꪋꪳ ꪭꪀꪸ ꪭꪴ ꫃ꪥꪒ ꪭꪉꪰ ꪻꪬ ꪋꪺ ꪹꪭꪙ ꪹꪊꪱ ꪩꪱ, ꪩꪉꪴ ꫄ꪈꪙ ꪑꪉꪰ ꪕꪱ ꪣꪲ ꪫꪀꪸ ꫄ꪥꪒ ꪻꪬ 6 ꫛ ꫃ꪥꪒ ꪹꪥꪙ ꪀꪚꪾ ꪢꪀꪳ ꪹꪨꪉ ꪎꪮꪉ ꪋꪫꪸ ꪬꪱ ꪢꪮꪥ ꪹꪚꪙ.

ꪭꪱꪉ ꪜꪲ ꪩꪉꪴ ꫄ꪈꪙ ꪁꪷ ꪊꪲ ꪚꪮꪀ ꪀꪉꪲ ꪉꪣꪸ ꪜꪴꪀ ꪶꪚꪉ ꪻꪬ ꪤꪱꪫ 30 ꫛ ꪔꪱꪫ ꪄꪙꪳ ꪵꪔ ꪫꪀꪸ ꪹꪩꪀ ꪹꪋ ,ꪀꪲ ꪖꪺꪒ ꪜꪴꪀ ꪭꪮꪒ ꪫꪀꪸ ꪩꪣꪾ ꪒꪴ ꪵꪀꪉ ꪖꪴ ꪜꪲꪒ. ꪎꪮꪉ ꪣꪱ ꪋꪮꪥ ꪹꪤ ꪣꪱ ꪕꪱꪉ ꫄ꪉꪙ ꪶꪀꪀ ꪵꪀꪉ ꪵꪚꪉ ꪜꪽ ꪀꪉꪲ ꪉꪣꪸ ꫃ꪥꪒ ꪹꪥꪙ ꪻꪬ 8 ꪋꪺ ꪹꪭꪙ ꪁꪒꪰ, ꪹꪭꪙ ꪤꪱꪫ ꪝꪷ ꪥꪱꪀ ꪋꪱ ꪀꪺꪉ ꪚꪱꪙ.

ꪼꪫ ꪣꪲ ꪼꪒ ꪹꪋꪉ ꪭꪱꪉ ꪕꪉꪸ ꪮꪱꪙ  ꪕꪮꪥ ꪩꪺꪉ ꪜꪴꪙ ꪫꪒꪸ ꪈꪱꪚ ,ꪹꪚꪙ 9.2016 ꪩꪉꪴ ꫄ꪈꪙ ꪁꪷ ꪮꪮꪀ ꪘꪱ ꪵꪔꪉ ꪮꪮꪀ ꫄ꪭꪚ ꪕꪱꪀ ꪎꪱ ꪜꪴꪀ ꪀꪷ ꪀꪙꪲ ꪢꪱꪀ ꪀꪚꪾ 7 ꪵꪖꪉ ꪪꪙꪸ, ꪔꪱ ꪒꪙ ꪜꪴꪀ ꪢꪱꪀ ꪀꪉꪸ ꪼꪒ ꪊꪉꪳ ꪐꪽ ꪕꪮꪥ ꪩꪺꪉ ꪜꪴꪙ ꪫꪒꪸ ꪈꪱꪚ ꪨꪷ 9 ꪵꪬꪀ ꪕꪱ. ꪩꪉꪴ ꫄ꪈꪙ ꪼꪒ ꪶꪀꪉ ꪐꪽ ꪨꪷ ꪋꪺ ꪹꪭꪙ ꫃ꪥꪒ ꪹꪥꪙ ,ꪁꪱ ꪄꪱꪥ ꪤꪮꪥ ꫄ꪀꪚ ꪊꪉꪴ ꪹꪮꪉ ꪥꪱꪙ ꪵꪔ ꪜꪲ 2012-2016.

ꪹꪩꪉ ꪬꪫꪙꪸ ꪥꪀꪲ